• Спорт
• 13 Қараша, 2019

Вилайәтлик чемпионат Ишиктидә өтти

Рашидәм РӘҺМАНОВА, «Уйғур авази» Йеқинда Әмгәкчиқазақ наһийәлик спорт-сағламлаштуруш комплексида җумһурийәтлик вә хәлиқара турнирларға спортчиларни тәйярлаш вә таллавелиш, яшларни һәрбий сәпкә вә мәхсус оқуш орунлириға тәйярлаш, шуниң билән биллә уларни вәтәнпәрвәрликкә тәрбийиләш мәхситидә спортниң аммибап җәң түридин Алмута вилайитиниң чемпионати болуп өтти. Униңға спортниң бу түриниң һәрхил стили билән шуғуллинидиған 200гә йеқин яш палван қатнашти. Уни Алмута вилайәтлик аммибап җәң федерациясиниң президенти Ялқунҗан Садиқов уюштуруди. Атап кетиш керәкки, Ялқунҗан Садиқов 1999-жили Әмгәкчиқазақ наһийәлик Ички ишлар башқармиси йенида «Ишиктә самурайлири» спорт клубини тәшкил қилған еди. Кейинирәк клуб «Яш полицейлар» дәп өзгирип, бу йәрдә онлиған яш спортчилар йетилип чиқти. Уларниң бәзилири һоқуқ қоғдаш органлириға ишқа елинип, жуқури унванларға егә болғанлириму бар. Шуниң билән вилайәтлик чемпионатқа 200гә йеқин бала қатнишип, уларға спорт маһири, истипадики полковник Владимир Климов, ҚҖгә әмгиги сиңгән мәшиқләндүргүчи Имид Тохтасун, Қазақстан чемпиони Бауржан Баймухаметов, ушу-санда бойичә дуния чемпиони Мәһәмәтҗан Қурбанов кикбоксинг бойичә дуния чемпиони Имәрҗан Идиллаев, аммибап җәң бойичә дуния чемпионлири Расул Илиясов, Рәһим Айтахунов вә Ризайдин Райдин өз баһасини бәрди. Бу турнирда Әмгәкчиқазақ наһийәсиниң спортчилири 14 алтун, 10 күмүч вә 9 бронза медалини йеңивалди. Чемпионатта ғалип чиққан яш спортчилар Россияниң Анаппа шәһиридә өтидиған дуния чемпионатиға йолланма алди. СҮРӘТЛӘРДӘ: 1. Яш чемпион Кентал Исламов. 2. Я.Садиқов шагиртлири билән. Әмгәкчиқазақ наһийәси.