• Йеңилиқлар
• 27 Қараша, 2019

Өзара мунасивәт техиму күчийиду

Өткән һәптиниң ахирида Дөләт рәһбири Қасым-Жомарт Тоқаев Нур-Султанда Швейцария Конфедерациясиниң Президенти – малийә министри Ули Маурер билән учрашти. Президентлар тар вә кәңәйтилгән тәркипләрдә музакириләрни жүргүзди, шундақла журналистлар үчүн мәтбуат конференциясини өткүзди. Қасым-Жомарт Тоқаевниң музакириләр давамида тәкитлишичә, Қазақстан Швейцарияни Европа қитъәсидики әң муһим шерикләрниң бири сүпитидә етирап қилиду. – Биздә барлиқ, болупму ихтисат саһалирида яхши һәмкарлиқ әнъәниси қелиплашти. Швейцария Қазақстан ихтисадиниң асасий сода шериклириниң вә инвесторлириниң бири болуп һесаплиниду, – дәп тәкитлиди Қазақстан Президенти. Ули Маурер Қасым-Жомарт Тоқаевқа сәмимий қобул қилғанлиғи үчүн миннәтдарлиқ билдүрди вә өз мәмликитиниңму Қазақстанни наһайити муһим шерик дәп һесаплайдиғанлиғини тәкитлиди. Кәңәйтилгән тәркиптә өткән музакириләрдә Қасым-Жомарт Тоқаев Қазақстан вә Швейцарияниң иккитәрәплимә алақилириниң муһим әһмийәткә егә екәнлигини тәкитлиди. – Сизниң сәпириңизниң дөләтлиримиз оттурисидики һәмкарлиқни тәрәққий әткүзүштә чоң сәһипә болидиғанлиғиға ишәнчә билдүримән. Бу һәмкарлиқ барғансири күчийиватиду. Биз һәм сәясий, һәм ихтисадий саһаларда өзара пайдилиқ алақиларни сақлаш үчүн барлиқ күчимизни сәрип қилимиз, – деди Қасым-Жомарт Тоқаев. Дөләт рәһбири Тунҗа Президент – Елбасы Нурсултан Назарбаевниң Қазақстан-Швейцария мунасивәтлирини мустәһкәмләшкә чоң һәссә қошқанлиғини тәкитлиди вә Тунҗа Президент асасини салған шериклик әнъәнисиниң давамлишидиғанлиғиға ишәндүрди. – Биз бүгүн хәлиқара өзара һәрикәтниң муһим мәсилилирини муһакимә қилдуқ, хәлиқара күн тәртивиниң асасий проблемилири бойичә дөләтлиримиз мәвқәсиниң охшаш екәнлигини тилға алдуқ. Биз Швейцарияни муһим шерик дәп билимиз. Шуңлашқа һәмкарлиғимизни күчәйтишниң зөрүр екәнлиги тоғрилиқ гәп қилимиз, – деди Қазақстан Президенти. Ули Маурер өз новитидә Қазақстанниң регионда сәясий вә ихтисадий алақиларни тәрәққий әткүзүштә муһим роль ойнайдиғанлиғини атап көрсәтти. – Һәм сәясий, һәм ихтисадий нуқтәий нәзәридин барлиқ мунасивәтләрдә Қазақстан биз үчүн Азия вә Европа оттурисидики көрүк болуп һесаплиниду. Силәрниң мәмликитиңлар дунияда, хәлиқара бирләшмидә чоң роль ойнайду. Биз Қазақстан охшаш Азия вә Европа оттурисидики мунасивәтләрни сәмимий һәм очуқ уттур муһакимә қилалайдиған вә қитъәләр оттурисида өзара чүшәнчини тәминләшкә, ихтисадий мунасивәтләрни мустәһкәмләшкә бирлишип һәссә қошидиған шеригимизниң бар екәнлигидин наһайити хурсәнмиз, – деди Швейцария Президенти. Музакириләр давамида сода-ихтисадий вә инвестициялик һәмкарлиқни җанландуруш, түрлүк саһалар бирләшкән лайиһиләрни әмәлгә ашуруш, малийә хизмитини атқуруш секторида өзара һәрикәт қилиш мәсилилири көтирилди. Андин кейин Қасым-Жомарт Тоқаев билән Ули Маурер сәпәр йәкүни бойичә журналистлар үчүн мәтбуат конференциясини өткүзди. *** Тунҗа Президент – Елбасы Нурсултан Назарбаев Швейцария Президенти Ули Маурер билән учрашти. Учришиш давамида Елбасы мустәқиллик жиллирида Қазақстан вә Швейцария оттурисида ихтисатниң түрлүк саһалирида яхши мунасивәтләрниң қелиплашқанлиғини тәкитлиди. Ули Маурер өз новитидә Нурсултан Назарбаевқа учрашқанлиғи үчүн миннәтдарлиқ билдүрди вә Қазақстанға қилған рәсмий сәпиридин алған тәсиратлири билән ортақлашти.