• Спорт
• 05 Ақпан, 2020

«Рәхимҗанниң» утуқлири

Рашидәм РӘҺМАНОВА, «Уйғур авази» Әмгәкчиқазақ наһийәсиниң Достлуқ йезисидики «Рәхимҗан» спорт клубиниң ишләватқиниға бирла жил болди. Шундиму униң йәткән утуқлири аз әмәс. «Рәхимҗан» спорт клубини қаратуруқлиқ Марасул Тоқамов ачти. 1998-жили у 8-синипта оқуватқинида, челәклик мәшиқләндүргүчи Нурәхмәт Розиев Қаратуруқ йезисидики А.Саттаров намидики оттура мәктивидә бокс бойичә секция ечип, балиларни шуғулландурушқа башлиди. Нурәхмәт акиниң шагиртлириниң қатарида Марасулму бар еди. Идрәклик бала боксқа бар вуҗуди билән киришиведи, һели униңдин қол үзмәй келиватиду. Марасул Тоқамов Қазақстанниң хәлиқ егилиги университетида оқуди. Бош вақитлирида билим дәргаһиниң спорт залидин чиқмайдиған балаға университетниң тәнтәрбийә муәллими Болат Төлегенулыниң диққитини өзигә җәлип қилди. У яш боксчини төрт жил мабайнида университет командисиниң қатарида һәрхил турнирларға қатнаштурди. Марасул вилайәтлик, җумһурийәтлик вә хәлиқара турнирларда чемпион болди. Бокс бойичә «Спорт маһирлиғиға намзат» аталди. Марасул он жилдин ошуқ вақит Алмута шәһиридә билим елип, банк вә селиқ комитетлирида хизмәт қилди. 2017-жили, момисиниң илтимаси билән, йезиға қайтип кәлди. Башта шәһәргә қатнап ишлиди. Дәм елиш күнлири йезиниң ушшақ балилири униң өйигә жиғилип, уларни боксқа үгитишни илтимас қилиду. Марасул төрт ай давамида шу үч-төрт бала билән ишлиди. Кейин Алмутидики ишини ташлап, Достлуқ йезисидики балилар бағчисиға тәнтәрбийә бойичә тәрбийичиси болуп орунлишип, Алтынбике Бертаева намидики оттура мәктәптә спорт клубини ачти. Дәсләп алтә айда балилар йезиниң спорт мәйданида мәшиқләнди. Қар һәм ямғурғиму қаримиди. Марасулниң ейтишичә, дәсләп клубқа 50 — 60 бала кәлди. Бирақ вақит өткәнсири уларниң арисида пәқәт ирадиликлири қалди. Һазир 24 оғул вә бир қиз бокс билән шуғуллиниватиду. – Клуб ечилип, үч айдин кейин кәсипдашлирим мени турнирға тәклип қилди. Балиларни тәйярлап, турнир болидиған мәктәпкә елип бардуқ. Амма, мениң шагиртлиримниң спорт билән шуғуллиниши үчүн шараит йетәрлик болмиди. Шуңлашқиму балиларниң дәриҗиси тәләпләр дәриҗисидә әмәс еди. Шу чағда балилардин артуқ өзәм қийналдим. Чүнки мән мәктәп йешимдин турнирларға қатнишип жүрдүм. Мусабиқиләрдин пәқәт ғалибийәт билән қайтаттим. Һә шагиртлиримниң мәғлубийитидин кейинки көзлиридин аққан яшни көрүп, жүригим моҗуп кәтти. Шу чағда ишни башқичә қилишқа, буниңдин кейин шагиртлиримни пәқәт утуққа интилидиған қилип тәрбийиләшкә вәдә бәрдим өзәмгә, – дәйду Марасул. Кейин мәшиқләндүргүчи шагиртлириниң утуқлириға тохталди. Уларниң арисида Алишер Һәмраҗан, Диас Мәһәммәт, Арман Һашимов, Долқун Розиев, Рашид Қурбанов, Анфис Мехмет вә башқилар хәлиқара турнирларда мукапатлиқ орунлардин көрүнүп, клубни көпчиликкә тонутуп үлгирипту. – Әслидә мән мәшиқләндүргүчи болимән, спортчиларни тәрбийиләймән, дәп арман қилмиған едим. Амма йезидики балиларниң қизиқишини көрүп, паалийитимни өзгәртишкә бәл бағлидим. Һазир тәнтәрбийә муәллимлирини тәйярлайдиған оқуш орнида билим еливатимән. Келәчәктә мәктәптә ишлисәм, дәймән, – дәйду Марасул келәчәк планлири билән бөлүшүп. Марасул булту өзиниң машинисини сетип, спорт комплексиниң қурулушини башлапту. Тапқан-тәргининиң барлиғини шу алий мәхситигә сәрип қиливатқан у бийил комплексни рәсмий ечишни көзләватиду. Әмгәкчиқазақ наһийәси.