• Хәлиқ вәкиллири — хәлиқ арисида
• 15 Қаңтар, 2020

Көпчилик ғемидә жүргәнләр мунасип баһаланди

Мәлумки, һазир Парламент депутатлири елимизниң барлиқ вилайәтлири билән шәһәр-йезилирини арилап, сайлиғучилар билән учришип, уларниң қолға кәлтүрүватқан утуқ-муваппәқийәтлири, муң-муһтаҗи билән йеқиндин тонушуватиду. Шу җүмлидин миллитимиз вәкили, Қазақстан Җумһурийити Парламенти Мәҗлисиниң депутати, ҚХА Кеңишиниң әзаси, ҖУЭМ рәиси Шаһимәрдан Үсәйиноғли Нурумовму өткән һәптидә Алмута вилайитиниң Талғир, Или, Җамбул, Уйғур вә Панфилов наһийәлиридә болуп, жут-җамаәтчилик билән учришишларни өткүзди. Шәмшидин АЮПОВ, «Уйғур авази» Мана мошу хилдики баш қошуш дүшәнбә күни Алмута шәһиридики «Достлуқ өйидә» болуп өтти. Униңға биртүркүм зиялилар, алимлар, журналистлар, ҖУЭМниң башқарма әзалири билән этномәдәнийәт мәркәзлириниң рәһбәрлири, шундақла Алмута шәһири вә униң әтрапидики мәһәллиләрниң һәм Талғир наһийәсидики йезиларниң жигитбашлири, ханим-қизлири вә җәмийәтлик ишларниң активистлири қатнашти. Учришиш модератори – «Уйғур авази» гезитиниң баш муһәррири, ҚХА әзаси Ершат Әсмәтов мәзкүр баш қошушниң асасий мәхситини һәм униң күн тәртивини қисқичә чүшәндүргәндин кейин, дәсләпки сөзни Қазақстан Җумһурийити Парламенти Мәҗлисиниң депутати, ҚХА Кеңишиниң әзаси Шаһимәрдан Нурумовқа бәрди. Шаһимәрдан Үсәйиноғли учришиш қатнашқучилирини Йеңи жил мәйрими билән тәбрикләп, уларниң аилисигә хатирҗәмлик вә ишиға утуқ тилиди. Мәҗлис депутати шундақла адреслиқ иҗтимаий ярдәм, мәҗбурий иҗтимаий медицинилиқ ғәмсизләндүрүш вә башқиму муһим иҗтимаий мәсилиләр бойичә йеңи қобул қилинған қанунларға һәм уларниң қазақстанлиқларға көплигән яхшилиқларни елип келидиғанлиғиға әтраплиқ тохталди. Баш қошушниң иккинчи қисми «Уйғур авази» гезитиға муштири топлашқа паал қатнашқан гезитимиз җанкөйәрлирини рәғбәтләндүрүшкә беғишланди. «Уйғур авази» гезитиниң баш муһәррири Ершат Моллахуноғли жиғин мәхситини чүшәндүргәч, гезитимизға муштири топлашқа паал қатнашқан барлиқ җанкөйәрлиримизгә миннәтдарлиғини изһар қилди. Андин у сөз новитини ҖУЭМ рәиси Шаһимәрдан Нурумовқа бәрди. Натиқ, өз сөзидә, җумһурийәтлик «Уйғур авази» гезитиниң җәмийәттә егиләйдиған ролиға қисқичә тохтилип өткәч, гезитниң паалийитигә йеқиндин арилишип, униң мәзмуниниң яхшилинишиға вә тарилиш даирисиниң кәңийишигә салмақлиқ һәссә қошқан биртүркүм алимларға, жигитбашлириға, ханим-қизларға, гезит коллективиға, умумән, мәнивий ойғинишқа қарап йүзлиниватқан барчә уйғур җамаәтчилигигә сәмимий миннәтдарлиғини билдүрди. Шаһимәрдан Үсәйиноғли шундақла өз сөзидә балилиримизни өзиниң ана тилида оқутушниң зөрүрлүгиниму алаһидә тилға алди. «Биз өзимизниң ана тилимиз билән мәдәнийитимизни, тарихимизни үгинидиғанға, урпи-адәтлиримизни сақлап қалидиғанға һәм униң һәммисини кәйнимиздә өсүп келиватқан қаракөзлиримизгә қалдуридиғанға пәқәт мустәқил Қазақстан дөлитидила мүмкинчилик бар. Мошуни ядимиздин чиқармайли, қериндашлар!», деди у сөзини йәкүнләп. Шуниңдин кейин җәмийәтлик ишларда паалийәтчанлиқ көрситиватқан қериндашлиримизға ҚХАниң, Парламент