• Хәлиқ вәкиллири — хәлиқ арисида
  • 08 Қаңтар, 2020

Балиева Челәккә кәлди

Рашидәм РӘҺМАНОВА, «Уйғур авази» Йеқинда Қазақстан Җумһурийити Парламенти Мәҗлисиниң депутати Зағипа Балиева Әмгәкчиқазақ наһийәсиниң Челәк региониға иш бабидики сәпәр билән кәлди. Униңға наһийә һакими Бинәли Ысқақ вә Nur Otan партияси Әмгәкчиқазақ наһийәлик шөбиси рәисиниң биринчи орунбасари Қуат Байғоджаев һәмра болди. Депутат өз сәпирини Челәктики Алмута вилайәтлик мәхсус балилар өйидин башлиди. Тәкитләш лазимки, бурун мәзкүр мәһкимидә туғулушидин нака, әқил-һоши кам балилар яшатти. Уларни беқишқа җүръәт қилалмиған ата-анилири мошу йәргә өткүзүветәтти. Бөлмиләргә кирип, балиларни көрүп чиқишниң өзи бир синақ болидиған. Наһийәниң мәркизи – Ишиктә шәһиридә болса, тәл-төкүз туғулған, амма ташланди болған балилар яшайдиған «Гөдәк өйи» моҗут еди. Ахирқи жиллири бәлгүлүк сәвәпләр билән һәр икки мәһкимидики балиларниң сани азийип, Ишиктидики балилар Челәккә көчирилди. 30 орунлуқ Челәктики балилар өйидә һазир онға йеқин бала яшайду. Мәһкимә хадимлириниң ейтишичә, Йеңи жил мәйриминиң һарписида икки бала пәрзәнт көрүшни арзу қилған аилиләр тәрипидин асрап елинипту. Бу йеңилиқ Зағипа Балиеваниму, наһийә рәһбәрлириниму хошал қилди. Балилар өйиниң ишиға қанаәт һасил қилған депутат мәһкимә хадимлириға утуқ тиләп, житим вә бемар балиларниң алаһидә диққәт вә муамилигә муһтаҗ екәнлигини әскә салди. Андин кейин Зағипа Балиева Челәк мәркизий ағриқханисида жүргүзүлүватқан җиддий ремонт ишлири билән тонушти. Мәлумки, 2018-жили июльда Челәк йезисидики ағриқханида канализация трубилирини тәкшүрүш үчүн һәрикәт қилған икки санитарлиқ техник, уларға ярдәм қилишқа интилған бир травматолог дохтур қаза болуп, йәнә икки дохтур зәрдап чәккән еди. Қайғулуқ вақиә йүз бәргәндин кейин тегишлик чариләр қоллинип, ағриқхана рәһбәрлигигә өз ишиниң маһири, узун жиллардин бери наһийәлик баш дохтурниң орунбасари хизмитини атқурған Гүлнар Қураметова тайинланди. Наһийә һакими Бинәли Әбдиқапасулы вә Гүлнар Съездбекқизиниң рәһбәрлигидә 15 – 20 жилдин бери җөндәлмигән ағриқханини җиддий ремонттин өткүзүш бойичә һөҗҗәтләр тәйярланди. Кейинирәк дөләт һесавиға җөндәш ишлири башланди. Ағриқханиниң ремонт қилиниватқан барлиқ бөлүмлирини арилап чиққан депутат униң җабдуқлиниш ишлирини өз назаритигә алидиғанлиғини билдүрүп, чоң регионға хизмәт қилидиған саламәтликни сақлаш мәһкимисиниң заман тәливигә толуқ лайиқ болуши лазимлиғини йәткүзди. Сәпәр давамида Зағипа Яхянқизи Челәк йезисиниң турғунлири вә тиҗарәтчиләр билән учрашти. Учришишта наһийә һакими Бинәли Ысқақ Челәк регионини тәрәққий әткүзүштики әмәлгә ешиватқан чариләр вә реҗиләнгән ишлар билән тонуштурди. Депутат челәкликләрни өз жутини тәрәққий әткүзүштә вә мәҗбурий иҗтимаий медицинилиқ ғәмсизләндүрүшни әмәлгә ашурушта паалийәтчанлиқ тонутушқа чақирди. Ахирида Мәҗлис депутати Қарийота йеза округиға қарашлиқ Сарыбулақ йезисиниң мәктивидә болуп, мәктәп муәллимлири вә оқуғучилириниң әһвали билән тонушти. Атап кетиш керәкки, ушбу мәктәп наһийәдики әң кона билим дәргаһлириниң бири болуп һесаплиниду. Йезида йеңи мәктәп бенасини селиш һөҗҗәтлири тәйярлинип, тегишлик орунларниң қоллап-қувәтлишигә егә болди. Наһийә һакиминиң ейтишичә, пат-йеқин арида йезида 120 орунлуқ мәктәпниң қурулуш ишлири башлиниду. Қазақстанни тәрәққий әткән әлләр қатариға киргүзүштики стратегиялик йолларниң бири – билимлик әвлат тәрбийиләш. Демәк, сарибулақлиқ балиларниң билим елиши үчүн йеңи шараитлар яритилидиған болиду. Әмгәкчиқазақ наһийәси.

325 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы