• Йеңилиқлар
• 27 Қараша, 2019

Жуқури җавапкәрликни тәләп қилиду

Nur Otan партиясиниң Лидери Нурсултан Назарбаев сәясий тәшкилатниң регионлуқ шөбилириниң вәкиллири билән кеңәшмә өткүзди. Кеңәшмигә Парламент Мәҗлисидики Nur Otan фракциясиниң депутатлири, мәслиһәтләрдики фракцияләрниң катиплири вә рәһбәрлири, сәясий бирләшминиң пүткүл мәмликәттики шөбилириниң вәкиллири қатнашти. Учришиш давамида партия Рәисиниң биринчи орунбасари Бауыржан Байбек вә регионлардин кәлгән айрим партия вәкиллириниң докладлири тиңшалди. Елбасы натиқларни тиңшап болғандин кейин Nur Otanниң шәкиллинишигә вә тәрәққий етишигә һәссә қошқан барлиқ партия әзалириниң әмгигигә жуқури баһа бәрди. – Nur Otan партияси җәмийәттики хилму-хил мәсилилиләрни диққәт нәзәридә тутиду. Биз – Қазақстанниң барлиқ хәлқиниң партияси вә реал ишлар, мәмликәтниң келәчиги үчүн җавапкәр партия. Биз Қазақстанниң тәрәққиятини ениқ тәсәввур қилимиз, ениқ стратегия вә иш планлири тәстиқләнди, зөрүр ресурслар көздә тутулди, – дәп тәкитлиди Нурсултан Назарбаев. Партия рәиси шундақла җәмийәтниң Қазақстан Президенти Қасым-Жомарт Тоқаев әтрапиға җипсилишишиниң вә Дөләт рәһбири қойған вәзипиләрни әмәлгә ашуруш чарилирини көрүшниң муһим екәнлигини атап көрсәтти. – Бийил мән Президент вакалитини сақит қилиш қарариға кәлдим. Мән Президентлиққа намзат сүпитидә Қасым-Жомарт Тоқаевни тәклип қилдим вә Nur Otan партияси өз қурултийида уни қоллап-қувәтлиди. Әнди мән, партия Рәиси сүпитидә, вә биз һәммимиз, униң әзалири сүпитидә йеңи Президентни қоллап-қувәтлишимиз керәк, у өзиниң инаугурация нутқида варислиқни, йәни биз әмәлгә ашуруватқан ишларни давамлаштуруш керәклигини биринчи болуп тилға алди. Бу наһайити муһим, – дәп тәкитлиди Нурсултан Назарбаев. Бу жил Nur Otan үчүн юбилейлиқ жил – партиягә 20 жил толди. Елбасы өз сөзидә бүгүнки таңда тоққуз миңға йеқин адәмни бирләштүрүп, пүткүл җумһурийәтниң конструктив күчлирини дөләт үчүн муһим мәсилиләрни әмәлгә ашурушқа җипсилаштурушқа интиливатқан, мәмликәтниң баш сәясий күчигә айланған қурулум ишиниң қандақ башланғанлиғини әслитип өтти. Нурсултан Назарбаев Қазақстанниң мустәқиллик жиллирида қолға кәлтүргән утуқлириға тәпсилий тохтилип, барлиқ утуқ-муваппәқийәтләрниң партия вә униң әзалириниң күндилик иши билән беваситә бағлиқ екәнлигини атап көрсәтти. Елбасы Һөкүмәтниң ихтисатниң айрим секторлирини техиму тәрәққий әткүзүш планлириға алаһидә тохталди. – Һөкүмәт регионларни қоллап-қувәтләшкә, болупму йезиларни қоллап-қувәтләшкә, йеңи иш орунлирини вуҗутқа кәлтүрүшкә вә иҗтимаий мәсилиләрни һәл қилишқа қаритилған программиларни қобул қилди. Мәсилән, 2026-жилға қәдәр йезиларни қоллап-қувәтләш үчүн 2 триллион тәңгигә йеқин мәбләғ бөлүш көздә тутулди. Йеқинқи үч жилда аһалини таза ичидиған су билән тәминләш үчүн 560 миллиард тәңгә бөлүниду. Әгәр уни орунлашқа ениқ назарәт орнитилса, 2023-жилниң ахириға қәдәр барлиқ йезилар таза ичидиған су билән тәминлинидиған болиду, – деди партия Рәиси. Нурсултан Назарбаев Nur Otanниң хәлиқ вә һакимийәт оттурисидики бағлаштурғучи һалқа екәнлигини йәнә бир қетим тәкитлиди. Партия һакимийәт орунлириға йәткүзүш вә шулар билән бирлишип һәл қилиш үчүн һәрбир авулниң, аилиниң, адәмниң проблемисини ениқ билиши керәк. Кеңәшмә давамида Қазақстанниң Тунҗа Президенти партияниң җайлардики нәтиҗидарлиқ ишини техиму ашурушниң бирқатар йөнилишлирини атап көрсәтти. – Биз һәрбир һакимниң вә мәслиһәтләрдики фракция депутатлириниң партиявий җавапкәрлигини түп-асасидин күчәйтишимиз керәк. Һазир барлиқ ислаһатлар регионларни тәрәққий әткүзүшкә қаритилди. Мәсилән, пәқәт кейинки 10 жилдила йәрлик бюджетлар 3 һәссигә йеқин өсүп, 4,7 триллион тәңгини тәшкил қилди. Бөлүнүватқан мәбләғниң хәшлиниши үстидин ениқ партиявий назарәтни тәминләш муһим. Униңдин ташқири барлиқ мәслиһәтләр депутатлириниң ишини техиму яхшилаш вә мәртивисини күчәйтиш чарилирини көрүш керәк, – деди Нурсултан Назарбаев. Nur Otan партиясиниң Рәиси униңдин ташқири һәрбир регион, шәһәр вә наһийә бойичә сайлам алдидики программиларниң тәйярлинишини тәминләшни тапшурди. – Келәр жили территорияләрни тәрәққий әткүзүш бойичә бәш жиллиқ програмиларни әмәлгә ашуруш аяқлишиду. Йеңи программиларни қобул қилиш зөрүрийити йеңи электорал мәвсүмгә тоғра келиватиду. Шуңлашқа йеңи программилар партияниң һәрбир регион бойичә мәслиһәтләр сайлимиға сайлам алдидики программисиниң асаси болуши керәк. Nur Otan партиясиниң Мәҗлис сайлимиға болған сайлам алдидики программисиға кәлсәк, Премьер-министр Сәясий кеңәш Бюросиниң әзаси сүпитидә шәхсән мошу ишни башқуруши вә һазирниң өзидила шу программини тәйярлашқа киришиши керәк, – дәп атап көрсәтти Тунҗа Президент. Елбасы шундақла сүпәтлик партиявий тизимни шәкилләндүрүш үчүн очуқ ички партиявий таллавелишни жүргүзүшниң муһим екәнлигини тәкитлиди. – Һәрбир мәслиһәткә болған сайлам алдидики партиявий тизимларға киргүзүлгәнләрниң кам дегәндә 30 пайизи 35 яшқичә болған ханим-қизлар вә 20 пайизи жигитләр болуши керәк. Шундақла тизимларға аһалиниң түрлүк қатламлириниң вәкиллири, Вәтәнгә қайтип кәлгән вәтәндашлар, алаһидә тәләпкә егә адәмләр, тиҗарәтчиләр вә аммивий әхбарат васитилириниң вәкиллири киргүзүлүши лазим, – деди Нурсултан Назарбаев. Нурсултан Назарбаев сөзиниң ахирида сайлам алдидики вақитта партияниң ишини күчәйтишниң муһим екәнлигини йәнә бир қетим тәкитлиди. – Биз барлиқ ресурсларни ғалибийәтни қолға кәлтүрүшкә қаритишимиз керәк. Февраль ейида партияниң қурултийи өткүзүлиду. Униңда биз партия ишини йеңилашниң алдин-ала йәкүнлирини чиқиримиз вә келәчәктики электорал вәзипиләрни тәпсилий муһакимә қилимиз. Һазир Jas Otan дөләт органлири билән бирликтә 2025-жилғичә бәлгүләнгән йеңи “Жастар – Отанға” программисини тәйярлаватиду. Униңда һазирқи яшларниң барлиқ соаллириға җаваплар әкис әттүрүлиду. Апрельда йеңи программини Jas Otanниң қурултийиға тәвсийә қилиш керәк. Тунҗа Президент шундақла 2020-жили мәмликитимизниң Конституцияниң вә Қазақстан хәлқи Ассамблеясиниң 25 жиллиғини нишанлайдиғанлиғини, Мустәқилликниң 30 жиллиғини мәйрәмләшкә тәйярлиқни башлайдиғанлиғини әслитип өтти. Буниңда у мәзкүр сәнәләрниң җәмийәтни җипсилаштуруш, мәмликәт вә униң муваппәқийәтлири үчүн пәхирлиниш туйғусини ашуруш иқтидариға егә екәнлигини, шуниң үчүн уни үнүмлүк пайдилиниш керәклигини атап көрсәтти. Ахирида Елбасы Nur Otanниң шәкиллинишигә һәм тәрәққий етишигә чоң һәссә қошқан партияниң паалийәтчан әзалирини “Белсенді қызметі үшін” медали билән мукапатлиди.