• Спорт
• 06 Қараша, 2019

Ярайсән, Рамиль!

Сабирәм ӘНВӘРОВА, «Уйғур авази» Гезитимизниң өткән санлириниң биридә Алмута шәһиридә болуп өткән армрестлингтин Азия кубогида Уйғур наһийәлик Балилар вә өсмүрләр спорт мәктивиниң учумкари Рамиль Османовниң 60 килограмм салмақ дәриҗисидә чемпион атилип, 27-октябрь билән 4-ноябрь арилиғида Румыниядә өтидиған дуния чемпионатиға ҚҖ талланма командисиниң тәркивидә қатнишидиғанлиғини хәвәрлигән едуқ. Хуш хәвәр! Рамиль бу новәтму олҗилиқ қайтти. У Румыниядә болуп өткән дуния чемпионатида 60 килограмм салмақ дәриҗиси бойичә иккинчи орунни елишқа муйәссәр болди. Рамильниң рәқиплири Украина, Түркия, Грузия, Өзбәкстан, Қирғизстан, Һиндстан қатарлиқ дөләтләрдин иштрак қилған спорт маһирлири болди. Мәзкүр мусабиқигә Қазақстандин 108 спортчи қатнишип, елимизниң талланма командиси умумий һесапта 2-орундин көрүнди. Тәкитләш керәкки, Рамильниң Румынияға берип-қайтишиға Уйғур наһийәсиниң һакими Шөһрәт Нурахунов һамийлиқ қилди. Әң муһими, Рамиль бизниң үмүтимизни йәрдә қоймиди, – деди Рамиль Османовниң наһийәлик Балилар вә өсмүрләр спорт мәктивидики мәшиқләндүргүчиси Нуржан Ахунов зор пәхирлиниш билән. – У техи яш болсиму, чоң утуқларни қолға кәлтүрүп, келәчигидин зор үмүт күткүзүватқан шагиртлиримниң бири. Рамиль һазир Чонҗа йезисидики 5-уйғур оттура мәктивиниң 10-синип оқуғучиси. Униң армрестлинг билән шуғуллинип келиватқиниға бийил төртинчи жил. Ушбу төрт жилниң ичидә у нурғунлиған мусабиқиләрниң ғалиби аталди. Яш чемпионниң келәчәктә буниңдинму егиз чоққиларни беқиндуруп, техи талай медальларниң саһиби атилидиғиниға ишәнчимиз камил.