• Хәйрихаһлиқ
• 06 Қараша, 2019

Бәргән қол соғулмайду

Гөһәрбүви ИСМАЙИЛҖАНОВА «Уйғур авази» Алмута вилайәтлик «Атамекен» тиҗарәтчиләр палатиси Панфилов наһийәлик шөбисиниң әзаси, наһийәлик Тәдбирчан ханим-қизлар кеңишининиң рәиси Сүрийәм Һезимованиң тәшәббуси, наһийә һакими Талғат Өмирәлиевниң қоллап-қувәтлиши билән ишбиләрмән ханим-қизлардин, йәни тиҗарәтчиләрдин тәркип тапқан «Мейірім» карвини наһийәни арилап, йезилардики тапавити төвән, көпбалилиқ, баққучисидин айрилған, нака җанларға хәйрихаһлиқ ярдимини көрсәтти. «Мейірім” карвини акциясиниң биринчи күни Басқунчи йеза округидин башланди. Йеза һакимийитигә кәлгән акция әзалирини округ һакими Хамза Насырбеков күтүвалди. Наһийәлик Ишбиләрмән аяллар кеңишиниң рәиси Сүрийәм Турғанқизи акцияниң мәхситигә тохталди. Наһийәдә кичик вә оттура тиҗарәт билән шуғуллиниватқан тиҗарәтчиләр, дехан егиликлириниң рәислири, шундақла әрләр билән бир сәптә ишләп, өз тиҗаритини риваҗландуруватқан ханим-қизларниму атап өтти. Басқунчи йеза округида ярдәмгә муһтаҗ бәш аилиниң һәрбиригә 30 килограммдин озуқ-түлүк мәһсулатлирини ианә қилди. Ишбиләрмәнләр бу күни шундақла Пәнҗим, Бирлик, Чоң Чиған, Чулуқай йеза округлирида болди. Акция қатнашқучилири у йезиларда ярдәмгә муһтаҗ аилиләргә атиған соғилирини тапшурди. Акция давамида Сүрийәм Һезимова башлиған топ Яшкәнт, Чулуқай, Көктал, Айдарли, Қоңурөлән, Әулеғаш, Учарал йеза округлири билән Яркәнт шәһәрлик һакимийәттә болуп, җәми 69 адәмгә халисанә ярдимини көрсәтти. Панфилов наһийәси.