Мәҗлисиниң һәм җумһурийәтлик Уйғур этномәдәнийәт мәркизиниң вә «Уйғур авази» гезитиниң мукапатлири тапшурулди. Шундақ қилип, Шаһимәрдан Үсәйиноғли Нурумовниң қолидин биртүркүм шәхсләр ҚХАниң һәм Алмута шәһәрлик ҚХАниң вә Қазақстан Җумһурийити Парламенти Мәҗлисиниң Тәшәккүрнамисини елишқа муйәссәр болди. У күни шундақла Алмута вә униң әтрапидики мәһәллиләрдин һәм Талғир наһийәсиниң йезилиридин кәлгән 40қа йеқин жигитбеши билән ханим-қизлар һәм биртүркүм җәмийәтлик ишларниң активисти ҖУЭМ билән «Уйғур авази» гезитиниң пәхрий ярлиқлири билән мукапатланди. Қисқиси, көпчилик ғемида сәкпарә болуп, һардим-талдим демәй ишлигәнләрниң шиҗаәтлик һәм пидакаранә әмгиги мунасип баһаланди. Тәкитләш керәкки, Мәҗлис депутатиниң қолидин мукапат алғанларниң хошаллиғида чәк йоқ. Улар «Уйғур авази» гезити коллективи билән ҖУЭМ тәрипидин көрситилгән бу зор һөрмәтни көрүп, бөләкчә һаяҗанланди. Дәрвәқә, миллий мәдәнийитимизниң, мәтбуатимизниң һәқиқий җанкөйәрлири болған ханим-қизлар билән жигитбашлириниң, болупму биртүркүм алимлиримизниң мукапатлиниши – уларниң роһини техиму көтәрди. Күн тәртивидә шундақла тәшкилий мәсилә қаралди. ҖУЭМниң Алмута шәһәрлик шөбисиниң рәиси, медицина пәнлириниң намзити Әбәйдуллам Җаппаров ҖУЭМ рәисиниң орунбасари, Талғир наһийәсиниң баш жигитбеши Октябрь Қурбанниязов ҖУЭМ йенидики Жигитбашлири кеңиши рәисиниң орунбасари, миллий мәдәнийитимизниң җанкөйәри Санийәм Бавдинова ҖУЭМ Алмута шәһәрлик шөбисиниң Түрксиб наһийәси бойичә рәиси болуп сайланди. *** Сешәнбә күни Шаһимәрдан Нурумов Алмута шәһиридики А.Розибақиев намидики 153-мәктәп-гимназияниң мәҗлисләр залида Әвезов наһийәсиниң турғунлири билән учрашти. У йәрдә Шаһимәрдан Үсәйиноғли адреслиқ иҗтимаий ярдәм, мәҗбурий иҗтимаий медицинилиқ ғәмсизләндүрүш, муәллим мәртивисини көтириш вә башқиму муһим иҗтимаий мәсилиләр бойичә йеңи қобул қилинған қанунлар тоғрилиқ доклад оқуди. Учришишта қатнашқучилар тәрипидин депутатқа бирқатар соаллар қоюлди. Гимназия китапханичиси Гүлбостан Зәйналова мәктәп китапханичилириниң айлиғиниң төвәнлиги, мәсилән, йеңидин ишқа кәлгән мутәхәссисниң 65 — 75 миң тәңгә әтрапида мааш алидиғанлиғи, шундақла бу саһада 95 пайиз пенсионерларниң ишләйдиғанлиғини тәкитлиди. У шундақла илгири Қазақ Қизлар педагогика университетида китапханичи мутәхәссисләр тәйярланған болса, һазир бу бөлүмниң йепилип кәткәнлиги тоғрилиқму ейтти. «Достық» пәтир егилири кооперативиниң рәиси Пәрһат Сайитов газ егилигигә мунасивәтлик проблемиларға тохталди. Қоюлған соалларға Мәҗлис депутати қанаәтлинәрлик җавап бәрди вә уларни тегишлик орунларға йәткүзүшни вәдә қилди. Бу күни Ш.Нурумов вә бир түркүм меһманлар өткән жили мурәккәп җөндәштин өтүп, тониғусиз дәриҗидә өзгәргән гимназия бенасини арилап чиқти. Синип бөлмилирини, спорт вә мәҗлис заллирини көрүп, уларниң нәпәси билән йеқиндин тонушти. Учришиш ахирида гимназия мудири, Алмута шәһәрлик мәслиһәтниң депутати Шавкәт Өмәров қиммәт вақтини бөлүп, наһийә турғунлири билән учришиш мәхситидә қәдәм тәшрип қилған депутатқа сәмимий миннәтдарлиғини билдүрди.