• Әхбаратлар еқими
• 31 Қазан, 2019

Теннис юлтузлирини қобул қилди

Президент Қасым-Жомарт Тоқаев өткән пәйшәнбә күни дуния теннисиниң юлтузлири Рафаэль Надаль вә Новак Джокович билән учрашти. Дөләт рәһбири «Ақорда» резиденциясидә атақлиқ теннисчиларға илтипат билдүрүп, Рафаэль Надаль билән Новак Джоковичқа Қазақстанға келип, хәйрихаһлиқ матч өткүзгәнлиги үчүн миннәтдарлиқ билдүрди. — Бу — заманимизниң улуқ теннисчилириниң оюнини Қазақстанда тамашә қилишниң әҗайип имканийити. Матчниң хәйрихаһлиқ мәхсәттә өткүзүлүшиму наһайити муһимдур. Силәрниң бизниң пайтәхткә келишиңлар — Қазақстанда теннисниң тәрәққий етишигә қоллап-қувәтләш билдүргиниңларниң ениқ көрүнүши. Силәр балилар үчүн өткүзидиған маһарәт дәрисиниң улар үчүн яхши үлгә болидиғанлиғиға вә силәрниң изиңлар билән меңишқа илһамландуридиғанлиғиға ишинимән, – деди Қасым-Жомарт Тоқаев. Рафаэль Надаль билән Новак Джокович Қазақстанда теннисниң тәрәққий етиватқанлиғиға жуқури баһа берип, Президентқа учришишқа мүмкинчилик яратқанлиғи үчүн миннәтдарлиқ билдүрди. — Бу мениң Қазақстанға үчинчи қетим келишим. Һәр кәлгинимдә көркәм пайтәхттин алаһидә бәһир алимән, амма бу қетимқи сәпәр алаһидә болди, чүнки мән Сиз билән учришишқа вә һашамәтлик «Ақорда» сарийида болуш пурситигә егә болдум, – деди Рафаэль Надаль. — Президент җанаплири, Қазақстанда теннисни қоллап-қувәтләватқанлиғиңиз үчүн тәшәккүр изһар қилимән. Биз силәрниң мәмликитиңларда теннисниң тәрәққий етип, аммибаплиққа айлинишиға һәссә қошуватқанлиғимиздин хошалмиз, – дәп тәкитлиди Новак Джокович. Қасым-Жомарт Тоқаев спортчиларға утуқ-муваппәқийәт тиләп, Рафаэль Надальни йеқинда өткән нека тойи билән тәбриклиди. Шу күни Елбасы Нурсултан Назарбаев Новак Джокович билән Рафаэль Надаль оттурисида өткән хәйрихаһлиқ теннис матчини тамашә қилди. Пайтәхттики «Барыс-Арена» сарийида өткән матчниң башлиниши алдида Елбасы дуния теннисиниң юлтузлири Новак Джокович вә Рафаэль Надаль билән учрашти. Нурсултан Назарбаев спортчилар билән болған сөһбәт давамида уларниң оттурисидики матчниң ярқин вә қизғин өтүшигә тиләкдашлиқ билдүрди. – Қазақстанлиқлар сәйяриниң улуқ теннисчилирини көргәнлигидин наһайити хошал. Мән дайим силәрниң оюниңларни көрүп, тамашә қилимән. Силәр спортта чоң нәтиҗиләргә ериштиңлар, – деди Тунжа Президент. Учришиш давамида Елбасы теннисчиларға мустәһкәм саламәтлик тиләп, Рафаэль Надальни йеқинда аилилик болуши билән тәбриклиди. Матч йәкүни бойичә топланған мәбләғ мәмликәт регионлирида теннис инфрақурулумини тәрәққий әткүзүш үчүн хәйрихаһлиқ мәхсәтләргә хәшлиниду.