• Әхбаратлар еқими
  • 31 Қазан, 2019

Қазақстан – Беларусь: стратегиялик шериклик күчийиватиду

Дөләт рәһбири Қасым-Жомарт Тоқаев Қазақстанға рәсмий сәпәр билән кәлгән Беларусь Җумһурийитиниң Президенти Александр Лукашенко билән музакириләрни өткүзди. Қасым-Жомарт Тоқаев Қазақстан Җумһурийити Президентиниң рәсмий қараргаһида жуқури дәриҗилик меһманни тәнтәнилик қарши алғандин кейин Президентлар дәсләп тар тәркиптики музакириләрни өткүзди. Дөләт рәһбири Қазақстанда Александр Лукашенкоға Беларусь мустәқиллигиниң асасини салған көрнәклик дөләт әрбаби сүпитидә сәмимий һөрмәт билән мунасивәт қилидиғанлиғини тәкитлиди. Александр Лукашенко болса, Қасым-Жомарт Тоқаевқа сәмимий қобул қилғанлиғи үчүн миннәтдарлиқ билдүрди вә икки мәмликәт оттурисидики мунасивәтләрниң тарихий җәһәттин достанә характерға егә екәнлигини тәкитлиди. Андин кейин Президентлар кәңәйтилгән тәркиптики музакириләрни өткүзди. Музакириләрдә сода ихтисадий шерикликни кәңәйтишкә алаһидә диққәт бөлүнди. Униңдин ташқири Қазақстан вә Беларусьниң сәясий, мәдәний-гуманитарлиқ саһалардики, шундақла хәлиқара вә регионлуқ қурулумлар даирисидики өзара һәрикитигиму мунасип диққәт бөлүнди. Қасым-Жомарт Тоқаев Беларусь делегациясигә илтипат билдүрүп, һәр икки мәмликәтни достлуқ вә һәмкарлиқ түгүнлири бағлаштуруватқанлиғини тәкитлиди. Дөләт рәһбири шундақла Александр Лукашенко сәпириниң мунасивәтләрни техиму тәрәққий әткүзүш бойичә муһим мәсилиләрни пухта муһакимә қилиш үчүн яхши имканийәт болуп һесаплинидиғанлиғини тәкитлиди. – Биз дөләтлиримиз оттурисида сода көләминиң көпәйтилишигә, гуманитарлиқ саһадики алақиларниң күчийишигә, хәлиқара тәшкилатлар даирисидики өзара һәрикәтниң актив давамлаштурулушиға мәнпийәтдар, – дәп тәкитлиди Қасым-Жомарт Тоқаев. Александр Лукашенко өз новитидә Беларусь-Қазақстан мунасивәтлири дәриҗисиниң икки мәмликәтниң стратегиялик мәнпийәтлиригә толуқ мувапиқ келидиғанлиғини тәкитлиди. – Бу көпжиллиқ пидакарлиқ ишниң нәтиҗиси болуп, у келәчәккә җиддий планларни түзүш имканийитини бериду. Минск вә Нур-Султан оттурисида барлиқ дәриҗиләрдики өзара һәрикәтниң иҗабий тәҗрибиси моҗут, – деди Беларусь Президенти. Қасым-Жомарт Тоқаев билән Александр Лукашенко музакириләр йәкүни бойичә бирләшкән билдүрүш имзалиди. У иккитәрәплимә һәмкарлиқни сүпәт җәһәттин йеңи дәриҗигә елип чиқишқа, шерикликни техиму җанландурушқа вә хәлиқара мәйдандики иш-һәрикәтләрни уйғунлаштурушқа қаритилған. Униңдин ташқири Қазақстан вә Беларусь мунасивәтлириниң шәртнамә-һоқуқ асасини техиму бейитқан биртүркүм һөҗҗәтләр имзаланди. Һөҗҗәтләр имзаланғандин кейин музакириләр йәкүни бойичә брифинг өткүзүлүп, униңда Қасым-Жомарт Тоқаев Қазақстан вә Беларусь оттурисидики утуқлуқ һәм нәтиҗидарлиқ мунасивәтләрниң асасини Елбасы билән Александр Лукашенко салғанлиғини алаһидә тәкитлиди. Буниңда у Беларусь рәһбири сәпириниң икки мәмликәт оттурисидики стратегиялик шерикликниң давами болғанлиғини тилға алди. Қазақстан Президенти шундақла Александр Лукашенко сәпириниң өзара чүшәнчә вә ишәнчә роһида өткәнлигини тәкитлиди. Буниңда у музакириләрниң утуқлуқ болидиғанлиғиниң күтүлгәнлигини қанаәтлиниш билән тәкитлиди вә қолға кәлтүрүлгән келишимләр билән қобул қилинған қарарларниң Қазақстан һәм Беларусь хәлиқлириниң пайдисиға хизмәт қилидиғанлиғиға ишәнчә билдүрди. Александр Лукашенкому учришишқа шундақ баһа бәрди. У музакириләрниң достлуқ кәйпиятта өтүп, ишчанлиқ вә өзара ишәнчә характериға егә болғанлиғини, уларниң нәтиҗилириниң Минск вә Нур-Султан оттурисидики стратегиялик шерикликни техиму чоңқурлитиш имканийитини беридиғанлиғини атап көрсәтти. Беларусь Президенти шундақла Қасым-Жомарт Тоқаевни 2020-жили Беларусьни рәсмий сәпәр билән зиярәт қилишқа тәклип қилғанлиғини тәкитлиди.

401 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы