- "Рухани жаңғыру"
- 22 Қаңтар, 2020
Өй селип бәрди
Оқурмәнләрниң ядида болса керәк, гезитимизниң өткән санлириниң биридә Уйғур наһийәсиниң Чарин йезисида тәсадипи апәт йүз берип, Салимовлар аилисиниң өйигә от кәткәнлиги һәм өртниң ичидә қалған 72 яшлиқ Шолпан апайни йеза турғуни Амантай Омаровниң сиртқа аман-есән елип чиқип, жутдашлирини тәсирләндүргәнлиги һәққидә язған едуқ. Әнди бүгүн чаринлиқларниң өмлүгини көрситидиған йәнә бир изгү ишқа тохталмақчимиз.
Сабирәм ӘНВӘРОВА,
«Уйғур авази»
Бир күндә, ойлимиған йәрдә өйсиз қалған жутдашлириға қол-қанат болған чаринлиқлар бәргән вәдисидә турди. Йәни, жут болуп, көйүп күли қалған йәргә қайтидин йеңи өйниң һулини тикләп, жутниң бирлигини көрсәтти. Йеқинда Чаринда турғунлар баш қошуп, 6 бөлмилик өйниң ачқучини Марат Салимовқа тапшуруп бәрди. Наһийә һакими Шөһрәт Нурахунов вә наһийәлик мәслиһәтниң кативи Нурәким Есжан бу тарихий пәйтниң гувачиси болди.
Жутниң өмлүгидин сөйүнгән наһийә һакими Шөһрәт Нурахунов бирлик болған йәрдә бәрикәт болидиғанлиғини алаһидә тәкитләп, жүриги кәң, қоли очуқ чаринлиқларға «апирин» ейтти вә йеңи өйгә йеңи гиләм соға қилди. Өз новитидә Салимовлар аилисиниң әзаси Гүлстан Салимова жутдашлириға болған чәксиз миннәтдарлиғини билдүрди.
229 рет
көрсетілді0
пікір