• Яшлар жили
• 04 Желтоқсан, 2019

Күзлүк STARS

Сабирәм ӘНВӘРОВА, «Уйғур авази» Күз келип, йәр-зиминға рәңму-руң йопурмақлардин гиләм тоқулуп, етиз ашлиққа, бағ-варан йәл-йемишқа толған пәйттә барчә билим дәргаһлирида “Күзлүк бал” кәчлири уюштурулиду. Оқуғучилар бу конкурсни тақәтсизлик билән күтүп, униңға зор қизиқиш билән тәйярлиниду. Шуни етиварға алған наһийәлик Яшлар ресурслиқ мәркизи Чонҗа йезисидики кафе-кинотеатрда өзгичә шәкилдики «Күзлүк STARS» конкурсини уюштурди. Конкурсқа Чонҗа, Баһар, Чарин, Қирғизсай, Ават, Сүмбә йезилиқ округлиридин иштрак қилған топлар қатнишип, төрт басқуч бойичә күч синашти. Конкурсниң мәхсити бир қиз, бир оғулдин тәркип тапқан топларниң ичидики «күз шаһзадиси» билән «күз мәликисини» ениқлап чиқиш болди. Биринчи басқуч «Тонуштуруш», иккинчи басқуч «Өз һүнириңни көрсәт», үчинчи басқуч «Күзлүк вальс» дәп аталса, ахирқи басқучта яшлар слайдқа чүширилгән тәсвирләр арқилиқ һәрхил мавзулар бойичә пикир алмаштурди. Кәч давамида тамашибинлар биләнму һәрхил оюнлар уюштурулуп, актив яшлар баһалиқ соғилар билән мукапатланди. Биринчи басқучта яшлиримиз өзлирини видеоролик һәм шеир арқилиқ тонуштурса, һүнәр басқучида нахша-уссул биләнла чәклинип қалмай, монолог оқуп, алаһидә 3D форматида сүрәт чүширип, қазиларни қайил қилди. Үч саатқа созулған конкурсниң нәтиҗисидә биринчи орун Чонҗа командисиға, иккинчи орун Сүмбә командисиға, үчинчи орун Ават вә Қирғизсай командилириға буйриди. Орун алған топлар диплом вә баһалиқ соғилар билән мукапатланди.