• Гезитимиз җанкөйәрлири
  • 25 Желтоқсан, 2019

Аниниң ейтари көп

Сабирәм ӘНВӘРОВА, «Уйғур авази» Гезит десә, ичкән ешини йәрдә қойидиған мөтивәрләрниң бири – Саһинур ана Савутова. Мухбирниң яри болғанлиғи үчүнму, униң гезитқа болған муһәббити бөләкчә. Уйғур мәтбуатиға өзиниң өчмәс из-тамғисини қалдуруп кәткән Уйғур наһийәсиниң Пәхрий граждини, Қазақстан Журналистлар иттипақиниң әзаси, истедатлиқ журналист, мәрһум Қасим Мәхсүтовниң яри Саһинур ана Савутова бу күнләрдә 85 яшниң даваниға қәдәм ташлиғили туриду. Шу мунасивәт билән уни йоқлап, өйигә издәп барғинимизда, нураний аниниң хошаллиқтин беши көккә йәткәндәк болди... – «Журналист» десә , ич-ичимдин тәвринип кетимән. Өмрүм журналист билән өткәчкиму, бу кәсипниң нәқәдәр мәшәқәтлик екәнлигини яхши чүшинимән. Шуңлашқиму журналистларға болған һөрмитим чәксиз. Көзүм көрмисиму, күнүм гезитсиз өтмәйду. Қизлирим «Уйғур авазиниң» һәр йеңи санини қалдурмай оқуп бериду, – дәп бизни иллиқ қарши алди Саһинур ана. Сөһбитимиз давамида нураний аниниң һаят йоли билән йеқиндин тонуштуқ. Саһинур Савутова 1935-жили Уйғур наһийәсиниң Чоң Ақсу йезисида туғулған. 1943-жили йезидики оттура мәктәпкә қобул қилинип, 1954-жили 10-синипни тамамлайду. – 1937-жили дадам Савут Тохниязовни «хәлиқ дүшмини» дәп тутуп кетип, кейинирәк өлүм җазасиға мәһкүм қилинған екән. Шу бир еғир күнләрдә мән үч яшқа, иним әндила 1 яшқа толған екән. Анам Гүлшәмхан икки бала билән тул қапту. Шуңлашқиму атам һәққидә әслимиләр йоқниң орнида. Бизни беқиш үчүн меһнәткәш анам көп қийинчилиқ көрди. У тағда сеғинчи болуп ишлигәчкә, мән Чоң Ақсудики интернатта билим алдим. Балилиғим уруш жиллириға тоғра келип, йоқчилиқниң азавини көп көрдүм. Худайим у күнләрни башқа һечкимгә көрсәтмисун, – дәп көзлирини әриксиз яшлиди ана. Саһинур ана мәктәпни тамамлиғандин кейин, 1957-жилғичә мәктәптә пионер йетәкчиси болуп ишләйду. Шу жили өмүрлүк яри, журналист Қасим Мәхсүтов билән аилә қуриду. Пәрзәнт сөйүп, он жил мабайнида бала күтүмидә өй ишлири билән бәнт бопту. 1967-жили наһийәлик истималчилар җәмийитигә ишқа орунлишиду. Иштин қол үзмәй, алтә айлиқ сода-сетиқ курсида тәһсил көриду. 1971 – 1990-жиллири һәрбий қисимдики дуканда хизмәт қилип, шу йәрдин һөрмәтлик дәм елишқа чиқиду. – Қасим билән өй тутуп, аиләвий һаятимиз еғирчилиқ билән башланди. Бир еғиз өйдә яшап, ләңмән йәйдиған чокиға зар болған күнләрниму баштин өткүздуқ. Җапа-мәшәқәт тартсақму, бәш балимизни бағримизға бесип, һечкимдин кам қилмай чоң қилдуқ. Худаға шүкри, бүгүн балилиримниң барлиғи өз турмуш-тирикчилиги билән бәнт. Мән кәнҗәм Алимҗанниң ғәмхорлуғида, нәврә-чәврилиримниң қизиғини көрүп яшаватимән, – деди көпни көргән мөтивәр бу новәт хошаллиқтин аққан тарам-тарам яшлирини иссиқ алиқинида сүртүп. Саһинур ана Нургүл, Нурбүви, Асимҗан, Чолпан, Алимҗан исимлиқ бәш пәрзәндидин 14 нәврә, 20 чәврә сөйүпту. Гезитимизниң һәр санини тақәтсизлик билән күтидиған меһриван ана бош вақтида қизлиридин китап оқуп беришниму сорайдекән. – Ахирқи қетим оқуп бәргән китавим Тельман Нурахуновниң «Чоң Ақсу — қутлуқ жутум», – дәп сөзүмизгә қошулди қизи Нургүл. – Шундақ. Техи йеқинда Чоң Ақсу йезисида мошу китапниң тонуштуруш мәрасими болуп өткән еди. Униңға қатнишип кәлгәндин кейин, дәрру қизимға шу китапни оқуттум. Китап әтраплиқ һәм мәзмунлуқ йезилипту. Техи йеқинда ушбу китап билән тонушқан Тәвәкәл Әйсаров, Гүлстан Давутова, Маһинур Садиқова, Нариман Савутов, Җаһангүл Бәхтахунова, Патәм Турдахунова, Гүлҗаһан Һошурова, Зина Мусаева, Имамдун Рошәнов, Хатәм Ғуламова, Әхмәт Мәмәтбақиев чоң ақсулуқлар намидин гезитқа инкас йезип қоюшумни өтүнгән еди. Бүгүн, пурсити кәлгәнликтин, сөйүмлүк гезитимиз арқилиқ муәллипкә жутдашлиримниң чоң миннәтдарлиғини йоллимақчимән, – деди Саһинур ана сөз ахирида.

65 рет

көрсетілді

0

пікір
Алдыңғы мақала «Жутумни сорисаң, ақтаслиқмән»
Келесі мақала Қарасулуқлар вәдисидә турди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы