• Хәлиқ вәкиллири — хәлиқ арисида
  • 08 Қаңтар, 2020

Депутат аһали билән учрашти

Өткән йәкшәнбә күни Қазақстан Җумһурийити Парламенти Мәҗлисиниң депутати Шаһимәрдан Нурумов иш бабидики сәпәр давамида Талғир наһийәсиниң Гүлдала йезисидики 21-мәктәпниң мәҗлисләр залида талғирнаһийәликләр вә дүшәнбә күни Или наһийәсиниң Байсерке йеза округидики 28-мәктәп-гимназиядә ушбу тәвәниң турғунлири билән учрашти. Мәшүр САСИҚОВ, «Уйғур авази» Талғир наһийәсиниң аһалиси билән болған учришишта дәсләп сөзгә чиққан наһийә һакиминиң биринчи орунбасари Қайдар Абдыханов меһманни көпчиликкә тонуштурғандин кейин сөз новитини Шаһимәрдан Үсәйиноғлиға бәрди. Натиқ, өз новитидә, учришиш қатнашқучилирини Йеңи жил мәйрими билән тәбрикләп, уларниң аилисигә хатирҗәмлик вә ишиға утуқ тилиди. Шундақла у депутат сүпитидә йеңи қобул қилинған қанунларниң қазақстанлиқларға көплигән яхшилиқларни елип келидиғанлиғиға әтраплиқ тохталған һалда, буниң һәммиси җумһурийитимизниң һазирқидәк, йәни чарәк әсирдин сәл ошуқ вақит ичидә мәйли ихтисадий яки иҗтимаий җәһәттин болсун, дунияда тәрәққий әткән дөләтләр қатарида етирап қилинишиға бебаһа төһпә қошқан елимизниң Тунҗа Президенти – Елбасы вә униң тутқан йолини давамлаштуруватқан Президентимиз Қасым-Жомарт Тоқаев екәнлигини алаһидә тәкитлиди. Шаһимәрдан Нурумов мошу учришишқа келиштин илгири, наһийә рәһбәрлиги билән бирқатар йеңидин селиниватқан һәм пайдилинишқа берилгән иншаәтләр билән тонушқанлиғини ейтип, елимизда аһалиниң турмуш шараитини яхшилашқа барлиқ мүмкинчиликләрниң яритиватқанлиғиниң бир ипадиси екәнлигини қәйт қилди. – Шуңлашқа биз бәш Франциягә тәң территориясиниң астиму вә үстиму байлиққа толған, мустәқил Қазақстанимизда еринмәй әмгәк қилидиған болсақ, һәрбиримизниң паравән яшишимизға барлиқ имканийәтләр моҗут – деди Шаһимәрдан Үсәйиноғли. – Һөкүмитимиз дуниявий ихтисадий боһран овҗ алған бүгүнкидәк бир пәйттә һечқандақ мәмликәт җүръәт қилалмиған яхшилиқларни хәлиқ үчүн қиливатиду. Пенсия пули, айлиқ маашлар өсүватиду. Әнди мошу йөнилишләргә триллионлиған мәбләғ сәрип қилиниватқанлиғини нәзәрдә тутсақ, техи түнүгүнла мустәқилликкә еришкән елимизниң қудритиниң нәқәдәр бәләнтлигини тәсәввур қиливелиш тәс әмәс. Буниңдин ташқири, депутат учришишниң асасий қатнашқучилири болған муәллимләргә Йеңи жил һарписида «Педагогларниң мәртивисини көтириш тоғрилиқ» қанунниң қобул қилинғанлиғини йәткүзүп, уларни хошаллиққа бөлиди. Мәсилән, буниңдин етиварән, муәллимләр пәқәт өзлиригә жүкләнгән вәзиписи билән шуғуллинидиғанлиғини вә шундақла педагогларниң айлиқ маашиниң пәйдин-пәй өсүшини давамлаштуридиғанлиғини һәм қошумчә атқурған ишлири үчүнму алаһидә һәқ төлинидиғанлиғини ейтқинида, бу хуш хәвәрни көпчилик хошаллиқ илкидә қарши алди. Шундақла бу күни депутат гүлдалалиқларни йеқиндила Алмута әтрапида йүз бәргән «Bek Aіr» авиаширкитиниң самолети һалакитидә қутқузуш ишлирини жүргүзгән 3000 миңға йеқин адәмни иссиқ тамақ билән тәминлигини үчүн шәхсән Президент Қасым-Жомарт Тоқаев миннәтдарлиқ изһар қилғанлиғи билән тәбриклиди. – Бу болсиму – деди депутат, – қазақстанлиқларниң, ким болушидин қәтъий нәзәр, бирәвниң бешиға күн чүшсә, һечқачан чәттә турмай, һәрким имканийитиниң яр беришичә, ярдәм қолини сунушқа алдирайдиғанлиғини көрситиду. Мана бу бизниң қазақстанлиқ алаһидилигимиз болуп һесапланғуси. *** Әтиси Шаһимәрдан Нурумов Или наһийәсиниң Байсерке йеза округидики 28-мәктәп-гимназиясигә кәлди. У дәсләп билим дәргаһиниң һаят-нәпәси билән тонушти. Оқуғучиларниң билим елишиға барлиқ шараитлар яритилған йеңи, таза вә һәммә оқуш қураллири билән толуқ җабдуқланған синипларни көргән депутат мәктәп мәмурийитигә һәм муәллимләр коллективиға миннәтдарлиғини изһар қилди. Андин Шаһимәрдан Үсәйиноғли билим дәргаһиниң мәҗлисләр залида тәвә турғунлири билән учрашти. Учришишта дәсләп Или наһийәлик мәслиһәтниң кативи Роза Абилова депутатни көпчиликкә тонуштурди. Өз новитидә сөзгә чиққан Шаһимәрдан Нурумов иш бабидики сәпириниң мәхситини чүшәндүрүп, бу йәрдиму әң алий қанун чиқириш органида йүз бериватқан йеңилиқларни йәткүзди. Шундақла натиқ өзиниң устазлар аилисидин чиққанлиғини вә әмгәк паалийитидә ушбу кәсип егиси аталғанлиғини тилға елип, муәллимләрни «Педагогларниң мәртивисини көтириш тоғрилиқ» қанун лайиһисиниң қобул қилинғанлиғи билән тәбриклиди. Учришиш давамида һөкүмәт тәрипидин нәқ мошу саһаға нурғунлиған мәбләғниң бөлүнүватқанлиғи тоғрилиқ ейтилип, өз новитидә, муәллимләрму әйнә шуниңға мувапиқ әмгәк қилиши тәләп қилинидиғанлиғи тоғрилиқму сөз болди. – Һәммиңларға мәлум болғинидәк, – деди натиқ. – Силәрни (муәллимләрни – М.С) илгири-кейин болмиған яхшилиқлар күтүватиду. Һәрбир қилған ишиңларға һәқ төлинидиған болиду. Бурунқидәк кәспиңларға һечқандақ мунасивити йоқ вәзипиләрдин қутулдуңлар. Әнди пәқәт силәрдин оқуғучиларға сүпәтлик билим вә тәрбийә беришла тәләп қилиниду. Һәр икки наһийәдики учришишта қатнашқучилар тәрипидин иҗтимаий мәсилиләр бойичә депутатқа бирқатар соаллар келип чүшти. Уларниң һәммиси пәйдин-пәй иҗабий һәл қилинидиғанлиғини тәкитлигән депутат уларни тегишлик орунларға йәткүзүшни вәдә қилди. *** Түнүгүн Қазақстан Җумһурийити Мәҗлисиниң депутати Шаһимәрдан Нурумов Алмута вилайитиниң Җамбул наһийәсидә болди. Дәсләп у Қ.Медеубеков намидики қой егилиги илмий-тәтқиқат институтиниң шөбиси — «Қазақ чарвичилиқ вә йәм-чөп ишләпчиқириш» җавапкәрлиги чәкләнгән йолдашлиғини зиярәт қилди. Шөбә мудири, йеза егилиги пәнлириниң доктори, профессор Бақытжан Мусабаев ҖЧЙниң иш-паалийити билән тонуштурғач, бу йәрдә қойларниң дунияға кәң тарқалған нәсиллириму бар екәнлигини тәкитлиди. Андин депутат Ж.Үшкемпиров намидики спорт комплексида болди вә елимизниң яш әвлат вәкиллириниң сағламлиғи үчүн барлиқ мүмкинчиликләрни яритиватқанлиғини тилға елип, әң заманивий типта селинған мошу комлексиму әйнә шуниң ярқин ипадиси екәнлигини тәкитлиди. Депутатниң иш бабидики әнъәнивий аһали билән учришиши Мыңбаев йеза округиниң мәркизи Мыңбай йезисидики оттура мәктәпниң мәҗлисләр залида өтти. У йәрдә Шаһимәрдан Үсәйиноғли турғунларға йеңи жилда алий қанун чиқириш оргинида аддий хәлиққә хошаллиқлар елип келидиған көплигән йеңилиқларниң барлиғини йәткүзди. Шуниң билән биллә бу учришиш давамида униң қатнашқучилири бүгүнки күнниң мәсилилири бойичә соаллар қоюлуп, уларға депутат қанаәтлинәрлик җавапларни бәрди.

75 рет

көрсетілді

0

пікір
Алдыңғы мақала Балиева Челәккә кәлди
Келесі мақала Яркәнт тәвәсидә вә Уйғур наһийәсидә болди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

14 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы