• Спорт
• 29 Қаңтар, 2020

Яшлиримиз яриди

Спорт – сағлам һаят капалити. Болупму, бүгүнки яшларниң аң-сәвийәси Интернетқа беқинда болған заманда яш әвлатниң спорт билән шуғуллинишиға көңүл бөлүш муһим мәсилә. Бош вақтини көк экранға тәлмүрүп, пайдиси йоқ ишқа сәрип қилидиған яшлиримизни спортқа җәлип қилиш керәк. Ғалҗат йеза округи һакими аппаратиниң Тәнтәрбийә вә спорт ишлири бойичә методист-инспектори сүпитидә яшлиримизниң бош вақтини үнүмлүк пайдилинип, спорт билән шуғуллинишиға зәмин яритишни асасий вәзипәм дәп билимән. Мана шу мәхсәттә мәктәп мәмурийити билән бирликтә нурғунлиған ишларни әмәлгә ашурдуқ. Хуш қилидиғини, көплигән яшлиримизниң спортқа дегән қизиқиши күчийип, улар тилға аларлиқ утуқларни қолға кәлтүрмәктә. Йеқинда Түгмән йезисида ушу вә кунг-фудин чоңлар, яшлар вә өсмүрләр арисида вилайәтлик чемпионат болуп өткән еди. Ушбу мусабиқигә йезимиздин бир түркүм яшлар қатнишип, мукапатлиқ орунлардин көрүнди. Ениғирақ ейтсақ, 56 килограмм салмақ дәриҗиси бойичә Мансур Махмутов 2-орунға, 65 килограмм салмақ дәриҗиси бойичә Шөһрәт Шериязданов 2-орунға вә 60 килограмм салмақ дәриҗиси бойичә Ислам Ишамов 3-орунға муйәссәр болди. Шундақла Равиль Шерпидинов, Низамдун Һезизов, Абдурашит Абдумеҗитов яхши оюн көрситип, қазиларниң иллиқ инкасиға еришти. Сөз ахирида жуқурида исми аталған яш спортчилиримизниң мәшиқләндүргүчиси Хамит Әйсаровқа рәхмәт ейтип, яшлиримизниң келәчәктә техиму чоң утуқларни қолға кәлтүрүп, елимизниң шәнини һәшләргә чиқиридиған чемпионлардин болушиға тиләкдашмиз. Бәгзат ҖАМАЛДИНОВ, Ғалҗат йеза округи һакими аппаратиниң тәнтәрбийә бойичә методист-инструктори. Уйғур наһийәси.