• Мәрипәт беғиниң бағвәнлири
• 27 Қараша, 2019

Муәллимләр сулалиси

Бу мақалимизда биз пәқәт, Чонҗа йезисидила әмәс, бәлки Уйғур наһийәсидә аброй-инавәтлик, үлгилик аилиләрниң бири болған Мәңсүровлар аилиси һәққидә тохталмақчимиз. Аз күнләрдә өй-очақлиқ болғиниға 50 жил толидиған Худавәди Мәңсүров билән Хасийәтхан Мәңсүровалар «Алтун тойини» нишанлимақчи. Сабирәм ӘНВӘРОВА, «Уйғур авази» Бир қизиғи, бу аилини «муәллимләр сулалиси» дәп атисақму болиду. Чүнки Худавәди вә Хасийәтхан Мәңсүровалар һәм уларниң пәрзәнтлириниңму таллиған кәспи бир. Уйғур наһийәсиниң Пәхрий граждини Худавәди Мәңсүровни хәлиқ убдан тонуйду. Чүнки у узақ жиллар мабайнида муәллим болуп ишләп, һөрмәтлик дәм елишқа чиққан пешқәдәм устаз. Худавәди ака әмгәк паалийитини 1967-жили Чоң Дехан сәккиз жиллиқ мәктивидә башлиди, андин 1985-жилдин 1993-жилғичә наһийәлик билим бөлүмидә методист, инспектор-методист хизмәтлирини атқуриду. Билимгә болған хаһиши үстүн келип, иштин қол үзмәй ҚазПИни тамамлайду. 1993 –1999-жиллири Баһар йезисида А.Розибақиев намидики оттура мәктәпниң мудири, андин 1999 – 2010-жиллири мәзкүр мәктәптә уйғур тили вә әдәбияти пәнлиридин дәрис берип, һөрмәтлик дәм елишқа чиқиду. Һазир у Уйғур наһийәлик «Қарадала тынысы – Қарадала нәпәси» гезитиниң хадими. «Ана – өйниң чириғи» демәкчи, дунияға икки қиз, бир оғул елип кәлгән Хасийәтхан аниниңму маарип саһасиға көп әҗри сиңгән. У пүткүл аңлиқ һаятини бала тәрбийисигә беғишлиған илғар мәрипәтчи. Өзиниң 40 жилдин ошуқ иш-паалийитидә көплигән шагиртларни билим булиғи билән суғарған Хасийәтхан Мәңсүрова, хусусән, мәрипәт саһасида уйғур башланғуч синиплири үчүн, ениғирақ қилип ейтсақ, 6 яшлиқларни оқутуш дәвридики ислаһатта уйғур синиплири үчүн математика вә оқуш пәнлири үчүн программа түзүп, униң оқутулуш җәрияни бойичә методикилиқ қолланмиларни язған. Шундақла «6 яшлиқларни оқутуш» намлиқ иш-тәҗрибисигә беғишланған китапчиниң вә 1 — 4-синипларға беғишланған «Диктантлар топлиминиң» муәллипи. Педагогниң миннәтсиз әмгиги мунасип баһалинип, «Методист-устаз» вә «Қазақстан маарип әлачиси» пәхрий намлириға муйәссәр болуп, Билим министрлигиниң Һөрмәт грамотиси вә нурғунлиған маддий вә мәнивий мукапатларға егә болған. Худавәди вә Хасийәтхан Мәңсүровларни бүгүнки күндә көплигән адәмләр «Устазларниң устази» дәп тилға алиду. Мана мошундақ алийҗанап инсанларниң пәрзәнтлириму ата-ана изини бесип кәлмәктә. Чоң қизи Гүлчеһрә Мәңсүрова мәктәпни «Күмүч медальға» тамамлиғандин кейин, Абай намидики АДУниң химия-биология факультетини әла баһалар билән тамамлиди. Һазир 4-Чонҗа оттура мәктивидә химия пәнидин дәрис бериду. Гүлчеһрә һәдиниң йәткән утуқлириму аз әмәс. Җүмлидин 2015-жили «Қазақстан Ұстазы» җәмийәтлик бирләшмисиниң ІІ дәриҗилик медали билән мукапатланған. Йәнә бир қизи Гүлвира Мәңсүрова оттура мәктәпни «Алтун бәлгүгә» пүтирип, АДУниң филология вә тарих факультетини тамамлиди. Бүгүнки күндә у И.Бәхтия намидики 3-Чонҗа уйғур оттура мәктивидә илмий мудир. Тәкитләш лазимки, өткән жили у «Ы.Алтынсарин» намидики медальниң саһиби аталди. Оғли Нурмәһәмәт Мәңсүров спорт-туризм академиясидә тәһсил көргән. Кейин һәрбий офицерларни тәйярлайдиған қисқа муддәтлик институтта билим алған. У елимизниң көплигән һәрбий қисимлирида хизмәт қилди, һазир подполковник унвани билән Алмута һәрбий чегара башқармиси Шәрқий һәрбий чегара региони бойичә тәнтәрбийә вә спорт бөлүмини башқуриду. Пәрзәнтлириниң утуғи – ата-аниниң махтиниши әмәсму! Балилирини алий билим дәргаһлирида оқутуп, җәмийәткә ярамлиқ инсанлардин болуп йетилип чиқиши үчүн аянмай әмгәк қилған мөтивәрләр бүгүн җапасиға чушлуқ һалавитини көрүп, нәврә-чәврилири билән һаләк. Нәврилиридин Меһринса мәктәпни «Алтун бәлгүгә» тамамлап, С.Асфендияров намидики Қазақ миллий медицина университетида тәһсил көрүватиду. Йәнә бир нәвриси Батурҗан дәл шу билим дәргаһиниң 5-курс студенти. Нәвриси Қутлуқҗан Алмута автомеханика вә жүк тошуш колледжида оқуватиду. Алтә нәвриниң бова-момиси аталған қәдирданлар үчүн буниңдин ошуқ бәхит болмиса керәк. Мәңсүровлар аилиси, һәқиқәтәнму, кимгила болсун үлгә қилип көрсәткидәк аилиләрдин. Гәп уларниң хизмәт йолидила әмәс, бәлки алий инсаний хисләтлири, жут билән болған мунасивитигиму бағлиқтур, әлвәттә.