• Замандаш
  • 29 Қаңтар, 2020

Яркәнттә шундақ жигитбеши бар

Гөһәрбүви ИСМАЙИЛҖАНОВА, «Уйғур авази» Яркәнт шәһириниң өзидила 40тин ошуқ жигитбеши бар. Улар мәһәллиләрниң өмлүк-иттипақлиғини сақлаш йолида иш елип бериватиду. Нуруллам Ваҗитов әйнә шуларниң бири. Еғир-бесиқ мүҗәзи, орунлуқ гәп сөзи билән, әң муһими, жутдашлириниң хизмитигә әстаидил берилгән жигитбешини дайим ишчан қияпәттә көримән. Әйтәвир, қачан көрмәң телефониға арам йоқ. Жутдашлириниң ғеми – униң ғеми, хошаллиғи – униң шатлиғи. У башқуруватқан Йәттису мәһәллисидә аз кам йүз аилә истиқамәт қилиду. Бу жутни 1996-жилдин бу ян башқуруватқан Н. Ваҗитовниң тоғра иш елип бериватқанлиғиниң нәтиҗисидә турғунлар өз ара өмлүги, иҗил-инақлиғи вә бир-биригә болған һисдашлиғи билән пәриқлиниду. Биз буниңға мәһәллә турғунлириниң новәттики баш қошушида толуқ көз йәткүздуқ. Шәһәрдики «Азия» кафесида өткән баш қошушта жигитбеши Нуруллам Ваҗитов сөз елип, мәһәллидә өткән жили атқурулған ишларға тохталди. – Бу жили Улуқ Ғалибийәтниң 75 жиллиғини тойлаймиз. Бизниң Йәттису мәһәллисидә арқа сәптә җасарәтлик әмгәк қилған ата-анилиримиз бар. Биз уларға һәр қачан һөрмәт билдүрүп, дәстихан төригә олтарғузуп, һалидин хәвәр алимиз. Биз бу мәрикини алаһидә нишанлаймиз. Җүдәт Йүсүпов, Имәрҗан Тохтахунов, Баһархан Розиева, Рошәнгүл Қасимова, Әхмәт Ғоҗәмбәрдиев охшаш арқа сәпниң қәһриманлири билән Һакимҗан Арупов, Саадәт һаҗим Арупова, Ғалип Исмайилов, Һәмра Анайәтов охшаш әмгәк ветеранлири бизниң пәхримиз. Биз, Йәттису мәһәллисиниң турғунлириниң көпчилиги, улуқ Абай Қунанбайұлы намидики кочида яшаймиз. Бу жилни Дөләт рәһбири Қасым-Жомарт Тоқаев “Абай жили” дәп атиди. Бизниң кочиниң турғунлири бу чоң тәвәллудлуқ мәрикиниң наһийәдә нишанлинишиға биркишидәк қатнишимиз дәп ишәнчә билдүримиз,– деди. Нуруллам Ваҗитов Яркәнт шәһиридики Киров (һазирқи Хелил Һәмраев) намидики мәктәпни тамамлиди. Вәтән алдидики һәрбий борчини өтәп қайтқан у «Октябрьниң 40 жиллиғи” колхозида шофер болуп ишлиди. Андин Панфилов автобус паркида, кейинирәк «Үркер» җавапкәрлиги чәкләнгән йолдашлиғида үлгилик әмгәк қилип, һөрмәтлик дәм елишқа чиқти. Биз жуқурида тәкитлигән мәһәллә турғунлириниң тәкливи билән 1996-жилдин Йәттису мәһәллисини башқуруп кәлмәктә. Нуруллам акиға 1997-жили Яркәнт шәһәрлик һакимийәт қәбирстанлиқни рәтләш, аватлаштуруш охшаш ишларни ишинип тапшуруведи, у 23 жилдин бу ян бу ишниң һөддисидин шәрәп билән чиқиватиду. Биз униң телефониға арам йоқ дегинимизму шуниңдин. Чүнки өлүм-житим ейтип кәлмигинидәк, вапат болған кишини йәрләш үчүн барлиқ шәһәрликләр униңға мураҗиәт қилиду. Бу ишниң қанчилик мурәккәп һәм җавапкәрлик екәнлигини у яхши һис қилиду. Чүнки қиш-йезиға қаримай қәбирстанлиқни рәтләш, уни кәңәйтиш, шәнбиликләр уюштуруш пәқәт Нуруллам акиниң рәһбәрлиги билән әмәлгә ашмақта. Қәбирстанлиқта жилиға 3-4 қетим шәнбилик уюштуруп, тазилаш ишлирини әмәлгә ашуриду. – Яркәнттә дәпин қилиш мәрасимиға нәччә пул кетиду?– дәп соридуқ жигитбешидин. – Буниңдин бәш-он жил илгири бир киши вапат болса, дәпин қилиш, гөр колаш үчүн һәммә қәбирстанлиққа келишәтти. Яшлар наһайити көп жиғилидиған. Ахирқи жилларда бу ишниң һөддисидин икки адәм чиқиватиду. Йәни гөркарларға 20 миң тәңгә пул төлиниду. Әнди хасийәтлик җайни тазилаш, аватлаштуруш ата-бовилиримиздин келиватқан соваплиқ иш. Мән бу ишта жутдашлиримға миннәтдармән. Һәр жили шәнбиликләрдә жут чоңлири әрваларға атап дуа-тәгбир бәргәндин кейин жиғилған көпчилик бир дәмдила тазилап, рәтләш ишлирини әмәлгә ашуриду. Мундақ чағда қолида техникиси бар жигитләрму қарап турмайду. Әхләтләрни чиқирип, йолларни җөндәш үчүн шехил-таш төкүлүп, көрүкләр селиниду. Өткән жили 350 түп дәрәқ көчити тикилди. Буйриса, йәнә әтиязда ишимиз шәнбилик билән башлиниду. Нуруллам ака жигитбашлириниң иши тоғрисида сөзлигәнни яқтуриду. Ичи қайнақ акимиз өзи башқуруватқан мәһәллидә «Уйғур авази» гезитини миллитимиз вәкиллириниң 100 пайиз елип оқуватқанлиғини тәкитлиди. Һәқиқәтәнму шундақ, күз келиши билән «Нурулам гезитқа йезиветипту» дегәнни аңлиған турғунлар уни тақәтсизлик билән күтиду. Әйнә шу чечи ақарған, чиши сарғайған атилар билән анилар пенсия пуллирини гезиткә дәп сақлап қоюшиму шуниңдин. Чүнки жигитбеши Нуруллам Ваҗитов миллий мәтбуатимиз билән маарипимизни сақлап қелиш йолидики пикрини көпчилик алдида дадил ейтип, жутдашлириниң сәвийәсигә сиңдүридиған адити бар. Яркәнтлик жигитбашлири мана мошу хислити үчүн уни яқтуриду. Шундақ екән, миллий мәдәнийитмизниң җанкөйәри бу күнләрдә өзиниң шанлиқ 70 яшлиғини қарши еливатиду. Рәпиқиси Светлана билән аилә қурғиниға 50 жил толди. Киши зоқланғидәк үч қизидин 5 нәврә, 2 чәврә сөйгән Нуруллам Ваҗитовни қош хошаллиғи билән сәмимий тәбрикләп, көңүл хатирҗәмлиги вә мустәһкәм саламәтлик тиләймиз. Панфилов наһийәси

60 рет

көрсетілді

0

пікір
Алдыңғы мақала «Жутумизниң Султанхан аниси»
Келесі мақала Жутқа мәккәм чигилгән өмүр

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы