• Йеңилиқлар
  • 12 Ақпан, 2020

Лидерлиқ стратегияси

Елбасы Китапханисида Қазақстан Җумһурийитиниң Тунҗа Президенти – Елбасы Нурсултан Назарбаевниң бәрпакарлиқ идеялиригә вә тәшәббуслириға беғишланған китапларниң тонуштуруш мәрасими өткүзүлди. Йеңи китаплар Нурсултан Назарбаевниң көпқирлиқ сәясий паалийитини вә надир тәҗрибисини ачиду. Мәсилән, “Нурсултан Назарбаев: Лидерлиқ стратегияси” намлиқ китап икки томдин ибарәт болуп, Елбасыниң Қазақстан Компартияси Мәркизий Комитетиниң биринчи кативи болуп тайинлинишидин тартип башланған 30 жиллиқ дөләт паалийити, Нурсултан Назарбаевниң Қазақстанниң ихтисадий-сәясий тәрққиятиға қошқан бебаһа һәссиси, униң дуния бирләшмисиниң суверен дөләтни етирап қилишидики тарихий роли тоғрилиқ һекайә қилиду. “Елбасы замандашлириниң әслимилири” китавида Нурсултан Назарбаевниң сәпдашлириниң мақалилири орун алған. Әнди “Нурсултан Назарбаевниң евразиялик тәшәббуслири: тарихи, һазирқи әһвали вә истиқбали” китави болса, евразиялик интеграция идеясиниң 25 жиллиғиға вә Евразия Ихтисадий иттипақи тоғрилиқ шәртнаминиң имзалинишиниң бәш жиллиғиға беғишланған. – Тарихий әһмийити нуқтәий нәзәридин алғанда мошу барлиқ китапларни бирла баш мавзу бирләштүриду – уларниң һәрбири Қазақстанниң Тунҗа Президенти – Елбасы Нурсултан Назарбаевниң дөләтчиликни қуруш вә һәртәрәплимә мустәһкәмләш, көпмилләтлик Қазақстан хәлқини бирләштүрүш, турақлиқ, гүлләнгән җәмийәтни шәкилләндүрүш, йетәкчи дөләтләр билән һәмкарлиқ вә шерикликни тәрәққий әткүзүш бойичә көпқирлиқ сәясий паалийитини һәм надир тәҗрибисини, шундақла униң течлиқпәрвәрлик идеялирини ачиду, – деди Елбасы Китапханисиниң мудири, сәясәтшунаслиқ пәнлириниң доктори, профессор Әмирхан Рахимжанов. Униң сөзичә, мәзкүр китаплар “Қазақстан Җумһурийитиниң Тунҗа Президенти – Елбасы Нурсултан Назарбаев: дөләт башқуруш стратегияси вә лидерлиқ феномени” илмий программиси даирисидә тәйярланди. Тонуштуруш мәрасимида сөзгә чиққан Парламент Мәҗлисиниң депутати Қуаныш Султанов йеңи әвлатниң чоң әвлат зиммисигә чүшкән қийинчилиқларни баштин кәчүрмәслиги керәклигини тәкитлиди. – Көргәзмигә қоюлған китапларда мустәқилликниң неминиң бәдилигә кәлгәнлиги тоғрилиқ әхбарат әкис әткән вә у бизни мустәқилликни қәдирләшкә үгитиду. Шундақ екән, бизниң пәрзимиз – шундақ әдәбиятни аммибаплаштуруш, яшларниң мәмликәт мустәқиллигиниң, дөләт бехәтәрлигиниң, өз хәлқиниң вәтәнпәрвәри болушниң қандақ екәнлигини чүшиниши үчүн уларни яшлар арисида тарқитиш, – дәп тәкитлиди депутат. Китапларни тонуштуруш мәрасимида шундақла М.Ломоносов намидики Москва дөләт университети Қазақстан шөбисиниң мудири ихтисат пәнлириниң доктори Александр Сидорович, Қазақстанниң биринчи ташқи ишлар министри Төлетай Сүлейменов, Қазақстан Җумһурийитиниң Тунҗа Президенти – Елбасы Фонди иҗраий мудириниң орунбасари, әдлийә пәнлириниң доктори, профессор Игорь Рогов, дөләт вә җәмийәт әрбаби, техника пәнлириниң доктори Қабидолла Сарекенов вә башқилар сөзгә чиқти. Шуни қошумчә қилиш керәкки, жуқурида атап өтүлгән нәширләрниң арисида Қазақстан Тунҗа Президентиниң течлиқ тәшәббуслириға вә Елбасыниң пүткүл инсанийәт мәнпийити үчүн ядро қуралидин азат зониларни қуруш сәяситигә беғишланған “Ядросиз дуния йолида: Елбасы тәшәббуслири” намлиқ китап, шундақла Елбасыниң Қазақстан җәмийитиниң йеңи үлгисиниң асасини салғучи сүпитидики роли әкис әткән “Мәңгілік Ел” идеяси”: өтмүш, һазирқи дәвир, келәчәк” қатарлиқ коллективлиқ монографияму бар.

29 рет

көрсетілді

0

пікір
Алдыңғы мақала Миллий оюндин мусабиқә
Келесі мақала Баш муфти сайланди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *