• Яшлар жили
• 31 Қазан, 2019

Яшлар форуми өтти

Йолдаш МОЛОТОВ, «Уйғур авази» Мәлумки, бу жил елимизниң Тунҗа Президенти Н.Назарбаевниң тәшәббуси билән «Яшлар жили» дәп елан қилинди. Шуниңға мунасивәтлик жил давамида елимизниң җай-җайлирида яшларға беғишланған чарә-тәдбирләр өтүватиду. 29-октябрь күни Нур-Султан шәһиридә Назарбаев Университетта Қазақстан хәлқи Ассамблеясиниң тәшәббуси билән «Socіal Assembly» мавзусида яшлар форуми өтти. Униңға җумһурийитимизниң барлиқ регионлиридин паалийәтчан яшлар қатнашти. Мәзкүр форум даирисидә «Startap алаңы» көргәзмиси уюштурулди. Көргәзмидә җумһурийәт яшлириниң инновациялик лайиһилири намайиш қилинди. Форумни киришмә сөз билән ачқан ҚХА «Жаңғыру жолы» җумһурийәтлик яшлар һәрикитиниң рәиси Максим Споткай яшларниң жил давамида әмәлгә ашурған ишлири һәққидә тәпсилий тохтилип өтти. Андин «Жаңғыру жолы» җумһурийәтлик яшлар һәрикитиниң регионлардики штаблириниң рәһбәрлири өзлириниң ишлири һәққидә һесават бәрди. Қошумчә қилиш керәкки, форум даирисидә яшлар үчүн һәрхил тренинглар уюштурулди. Шундақ тренингларниң бирини җумһурийәтлик Уйғур этномәдәнийәт мәркизи йенидики Қазақстан Уйғур Яшлири Бирлигиниң рәиси Рустәм Хәйриев «Яшлар 2.0: риқабәткә қабил шәхс» мавзусида өткүзди. Униңдин ташқири яшлар ҚҖ Миллий китапханиси рәһбириниң әхбаратлиқ ресурслар бойичә орунбасари Нуржан Жолдыбалинов, тәтқиқатчи вә тиҗарәтчи Амир Қуат, домбричи Алексей Лодочников билән учришип, сөһбәтләшти. Форум ахирида сөзгә чиққан ҚХА Рәисиниң орунбасари — Қазақстан Җумһурийити Президентиниң Мәмурийити ҚХА кативатиниң мудири Жансейит Түймебаев яшларни форумниң утуқлуқ өтүши билән тәбриклиди. Шундақла бир топ яшларға, шуларниң ичидә ҚУЯБ рәиси Рустәм Хәйриевқа ҚХАниң Тәшәккүрнамилирини тапшурди. Пурсәттин пайдилинип, Рустәм Хәйриевни бу мукапити билән сәмимий тәбрикләймиз.