• Әхбаратлар еқими
• 04 Желтоқсан, 2019

Наһийәдә – йеңи баш жигитбеши

Бүгүн жигитбешисиз өзимизгә тәәллуқ һечбир иш әмәлгә ашмайду. Улар өзлири истиқамәт қиливатқан мәһәллиләрдә, жутдашлар алдида өз зиммисигә жүкләнгән шәрәплик ишларға жуқури җавапкәрлик, жуқури мәсъулийәт билән қарап, паалийитини қәдәмму-қәдәм җанландурмақта. Жигитбашлири наһийәлик Уйғур этномәдәнийәт мәркизи тәркивидә җанпидалиқ билән иш елип берип, жил бешидин түзүлгән планлириға мувапиқ паалийәт елип бериватқанлиғиниму тәкитләш орунлуқ. Гөһәрбүви ИСМАЙИЛҖАНОВА, «Уйғур авази» Улар елимизниң Тунҗа Президенти – Елбасы Нурсултан Назарбаевниң «Келәчәккә нишан: мәнивий йеңилиниш» намлиқ стратегиялик мақалисидики лайиһиләр асасида туғулған жутини қәдирләп, униң тәрәққиятиға төһписини қошуватқан жутдашларни көпчиликкә тонуштуруш, әзәлдин иҗил-инақ яшап келиватқан көпмилләтлик тәвә турғунлириниң урпи-адәт, рәсим-қаидиләрни сақлап, заманға лайиқ тәрәққий әткүзүш, өсүп келиватқан әвлатни вәтәнпәрлик роһта тәрбийиләш, ана тилимизни сақлап, тәрәққий әткүзүш охшаш лайиһиләр асасида чарә-тәбирләрни уюштурушта тәшәббускарлиқ көрситиватқанлиғи диққәткә сазавәр. Биз бир мақалида уларниң көпқирлиқ паалийитини йорутуп, атап өтәлмәймиз, әлвәттә. Шундиму ахирқи вақитларда улар тәшәббускарлиқ көрситиватқан ишлар аз әмәс. Болупму көпмилләтлик тәвә турғунлириниң достлуғи билән өмлүгини мустәһкәмләп, уни риваҗландурушта, миллий маарип, мәтбуат, сәнъәт, спорт саһалириниң тәрәққиятиға биркишилик һәссилирини қошуватқанлиғини ейтишниң өзи купайә. Мана шундақ ишларда башламчи болуватқан яркәнтлик жигитбашлири йеқинда өзара баш қошти. Наһийәлик Уйғур этномәдәнийәт мәркизидә болуп өткән баш қошушта сөзгә чиққан мәдәнийәт мәркизиниң рәиси Ризайдин Әйсаев Панфилов наһийәсиниң мәдәний, иҗтимаий-ихтисадий тәрәққиятиға биркишилик һәссисини қошуватқан жигитбашлириниң тинимсиз әмгигини атап өтти. Бебаһа, миннәтсиз хизмитигә утуқ тилиди. Андин наһийәдә узун жиллар баш жигитбеши болуп ишлигән Азат Искәндәровниң саламәтлигигә бола җәмийәтлик, жутдарчилиқ ишларға қатнишалмайватқанлиғини ейтип, униң илтимасиға бенаән, орниға узун жиллар Яркәнт шәһиридики Җапар мәһәллисиниң жигитбеши болуп хизмәт қиливатқан, миллий мәдәнийитимизниң җанкөйәри Азатҗан Гайитовниң (сүрәттә оттурида) намзитини көрсәтти. Жиғин қатнашчилири бир еғиздин униң намзитини қоллап-қувәтләп, зор ишәнчә билдүридиғанлиғини тәкитләшти. Яркәнт шәһиридики «Йәттису» мәһәллисиниң жигитбеши Нуруллам Ваҗитов мундақ деди: – Мән Азат инимни көптин бери билимән. У миллий мәдәнийитимизниң һәқиқий җанкөйәри сүпитидә өзиниң сөзини әмәлдә дәлилләп келиватқан жигитләрниң бири. Өзи истиқамәт қиливатқан Җапар мәһәллисиниң турғунлири билән жут мөтивәрлириниң һалидин хәвәр елип, андин бирәр муһим чарә-тәдбирни уюштурушқа киришиду. У миллий мәтбуат, миллий маарип десә, ичиватқан чейини қоюп жут арилайду. Шуниң үчүнму униң мәһәллисиниң турғунлири бирдин-бир рәсмий, җумһурийәтлик җәмийәтлик-сәясий «Уйғур авази» гезитиға толуғи билән муштири болуп, театр қоюлумлиридин қалмайду. Йәнә бир ейтмасқа болмайдиған гәп, у өзиниң кәңдаирилик хәйрихаһлиқ паалийити билән көзгә чүшкән жигитбеши. Ахирқи төрт-бәш жил давамида Панфилов наһийәлик иш билән тәминләш вә иҗтимаий программилар бөлүми билән бирликтә наһийәдики туғулушидин нака балилар билән ярдәмгә муһтаҗ аилиләргә қолидин келишичә ярдәм көрситип келиватиду. Әнди шәһәрдики Хелил Һәмраев намидики уйғур оттура мәктивиниң васийлиқ кеңишини башқуруп, мәктәп мәмурийити, муәллимләр коллективи билән зич мунасивәттә иш елип бериватиду. Һәқиқитини ейтиш керәкки, жут башқуруш оңай иш әмәс. Болупму, көпчиликниң көңлидин чиқиш интайин қийин иш. Азат болса, мундақ «синақлардин сүрүнмәй» өткән, өзиниң милләтпәрвәрлиги билән көзгә чүшкән жигит. У техи яш. Әндила әлликтин ашти. Биз жигитбашлириниң йеши йәтмиштин ешип, алдимиз сәксәнгә тақап қалдуқ, биз Азатқа ишинимиз. У бу мәсъулийәтлик иштин шәрәп билән чиқиду. Униң үчүн биз йеңи баш жигитбешини һәр қәдәмдә қоллап-қувәтлишимиз керәк. Шу чағдила достлуғимиз, бирлигимиз техиму күчлүк болиду. Әнди бурунқи баш жигитбеши Азат Искәндәров нурғунлиған яхши ишларниң тәшәббускари болди. Биз Азат Искәндәровқа мустәһкәм саламәтлик тиләймиз. Ахирида сөз алған наһийәниң йеңи баш жигитбеши Азатҗан Гайитов, өзигә ишәнчә билдүрүватқан жутдашлириға миннәтдарлиғини билдүрүп, узун жиллардин бери жут башқуруватқан Ғлаждин Бақиев, Нурмәһәмәт Абдуллаев, Нуруллам Ваҗитов, Ташмәһәмәт Мәмләков, Аблеким Қурбанов охшаш башқиму жигитбашлири билән бирликтә көпмилләтлик тәвә хәлқиниң бирлигини, разимәнлигини мустәһкәмләштә бар күч-ғәйритини сәрип қилидиғанлиғини ейтти. Панфилов наһийәси.