• Асасий мақалилар
• 27 Қараша, 2019

Әл Пәхри

Тунҗа Президент күни – қазақстанлиқларниң инавәтлик мәйрими. Бу –интайин әһмийәтлик тарихий күн, барчә вәтәндашлиримизниң Милләт Лидериниң әтрапиға топлишидиған күни. Шәмшидин АЮПОВ, «Уйғур авази» «Әр йоқ болса, әл – житим, ели баһалимиса, әр – житим», дәйду хәлиқ даналиғи. Шүкри, биздә елини өргә йетәкләйдиған әрму, пәрзәндини иззәтләйдиған әлму бар. Мәлумки, бийил Вәтинимиз сәккизинчи қетим дөләт мәйрими Тунҗа Президент күнини нишанлайду. Президентлиқ һакимийәт билән мустәқилликниң 28 жиллиқ тәҗрибиси Қазақстан үчүн ушбу башқуруш шәклиниң нәтиҗидарлиқ екәнлигини дәлилләп, ички вә ташқи сәясәтниң асасий йөнилишлирини ениқлашқа мүмкинчилик бәрди. Милләт Лидериниң дана сәясити түпәйли, Қазақстан Мәркизий Азия билән МДҺда алдинқи орунға чиқти. Иҗтимаий-программилиқ ихтисадий йөнилиштики тәшәббуслар заманивий, сүръәтлик тәрәққий қилғучи дөләт қурушни тәминлиди. Буниңдин 22 жил муқәддәм елимизниң Тунҗа Президенти – Елбасы Нурсултан Назарбаев әл тәрәққиятиниң дағдам йолини көрситип беридиған узақ муддәтлик «Қазақстан – 2030» Стратегиялик программисини тәвсийә қилғини мәлум. Мәзкүр һөҗҗәттә өткән күнләр тәриплинип, келәчәктә атқурулидиған изгү ишларниң плани түзүлди. 1997-жили ушбу программини елан қилғанда, Елбасы: «Биз немини қурғумиз келиду, көзлигән мәхситимизгә йәткүзидиған тәрәққиятимизниң траекторияси, магистрали қандақ болуши тегиш, уни ениқ билишимиз вә рошән һис қилишимиз керәк», дегән еди. Ейтқини орунланди. Қазақстан хәлқи шиҗаәтлик әмгәк қилип, елимизниң иҗтимаий-ихтисадий тәрәққияти сүръәтлик илгирилимәктә. Пурсити кәлгәчкә тәкитләш лазимки, елимизниң пайтәхтидә болуп өткән Nur Otan партиясиниң новәттин ташқири ХIХ қурултийида партия рәиси Нурсултан Назарбаев Президент сайлимиға Қасым-Жомарт Тоқаевниң чүшидиғанлиғини ейтқан еди. Қасым-Жомарт Тоқаев 2019-жили 20-мартта Қазақстан Президенти лавазимини егиләп, униңдин бир күн илгири Елбасы Нурсултан Назарбаев Президентлиқ вакалитини тохтатқан еди. Бу – даналиқла әмәс, зор ишәнчә! 2019-жили 2-сентябрьдә Қазақстан Президенти Қасым-Жомарт Тоқаев Парламент палатилириниң бирләшкән олтиришида «Конструктив жәмийәтлик диалог – Қазақстанниң турақлиқлиғи вә гүллинишиниң асаси» намлиқ Қазақстан хәлқигә Мәктүбини йоллиди. – Келәчәк йөнилишини, маңидиған йолини, өсүш йолидики мәхситини ениқ билгән мәмликәтләрниң қандақ утуқ-муваппәқийәтләргә еришкәнлигини тарихтин яхши билимиз. Елимиз мустәқилликкә әндила қол йәткүзүватқанда кәлгүсидики 30 жилини ойлиса, әнди қәддини руслиғанда жиддий мәхсәтләрни алға сүрди. Җиддий мәхсәтләр – хәлиқниң әһвали, җиддий мәхсәтләр – әлниң йүксилиши. Җиддий мәхсәтләр – паравән һаят. Биз буниңға Елбасы сәяситиниң уйғунлуғини сақлап, системилиқ ислаһатлар жүргүзүш арқилиқ қол йәткүзәләймиз. Өзәңларға мәлумки, мошуниң һәммиси мениң сайлам алдидики программамға асас болди. Һазир дөләт органлири уни әмәлгә ашуруш үчүн һаҗәт ишларни әмәлгә ашурмақта. Мән хәлиққә бәргән вәдилиримни җәзмән орунлаймән, – деди Президент Қасым-Жомарт Тоқаев. Елбасы – Қазақстанниң миллий бехәтәрлиги билән регион бехәтәрлигини мустәһкәмләшкә алаһидә әһмийәт берип келиватқан мәшһур шәхс. Буниң ениқ көрүнүши – Коллективлиқ бехәтәрлик тоғрилиқ шәртнамә тәшкилатиниң вакаләтлик органлириға Қазақстанниң рәислик қилиши. Мошундақ изгү башланмиларға тәшәббускар болған Елбасыни сәясий экспертлар «евразиялик интеграцияниң патриархи» дәп жуқури баһалиди. Қазақстанниң Ислам һәмкарлиқ тәшкилатиға рәислик қилиши – ушбу утуқниң қануний давами. Тәшкилатқа әза болғандин буян 57 дөләтниң ичидә умумий ички мәһсулатниң дәриҗиси җәһитидин Қазақстан 12-орунға көтирилди. Әл қәдирлигән, дуния мәдһийилигән Елбасы Нурсултан Назарбаев бар күч-ғәйритини, әқил-параситини елимизниң пайдиси үчүн сәрип қилип, вақит көчидин алға озуп, кәлгүси әвлатқа парлақ һаятниң асасини селип жүргинини хәлиқара дәриҗидики экспертлар билән сәясәтшунаслар йезип-баһалап келиватиду. Нурсултан Назарбаев 1992-жили декабрь ейида болуп өткән Қазақстан хәлқи форумида елимиздики бирлик билән разимәнликниң капалити – Қазақстан хәлқи Ассамблеясини қуруш тоғрилиқ тәшәббус көтәрди. Бүгүнки күндә Ассамблея паалийити Елбасы ишәнчә-үмүтини ақлиғанлиғини елимиздики бәрикә-бирликтин көрүниду. Һәрбир еләт вәкиллири бир өйниң балисидәк тирикчилик қилип, бәрпакарлиқ байриғини көккә көтәрди. Бу турғудин елип қариғанда, ушбу назук саһани илмий-методикилиқ җәһәттин қоллап-қувәтләш үчүн җумһурийәттә дәсләпки қетим мәхсус кафедра Евразия миллий университетида ечилди. Һазир җумһурийәт бойичә мошундақ кафедриларниң сани 30ға йәтти. ҚХА кафедрилири бирлик билән паравәнликни тәһлил қилидиған илмий-әмәлий мәйданиға айланди. Елбасыниң «Умумға ортақ әмгәк җәмийитигә қарап 20 қәдәм», «Келәчәккә нишан: мәнивий йеңилиниш» намлиқ программилиқ мақалилири – түнүгүнму, бүгүнму һәм кәлгүсидиму әһмийитини йоқатмайдиған чоң концепция. Тунҗа Президентимиз әмгәк арқилиқ нәтиҗигә қол йәткүзүшниң йолини, системисини көрсәтти. Мәсилән, мошуниңдин вуҗутқа кәлгән «Иш билән тәминләшниң йол хәритиси – 2020» программиси, униң бәш жилға узартилиши, «Иҗтимаий бәш тәшәббус» хәлиққә беридиғини чәксиз дәп билимиз. «Улуқ Даланиң йәттә қири» намлиқ мақалә – миллий аброй-инавәтни көрситидиған, милләтни үлгә-нәмунә пәллисигә башлайдиған йол, йеңиланған Қазақстанниң ярқин қиблинамиси. Елбасыниң мәзкүр мақалисини стратегиялик әһмийити бар вә илмий-методологиялик мақалә дәп чүшинишимиз керәк. Бу тәсадипи йезилған мақалә әмәс. Бу – Елбасыниң системилиқ, мәхсәтлик хизмитиниң давами. Чүнки буниңдин илгири Милләт Лидери «Мәдәний мирас» программисини тәвсийә қилған еди. Шуниңдин кейин «Хәлиқ: тарих еқимида», «Келәчәккә нишан: мәнивий йеңилиниш» программиси тәвсийә қилинди. Мана мошундақ система билән келиватқан программа. Шуңлашқиму Елбасыниң мәзкүр әмгигини мошу чоң ишниң давами дәп билишимиз керәк. Йәкүнләп ейтқанда, Нурсултан Назарбаев – Қазақстан хәлқи үчүн күн-түн демәй хизмәт қилған, йүксәк пәллигә абройи билән йәткән бәрпакар шәхс. Бу пикирни хәлиқара дәриҗидики экспертлар қәйт қилиду, биз униң билән әлвәттә, пәхирлинимиз.