• Йеңилиқлар
• 20 Қараша, 2019

Хәлиқниң турмуш-тирикчилиги билән тонушти

Дөләт рәһбири Қасым-Жомарт Тоқаевниң «Конструктив җәмийәтлик диалог – Қазақстанниң турақлиқлиғи вә гүллинишиниң асаси» Мәктүбидә жүкләнгән вәзипиләрниң әмәлгә ешиш йоллирини чүшәндүрүш мәхситидә Алмута вилайитигә Премьер-Министрниң орунбасари Бердибек Сапарбаев башлиған Һөкүмәт делегацияси кәлди. Талдиқорған шәһириниң вә Көксу наһийәсиниң турғунлири билән баш қошқан Һөкүмәт башлиғиниң орунбасариға көпчилик өзлирини ойландуруп жүргән соаллири билән мураҗиәт қилди. Мәсилән, тәвә турғунлирини адреслиқ иҗтимаий ярдәмни бәлгүләшниң йеңи үлгилири, мәҗбурий медицинилиқ ғәмсизләндүрүш, дора-дәрмәк билән тәминләш вә уларниң баһаси, җәмийәтлик тәртип, билим бериш вә саламәтликни сақлаш саһасида йешилмәй келиватқан мәсилиләр ойландуридекән. Вице-премьер Мәктүп бойичә өз пикирлирини изһар қилип, қоюлған соалларға җавап бәрди. – Дөләт хәлиқ алдидики вәзипилирини толуғи билән орунлаватиду, –деди вице-премьер. – Айлиқ мааш, ярдәм пул, пенсия пули вақтида бериливатиду. Көпбалилиқ аилиләрни қоллап-қувәтләш мәхситидә 257 миллиард тәңгә мәбләғ бөлүнди. Несийәләрниң җәриманини төләш үчүн 147 мллиард тәңгә қараштурулди. Медицина саһасиға келидиған болсақ, уни тәрәққий әткүзүш мәхситидә дөләтлик программа тәйярланди. Бәш жилниң ичидә барлиқ йезиларда медицинилиқ ярдәм көрситидиған бөлүмчиләр ишқа қошулиду. Буниңдин кейин дора-дәрмәкләрниң баһасиму барлиқ җайда бирхил болиду. Яшлар арисида сағлам һаят тәризини тәшвиқат қилиш үчүн, наһийә вә вилайәт мәркәзлиригә спорт комплекслирини селиш қолға елинди. Йезиларда болса, дәм елиш күнлири мәктәптики спорт заллирини иҗаригә бериш ойлаштурулиду. Сәпәр давамида Һөкүмәт башлиғиниң орунбасари Талдиқорған шәһиридә туридиған көпбалилиқ Қалабаевлар аилисиниң босуғисиға қәдәм тәшрип қилип, уларниң турмуш-тирикчилиги билән тонушти. Бу йәрдә сөз новитини алған Алмута вилайитиниң һакими Амандық Баталов вилайәт даирисидә ярдәмгә муһтаҗ көпбалилиқ аилиләргә көрситиливатқан ғәмхорлуқларни тилға алди. Вилайәт һакими меһманларни шәһәрниң сиртиға селиниватқан коттедж шәһәрчисини арилап көрүшкә тәклип қилди. Бу йәрдә турмуши төвән 100 аилә орунлаштурулупту. Шундақла сәпәр давамида Һөкүмәт делегацияси Талдиқорғандики яшлар мәркизидә, бирқанчә мәктәп вә ағриқханиларда болуп, учришишларни өткүзди. Балпық би кенти вә Мәмбет йезилирини арилап, хәлиқниң турмуш-тирикчилиги билән тонушти.