• Әхбаратлар еқими
• 31 Қазан, 2019

Фестиваль өтти

Йолдаш МОЛОТОВ, «Уйғур авази» Йеқинда Қазақстан хәлқи Ассамблеясиниң Атырав вилайәтлик шөбисиниң вә «Қоғамдық келісім» җәмийәтлик бирләшмисиниң тәшәббуси билән Атырав шәһиридики «Достлуқ өйидә» «Милләтләр мәдәнийити» фестивали өтти. «Рухани жаңғыру» программиси даирисидә өткән бу фестивальға вилайәттики барлиқ миллий мәдәнийәт мәркәзлириниң вәкиллири қатнашти. Җүмлидин җумһурийәтлик Уйғур этномәдәнийәт мәркизиниң Атырав вилайәтлик шөбисиниң вәкиллириму иштрак қилди. Атырав вә Ақтав шәһәрлиридә яшаватқан уйғурлар бу йәргә, асасән, иш бабида келип қалғанлар, — дәйду ҖУЭМниң ғәрбий региондики вәкили Тохтасун Әйсаров. — Болупму һәрбийләр көп. Улар вақтиниң қислиғиға қаримай, җәмийәтлик ишларға йеқиндин арилишишқа тиришип келиватиду. Мана йеқинда «Атырав уйғурлири» җәмийәтлик бирләшмисиниң рәиси болуп активист қизимиз Гүлназ Имирова сайланди. Бу регионда яшаватқан уйғурлар ҚХА даирисидә өтүватқан барлиқ чарә-тәдбирләрниң паал қатнашқучиси. Һәрқандақ мәйрәмләрдә миллий мәдәнийитимизни, сәнъитимизни, таамлиримизни намайиш қилип келиватимиз. Тәкитләш лазимки, Атыравда өткән «Милләтләр мәдәнийити» фестивалида «Атырав уйғурлири» җәмийәтлик бирләшмисиниң паалийәтчанлиғи алаһидә тилға елинди һәм 360 миң тәңгилик мәхсус сертификат билән тәғдирләнди.