• Әхбаратлар еқими
• 11 Желтоқсан, 2019

Бизниң бебаһа байлиғимиз

Һәрбир дөләтниң, һәрбир хәлиқниң тарихида мәңгү сақлинип қалидиған шанлиқ сәнәлири болиду. Қазақстан Җумһурийитиниң мустәқиллик алған күни пәқәт қазақ хәлқи үчүнла әмәс, шундақла мана мошу бәрикәтлик зиминда яшаватқан барлиқ хәлиқлар үчүн әйнә шундақ улуғвар сәнә болуп һесаплиниду. Буниңдин жигирмә сәккиз жил илгири, йәни 1991-жили 16-декабрь күни «Қазақстан Җумһурийитиниң дөләт мустәқиллиги тоғрилиқ» Қанун қобул қилинди. Әлвәттә, жигирмә сәккиз жил дегән тарих үчүн қисқа бир мусапә. Амма, биз кейинки жилларда елимиздә йүз бәргән аләмшумул өзгиришләргә диққәт билән қарап, әқил-таразимизға селип, тәһлил қилидиған болсақ, шу йүз бәргән өзгириш-йеңилиқларниң хәлиқниң һаятини, дөләтниң тәрәққиятини сүпәтлик йеңи дәриҗигә көтәргәнлигини яхши чүшинимиз. Һазир айрим шәхсләр «Елимизниң дәсләпки қәдәмлири, мәхсити тоғра болдиму? Шу мәхсәтләргә ериштуқму?» дегән соалларниму қойиду. Шәхсән өзәм ишәшлик рәвиштә бу соалларға «шу йолумиз вә пәллә-мәхсәтлиримиз наһайити тоғра болди» дәп еғиз толтуруп ейталаймән. Буниңда Қазақстанниң Тунҗа Президенти — Елбасы Нурсултан Назарбаевниң дана ички вә ташқи сәяситиниң муһим роль ойниғанлиғини пәқәт қазақстанлиқларла әмәс, пүткүл дуния җамаәтчилиги етирап қиливатиду һәм мәмнунийәт билән тилға алиду. Дуния тарихиға нәзәр ташлайдиған болсақ, һечқачан бир дөләт мустәқиллигини елипла он бәш — жигирмә жил өтмәйла сүръәтлик тәрәққий етип, гүлләп-яшнап кәткән әмәс. Амма, мустәқил Қазақстан өзиниң дана Рәһбириниң келәчәкни пәмләш иқтидари түпәйли, өзигә хас болған қазақстанлиқ йолни таллавалди. Өткән әсирниң ахирида башланған қәдәмләр ХХІ әсирниң бешида ихтисатта болсун, иҗтимаий саһада болсун, сәясәттә болсун дағдам йолға айланди. Бүгүнки әмәлият униң ярқин испати. Һазир Қазақстанниң егилигән орнини регионал вә дуниявий сәясәттики тутқан йоли вә атқуруватқан роли яққал көрситип туриду. Елимиз мустәқилликниң мустәһкәм һулини қурған, чегарисини бузулмас қилип бәкиткән, келәчәккә дадил қәдәм ташлиған дөләт сүпитидә етирап қилиниду. Мошу жиллар ичидә Қазақстан дунияниң 150тин ошуқ мәмликити билән дипломатиялик мунасивәтләрни орнатти. Елимиздә хәлиқара дәриҗидики чоң конференцияләр, әнҗуманлар, учришишлар, саммитлар өткүзүлди. ЕБҺТ саммитиниң, ЕХРО көргәзмисиниң алий дәриҗидә уюштурулуши дунияда мәмликитимиз абройини техиму жуқури пәллигә көтәрди. Әлвәттә, ихтисадий-иҗтимаий ислаһатлар пәқәт хәлиқ мәнпийити үчүнла әмәлгә ашурулди. Аз вақит ичидә Қазақстан аләмдики тәрәққий әткән дөләтләр арисида 50-орунни егилиди. Әндики мәхситимиз риқабәткә қабил 30 мәмликәт қатариға кириш. Униңға бизниң иқтидаримиз толуқ йетиду. Шундақла муһим асасларму көп. Шуларниң ичидә турақлиқ ихтисадий тәрәққият, сәясий турақлиқ, милләтләрара разимәнлик, достлуқ вә течлиқ. Һазир елимиздә ихтисадий-иҗтимаий ислаһатлар җиддий әмәлгә ашурулмақта. Қазақстан Президенти Қасым-Жомарт Тоқаев Елбасы Нурсултан Назарбаевниң дана сәяситини изчиллиқ билән давамлаштуруп келиватқанлиғини алаһидә қәйт қилишимиз керәк. Алаһидә тәкитләш лазимки, елимиздики течлиқ вә милләтләрара разимәнлик елимизниң бебаһа байлиғидур. Мошулар бизниң елимизниң сүръәтлик тәрәққиятиниң капалити вә асасий көрсәткүчи. Башқа милләтләр қатарида Қазақстанда истиқамәт қиливатқан уйғурларниңму өзиниң мәдәнийитини, сәнъитини, тилини сақлап вә риваҗландурушиға барлиқ шараит-имканийәтләр яритилған. Әң муһими, балилиримизниң ана тилида билим елишиға барлиқ мүмкинчиликләр бар. Уйғур театри паалийәт жүргүзүватиду, уйғур тилида нәшир қилиниватқан гезит-журналлар, китаплар бар. Уйғур яшлири чәт әлләрдә билим еливатиду, тиҗарәттә өз орнини тепиватиду, дөләт органлирида хизмәт қиливатиду. Мошундақ шараитларни толуқ пайдилиниш һәркимниң өз қолида, әлвәттә. Мән дайим «Әң бәхитлик уйғурлар Қазақстанда яшайду» дәп тәкитләймән. Бу һәқиқәтәнму шундақ. Мустәқиллик — бебаһа байлиқ. У бизниң байлиғимиз, әркинлигимиз, һоқуқлиримиз вә келәчигимиз. Мустәқиллик күни — улуқ мәйрәм. Мән, пурсәттин пайдилинип, барлиқ қазақстанлиқларни шу улуқ мәйрәм билән сәмимий тәбрикләп, барчиңларға бәрикәт, саламәтлик, утуқ тиләймән. Шаһимәрдан НУРУМОВ, ҚҖ Парламенти Мәҗлисиниң депутати, ҚХА Кеңишиниң әзаси, ҖУЭМ рәиси.