• Әхбаратлар еқими
  • 04 Желтоқсан, 2019

Кичик йезидики чоң дохтур

Елимизниң Тунҗа Президенти – Елбасы Нурсултан Назарбаевниң «Келәчәккә нишан: мәнивий йеңилиниш» намлиқ мақалисида мустәқиллик жиллирида әмгәк қилип, елимизниң тәрәққиятиға салмақлиқ һәссә қошқан вәтәндашлиримизниң әмгиги унтулуп қалмайдиғанлиғи қәйт қилинған. Йәни Мустәқиллик дәвридә өзиниң әмгиги билән озуп чиққан замандашлиримизни яшларға үлгә қилип көрситишимиз лазимлиғи тәкитләнгән. Шуни асасқа алған һалда, мән бүгүн әлгә әмгиги сиңгән жутдишим, тәҗрибилик дохтур Маратҗан Қадиров һәққидә гәп қилмақчимән. Әмәлиятта, җан-дили билән әл ғеми үчүн тәр төккән меһнәткәш инсанлар, хәлиқниң жуқури һөрмитигә сазавәр болсиму, нам-шөһритини көпкә җар селип, махтинишни халимайду. Аңлиқ һаятида кәспигә иштияқ бағлиған Маратҗан Қадиров мана шу җүмлидиндур. Ағриғиға шипа издәп кәлгән һәрбир бемарниң жүригигә силиқ-сипайә мүҗәзи арқилиқ йол тепип, үзүлгән үмүтләрни улап, һаят үчүн күришип келиватқан саламәтлик пасибани Маратҗан ака Қадировни тонумайдиғанлар камдин-кам. У 1970-жили Кәтмән оттура мәктивини әла баһаларға тамамлап, С.Асфендияров намидики Қазақ миллий медицина университетиға оқушқа чүшиду. Уни муваппәқийәтлик тамамлап, қолиға диплом алғандин кейин, бирдин ана жути – Кәтмән йезисиға қайтип келип, әмгәк йолини башлайду. Мана шуниңдин етиварән та бүгүнки күнгичә йезилиқ ағриқханида ишләватиду Қириқ жилдин ошуқ иш-паалийитидә өз кәспиниң маһири екәнлигини дәлиллигән врач-терапевт Маратҗан ака бир жиллири йепилишқа йүзләнгән йеза ағриқханисини сақлап қелип, жут-җамаәтниң миннәтдарлиғи вә зор илтипатиға еришти. Хулләс, йезимиздики тәҗрибилик дохтур һәққидә аңлап-билгәнләр жутумизниң босуғисидин атлап, кесилигә дава тапмақта. Һәтта, Нур-Султан вә Алмута охшаш тәрәққий әткән шәһәрләрниң турғунлириму, заманивий технологияләр билән җабдуқланған ағриқханиларға бармай, кичик йезидики пухта билимгә егә, тәҗрибилик врач Марат Қадировқа көрүнүшни әвзәл көриду. Һәптиниң қайси күни яки күнниң қайси вақти болушиға қаримай, ишигини чәккән бемарниң ким яки қәйәрдин екәнлигидин қәтъий нәзәр, һәммигә бирдәк ғәмхорлуқ қилип, көңлини қалдурмайдиған саламәтлик пасибаниниң, әлвәттә, хәлиқ алдида абройи үстүн. Наһийә мәркизидин йүз чақирим жирақлиқта орунлашқан Кәтмән йезисидики ағриқханиниң намини чиқарған Маратҗан ака Қадировниң йәткән утуқлири, алған мукапатлири санап түгәткүсиз. Лекин кичик пейил, кәмтар жутдишимиз өзини махтиғандин жирақ. Җәмийәтлик ишларниң тәшәббускари сүпитидә жутниң отидин кирип, сүйидин чиқип жүргән Маратҗан ака өмүрлүк җүпти Зәйтүнәм һәдә билән аилә қуруп, 4 пәрзәнт сөйди. Зәйтүнәм һәдә 40 жил мәктәптә математика пәнидин дәрис берип, һөрмәтлик дәм елишқа чиққан пешқәдәм устаз. Парасәтлик инсанларниң аилисидә өскән балиларниңму җәмийәттин өз орнини тапидиғанлиғи талашсиз. Җүмлидин, чоң оғли Муратҗан алий билимлик – стоматолог. Шерәли 28 йешида PһD доктор илмий дәриҗисини алған. АҚШта математика пәни бойичә узун жиллар чәт әлләрдә илмий иш билән шуғулланған. Һазир у Сулейман Демирел университетида дәрис бериду. Кәнҗә оғли Бәхитҗанму мәзкүр университетта хизмәт қилиду. Әнди, ялғуз ғунчиси Зульфия болса, чевәр тикинчи. «Яхшиниң яхшилиғини ейт...» демәкчи, әмгиги махташқа мунасип врач Маратҗан Искалиноғлиға «Уйғур наһийәсиниң Пәхрий граждини» атиғи берилсә, нур үстигә нур болар еди дегүм келиду. Чүнки бу мениң шәхсий пикрим әмәс, бәлки пүткүл кәтмәнликләрниң қәлбидә жүргән ой. Биз һәрқачан әмгәксөйгүч жутдашлиримиз билән пәхирлинип, яхшиларниң яхшилиғини йезиштин һарған әмәсмиз. Шатлиқ СОПӘКОВ. Уйғур наһийәси.

43 рет

көрсетілді

0

пікір
Алдыңғы мақала Йәнә бир теплица ишқа қошулди
Келесі мақала Мустәқиллик долқунида тавланған

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы