• Әхбаратлар еқими
  • 04 Желтоқсан, 2019

Мәркәз һесават бәрди

Йеқинда Әмгәкчиқазақ наһийәсиниң Қәйнәзәр йези­сидики Мәдәнийәт өйидә наһийәлик Уйғур этномәдәнийәт мәркизиниң һесават жиғини болуп өтти.  Униңға наһийәниң барлиқ жигитбашлири, ақсақаллар, ханим-қизлар вә яшлар кеңәшлириниң рәислири вә әзалири қатнашти. Рашидәм РӘҺМАНОВА, «Уйғур авази» Жиғинни наһийәлик Уйғур этномәдәнийәт мәркизиниң рәиси Сулайман Мәхсүтов ечип, униң мәхситигә тохталди. Андин рәисниң орунбасари, наһийәлик Ханим-қизлар кеңишиниң рәиси Нурбүви Қасимова бир жил бойи әмәлгә ашурулған ишлар һәққидә һесават бәрди. – Әмгәкчиқазақ наһийәлик Уйғур этномәдәнийәт мәркизи жумһурийәтлик Уйғур этномәдәнийәт мәркизи тәркивидә җумһурийәтлик, вилайәтлик вә наһийәлик мәдәний чарә-тәдбирләрдә паалийәтчанлиғи билән көзгә көрүнүп кәлмәктә. Мәсилән, йеқинда Алмута вилайәтлик Қазақстан хәлқи Ассамблеясиниң һәм җумһурийәтлик Уйғур этномәдәнийәт мәркизи Алмута вилайәтлик шөбисиниң уюштуруши билән Талдиқорған шәһиридики «Достлуқ өйидә» «Рухани жаңғыру: тәуелсіз Қазақстанның тарихи ұстанымы» форуми даирисидә өткән Уйғур мәдәнийити фестивалида Байсейит вә Маливай йезилириниң ханим-қизлири жуқури паалийәтчанлиқ тонутуп, наһийәмизниң шәнини егиз көтирип, миллитимизниң қәдрийәтлирини намайиш қилип кәлди. Шуниңға мунасивәтлик мәркәз рәһбәрлиги, җәмийәтлик ишларниң активистлири намидин уларға рәхмитимизни ейтимиз, – деди Нурбүви Мәрүпқизи. Натиқниң тәкитлишичә, мәдәнийәт мәркизи тәркивидики җәмийәтлик ишлар активистлири тәрипидин бийил нурғунлиған яхши чарә-тәдбирләр әмәлгә ашқан. Урпи-адәтлиримизни риваҗландуруш болсун, маарип вә мәтбуат мәсилилири болсун, хелила илгириләшләр йүз бәргән. Җәмийәт һаятиниң барлиқ саһалирида миллитимиз вәкиллири хизмәт қилип, елимиз тәрәққиятиға биркишилик һәссисини қошуп кәлмәктә. Мәркәз чарә-тәдбирлирини Елбасының «Рухани жаңғыру», Қазақстан Җумһурийитиниң Президенти Қасим-Жомарт Тоқаевниң «Конструктив җәмийәтлик диалог – Қазақстанниң турақлиқлиғи вә гүллинишиниң асаси» Мәктүби асасида әмәлгә ашуруватиду. Әнъәнивий мәйрәмләрдин башқа бийил наһийәдә дәсләпки уйғур кәспий композитори Қуддус Ғоҗамияровниң 100 жиллиғи, «Гүлчай», «Һосма қоюш мәдәнийити» охшаш мәрасимларни уюштуруп, миллитимиздин чиққан сәнъәт, мәдәнийәт адәмлирини кәң тонуштурдуқ. “Яшлар жили” даирисидә һәрбир округ вә йезида яшлар комитетлири қурулуп, маарип, спорт вә сәнъәт саһалирида ишлар җанлиниватиду. Мәсилән, Тәшкәнсазда Зулфира Ниязова «Дилназ» уссулчилар ансамблини қуруп, Тәшкәнсаз вә Амангелди йезилириниң балилириға миллий уссулларниң қир-сирини үгитиватиду. Наһийә активистлири хәйрихаһлиқ ишлириниму яхши қолға алди. Мәсилән, йеқинда Азатта хәйрихаһлиқ фонди қурулди. Фондниң уюштуруши билән хәйрихаһлиқ концертлар уюштурулуп, бирнәччә ағриқ балиниң давалиниши үчүн мәбләғ жиғилди. Нурбүви Мәрүпқизи маарип мәсилисигиму тәпсилий тохталди. Йеза-йезилардин елинған мәлуматлар бойичә, наһийәниң 16 мәктивидики уйғур синиплириниң 1-синипиға 320 бала барған. Қаратуруқ – 23, Маливай – 45, Байсейит – 74, Кенжебаев намидики мәктәп (Челәк) – 9, М.Әвезов – 8, Қорам – 19, Дехан – 5, А.Розибақиев – 27, Ават – 10, Амангелди – 9, Тәшкәнсаз – 14, Баяндайда – 10 бала 1-синипқа қәдәм тәшрип қилған. Қалғанлири тәйярлиқ топида. Қошумчә қилиш лазимки, уйғур синиплириниң оқуғучилири наһийәлик, вилайәтлик, һәтта хәлиқара конкурсларға қатнишип, мукапатлиқ орунлардин көрүнүп кәлмәктә. Нурбүви Қасимова муштири топлаш мәсилисигиму тохтилип, «Уйғур авази» гезитиниң йенида қурулған штаб әзалириниң бүгүнки күндә тонутуватқан паалийәтчанлиғини атап өтти. Бийил муштирилар саниниң бурунқидин мүмкинқәдәр нурғунирақ болидиғанлиғиға ишинидиғанлиғини билдүрди. Андин наһийәлик Уйғур этномәдәнийәт мәркизи рәисиниң орунбасари Майдин Абдуллаев Челәк регионида әмәлгә ашқан ишларға тохталди. Майдин Варисоғли асасән тәнқидий ой-пикирлирини изһар қилип, яшларни тиҗарәтчилик билән шуғуллинишқа, аһали турмушини яхшилаш үчүн түзүлгән дөләт программилиридин орунлуқ пайдилинип, «иш йоқ» дәп шикайәт қилмай, бир ишниң пешини тутушни үгинишкә чақирди. Әмгәкчиқазақ наһийәсиниң чоң жигитбеши Реһимҗан Ибдиминов Қ.Жүсүпов йезиси турғунлириниң тәшәббуси билән башланған Ғени батурниң ядикарлиғини җиддий ремонттин өткүзүш ишлири әтрапида сөзлиди. Гезитханлар ядиға салимизки, бийил 5-июль күни Кеңәш Иттипақиниң Қәһримани Жүсипбек Қайыпов намидики йезиниң четидә, Улуқ Ипәк йолиниң бойида уйғур хәлқиниң қәһримани – Ғени батурниң һәйкили йенида Қазақстан йеза округиниң мутәхәссиси Әзимҗан Алиев, Асимҗан Илахунов қатарлиқ яшларниң тәшәббуси билән чоң жиғин вә нәзир өтүп, қәбирстанлиқ әтрапини җиддий ремонттин өткүзүш мәсилиси көтирилгән, бираз вақиттин кейин болса, бу ишларму әмәлгә ешишқа башланған еди. Шу вақиттики һесап билән ядикарлиқни әслигә кәлтүрүш ишлириға алтә миллион тәңгә һаҗәт еди. Мәбләғ ядикарлиқни җиддий җөндәштин өткүзүш, әтрапини рәткә кәлтүрүш, нәзир вә митингларни өткүзүш үчүн үстәл вә орундуқларни орунлаштуруш үчүн сәрип қилиниши лазим еди. Чоң жигитбешиниң тәкитлишичә, бу алийҗанап иш пүткүл җумһурийәт даирисидә һаллиқ тиҗарәтчиләр вә җамаәтчиликниң салмақлиқ маддий ярдими билән әмәлгә ешиватиду. Реһимҗан Ибдиминов ядикарлиқ әтрапидики җисманий ишларни «бир яқидин баш, бир йәңдин қол чиқирип» атқуруватқан қериндашлиримизға разилиғини билдүрүп, буниңдин кейинму мошундақ өмлүк һәм бирликтә иш тутушқа дәвәт қилди. Андин Сулайман Шәмшидиноғли жиғинни йәкүнләп, жиғилған көпчиликни Нурбүви Қасимова вә Майдин Абдуллаевниң Әмгәкчиқазақ наһийәлик Уйғур этномәдәнийәт мәркизи рәисиниң Ишиктә вә Челәк регионлири бойичә вә узун жиллар наһийәлик чоң жигитбешиниң орунбасари хизмитини атқурған Үсәнҗан Абдрахмановниң жигитбашлири билән ишләш йөнилишидики орунбасари болуп қайта сайлиниши һәққидики қарарини елан қилди. Әмгәкчиқазақ наһийәси.

29 рет

көрсетілді

0

пікір
Алдыңғы мақала Яхшиларниң яхшиси
Келесі мақала Мәктәп – кемә, билим – деңиз

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *