- Яшлар жили
- 31 Қазан, 2019
Вәтәнпәрвәрләр мусабиқиси
«Вәтәнпәрвәрлик киндик қениң тамған йериңгә, өскән йезаңға, шәһәр вә өлкәңгә, йәни туғулған йериңгә дегән муһәббәттин башлиниду» дәп тәкитлиниду Тунҗа Президент – Елбасы Нурсултан Назарбаевниң «Келәчәккә нишан: мәнивий йеңилиниш» намлиқ мақалисида. Умумән, вәтәнпәрвәр болуш дегинимиз – Туғулған йәрни қоғдаш, униң тарихини сақлап, келәчиги үчүн тәр төкүш.
Сабирәм ӘНВӘРОВА,
«Уйғур авази»
Хулләс, бепаян Қазақстан даласини қоғдаш – униң қойнида өмүр сүрүватқан һәрбир қазақстанлиқниң муқәддәс пәрзи. Бу борчни ада қилмақ үчүн яшлиримизға күч-ғәйрәттин авал вәтәнпәрвәрлик роһ һаҗәт. Бир сөз билән ейтқанда, туғулған йәргә, Вәтәнгә дегән муһәббәт – инсанниң мәнивий байлиғидин учур беридиған әзиз уқум. Җүмлидин яшларниң вәтәнпәрвәрлик сезимини ойғитиш мәхситидә Уйғур наһийәсидә изчил әһмийити зор чарә-тәдбирләр қолға елинмақта. Шуларниң бири, техи йеқинда 2534-һәрбий бөлүмчисидә өткән «Айбын» һәрбий-вәтәнпәрвәрлик спорт мусабиқисидур.
Уйғур наһийәлик Яшлар ресурслуқ мәркизиниң уюштуруши билән өткән мусабиқигә мәктәп оқуғучилиридин тәшкил қилинған командилар қатнишип, улар өзлириниң һәрбий билими билән тәйярлиғини көрсәтти. Мусабиқиниң ечилишида сөз алған 2534-һәрбий бөлүминиң қомандани Қанат Қусманов вә наһийәлик мудапиә ишлири бойичә бөлүминиң башлиғи Султанмурат Ғаппаров қатнашқучи командиларға ақ йол тилиди.
Нәтиҗидә 1-Чонҗа оттура мәктивиниң оқуғучилири 1-орунға муйәссәр болди вә улар вилайәтлик мусабиқигә йолланма алди. Иккинчи орунға Шуңқар оттура мәктивиниң командиси сазавәр болса, мукапатлиқ үчинчи орун Дардамту оттура мәктиви оқуғучилириниң әнчисигә тәгди.
272 рет
көрсетілді0
пікір