• Йеңилиқлар
• 12 Ақпан, 2020

Қазақстан хәлқи Ассамблеясиниң Жамбул вилайитидики вақиәләргә бағлиқ билдүрүши

Қордайда йүз бәргән вақиәләр мәмликәтниң һәрбир гражданиниң қәлбидә җиддий тәшвиш пәйда қилди. Паҗиә йүз бәрди – гражданлиримиз һалак болди. Қазақстан хәлқи Ассамблеяси һалак болғанларниң уруқ-туққанлири билән йеқинлириға сәмимий тәзийә билдүриду, зәрдап чәккәнләрниң чапсанирақ сақийип кетишини тиләйду. Дөләт рәһбири тоқунуш ақивәтлирини йоқитиш бойичә асаслиқ тапшурмиларни бәрди. Биз Қазақстан хәлқигә мошу күч-қувәтни қоллап-қувәтләш вә уларни әмәлгә ашурушқа һәртәрәплимә ярдәм қилиш чақириғи билән мураҗиәт қилимиз. Мошу тапшурмиларға мувапиқ, Ассамблея мәмликәтниң барлиқ регионлирида чүшәндүрүш ишлирини, этномәдәнийәт бирләшмилири билән жиғинларни өткүзди. Ассамблея әзалири “җинайәт – милләткә бөлүнмәйду” дегән пикирни толуқ қоллап-қувәтләйду вә гунакарлар ениқлинип, қанун бойичә җазаға тартилиши керәк, дәп һесаплайду. Шуңлашқа бүгүнки күндә әң асасий вәзипә – иғвагәрликкә берилмәслик, айрим вәкиллири әмәлгә ашуруватқан тәртипсизликләр үчүн пүтүнсүрүк милләтләрни әйипләшкә йол қоймаслиқ. Ассамблея хәлиқ даналиғиға ишәнчә билдүргүч, мәмликәт гражданлиридин, һәммидин авал яшлардин, елимиздики течлиқ вә разимәнликкә сәлбий тәсир, өзлиригә зиян йәткүзидиған, алдирақсанлиққа елип келидиған қәдәмләр билән иш-һәрикәтләрдин сақ болушни сорайду. Қазақстан хәлқиниң бир-бири билән һәр дайим қериндашлиқ мунасивәтниң ярқин үлгиси болғанлиғиға вә шундақ болуп қалидиғанлиғиға ишинимиз. Балилиримизниң умумий келәчиги үчүн миллий адавәтниң пәйда болушиға йол қоймаслиғимиз керәк. Биз гражданларни ялған миш-мишларға ишәнмәй, һоқуқ қоғдаш органлириға җәмийәтлик бехәтәрликни вә адәмләрниң хатирҗәмлигини тәминләштә ярдәм қилишқа, мәмликитимиздә течлиқ вә хатирҗәмликни сақлашқа чақиримиз.