• Хәйрихаһлиқ
• 04 Желтоқсан, 2019

Һаҗимниң үлгилик иши

Мәшүр САСИҚОВ, «Уйғур авази» Ата-аниға пәрзәнттин айрилмақ қиямәт демәкчи, дәл мошундақ әһвалға учриған Талғир наһийәси Бесағаш йезисиниң турғуни Нурахун һаҗимниң аилиси кәнҗиси Тельмандин паҗиәлик җуда болғинида, улар үчүн һаят тохтиғандәк билингән еди. Яқ, көпни көргән мөтивәр сәвирликни өзидин башлап, башқа балилириниму шуниңға чақирди. Жутта аброй-инавити жуқури бу аилидә мусибәт йүз бәргәндә, уларниң һалини сорап кәлмигән адәм қалмиди. Әлвәттә, көңүл ейтқанлар бәш-он тәңгисиниму ианә қилип, йезилип кәтти. Буниңдин бираз вақит илгири Нурахун һаҗим әйнә шу пулдин барлиқ пәрзәнтлири билим алған мәлидики 29-оттура мәктәпкә 100 миң тәңгә ианә қилған еди. Оқутуш үч тилда жүргүзүлидиған (қазақ, рус вә уйғур – М.С.) мәктәп мәмурийити бу ахчиға мәҗлисләр залиниң конирап қалған пәрдилирини йеңилавалди. Һәрким пәқәт өзиниң ғеми билән яшаватқан бүгүнки заманда бир мөтивәрниң яхшилиғидин миннәтдар болған мәктәп мудири Назым Сәрсебаева рәһбәрлигидики муәллимләр коллективи йеқинда Нурахун Азиюповларни аилиси шундақла жут активистлиридин жутниң баш жигитбеши Әхмәтҗан Ахмоллаев, йеза мәдәнийәт мәркизиниң рәиси Азат Аблизов вә Талғир наһийәсиниң баш жигитбеши Октябрь Қурбанниязовни тәклип қилип, уйғур тилида оқуватқан оқуғучиларниң қатнишиши билән өткән мәрасимда уларға рәхмитини ейтти. Мәрасимда дәсләп уйғур тили вә әдәбияти пәниниң муәллими Тәлъәт Балинов башқурған 9-синип оқуғучилири әлгә яхшилиқ қилиш билән яшашниң қәдир-қиммити тоғрилиқ мақал-тәмсилләр оқуса, андин тәрбийәвий әһмийити бар бирнәччә сәһнә көрүнүшини намайиш қилди. Андин сөзгә чиққан мәктәп мудири Назым Сәрсебаева Нурахун һаҗимға сәвирлик тиләп, бу хәйрихаһлиқ паалийитиниң башқиларға үлгә болидиғанлиғини тәкитлиди. Мәрасим давамида сөзгә чиққан жут активистлириму Нурахун һаҗимниң Бесағаш жутиниң инавәтлик адәмлириниң бири екәнлигини тилға алди вә Азиюповлар аилисигә жут намидин рәхмәт ейтти. Улар, сөз новити кәлгәндә, мәктәп мудирини җамаәтчилик билән йеқин мунасивәт орнитишқа чақирип, оқуғучиларға қазақстанлиқ уйғурларға яритиливатқан барлиқ шараитлардин толуқ пайдиланған һалда, ана тилини мукәммәл үгинишниң һәм дөләт тили қазақ тилиниму чоңқур билгәнниң һеч зийини йоқ екәнлигини алаһидә қәйт қилди. Ахирида муәллимләр коллективи тәрипидин тәйярланған дәстихан әтрапида мәрһумлар роһиға атап, дуа-тәгбир қилинди. Сүрәттә: Н.Сәрсебаева (оңда) Нурахун һаҗимниң аилисигә миннәтдарлиқ билдүрүватиду.