• Спорт
• 29 Қаңтар, 2020

Һезимға ақ йол тиләймиз

Өткән жилниң август ейида иҗтимаий торларда қазақстанлиқ спортчи Һезим Һезбақиниң Америка Қошма Штатлириниң Оклахома штатиниң Брокен Арров шәһиридә өткән бокс бойичә хәлиқара мусабиқидә еғир салмақ дәриҗисидә америкилиқ Армонте Самерсни йәңгәнлиги тоғрилиқ хәвәрни көрүп, дәрру уни сүрүштүрүшкә башлидим. Уни издәп тепишимға Һезимниң мәшиқләндүргүчиси, «Free sparrіng» спорт клубиниң вице-президенти, Қазақстанниң хизмәт көрсәткән мәшиқләндүргүчиси Имид Тохтахунов ярдәмләшти. Һемит Һезимниң бир-икки күндин кейин Америкидин келидиғанлиғини ейтти. Шундақ қилип, мән Һезим билән телефон арқилиқ тонушуп қалдим. Йәнә бир қизиқ йери, биз бир жутлуқ екәнмиз. Шуниңдин бери мән униң билән алақилишип туримән. У көп вақит өтмәйла йәнә шу АҚШниң Мичиган штатидики Флинт шәһиридә өткән мусабиқидә америкилиқ Трой Олбрингни биринчи раундтила йеңивалди. Һезимниң бу утуғи көпчиликни хошал қилди. Һезим Турсуноғли Һезбақи 1994-жили Алмута вилайитиниң Челәк йезисида туғулуп, шу йезидики Абдулла Розибақиев намидики оттура мәктәпни тамамлиған. У кичигидинла бокс, кикбоксинг вә спортниң башқиму түрлири бойичә мәшиқлинип, җумһурийәт даирисидә бирқатар мусабиқиләргә қатнашти. Дәсләп Малик Хайруллинниң, андин Һемит Тохтахуновниң қолида тәрбийиләнгән Һезим Венгриядә кикбоксинг бойичә болуп өткән мусабиқидә 3-орунға еришиду. Брокен Аррав шәһиридә өткән мусабиқигә Россия, Украина, Өзбәкстан, Америка вә Мексикиниң әң күчлүк боксчилири қатнашқан болуп, у йәрдә Һезим уйғурлардин биринчи болуп Қазақстанни кәспий рингта тонутти. Шуни алаһидә тәкитләш керәкки, Һезимниң акиси Әзизму Малик Хайруллинниң қолида тәрбийилинип, бирнәччә мусабиқиләргә қатнашқан. Һезим әйнә шу акисини әгишип, һазир Қазақстанниң атақлиқ боксчилири қатаридин орун алди. У Қазақстан Җумһурийитиниң спорт маһири атиғиға намзат, йәкму-йәк бойичә Қазақстанниң хизмәт көрсәткән спорт маһири. Һезим өзиниң мундақ утуқларға йетишигә сәвәпчи болған мәшиқләндүргүчилири Бахыт Оразбаевқа, Имид Тохтахуновқа, шундақла кичик дадиси Шавкәт Һезбақиға алаһидә миннәтдарлиғини билдүриду. Улар Һезимниң йәниму егиз чоққилардин көрүнидиғанлиғиға үмүт қилиду. Бизму шулар қатарида Һезимниң кәспий бокста йеңи утуқлар қазинип, Қазақстанни, миллитимизни дунияға йәнә тонутиду дәп ишинимиз һәм ақ йол тиләймиз. Рәхмәтҗан ЙҮСҮПОВ.