• Турнир
• 05 Наурыз, 2020

Устаз һөрмитигә беғишланди

Рашидәм РӘҺМАНОВА, «Уйғур авази» Йеңишәрлик Камил Ибрагимов һәққидә биз буниңдин бәш жил илгири язған едуқ. У Қариғанда шәһиридә өткән ҚҖ әмгиги сиңгән мәшиқләндүргүчиси Амантай Жарасовниң хатирисигә беғишланған ІІІ җумһурийәтлик турнирда 1994 – 1996-жиллири туғулған яшлар арисида ІІ орундин көрүнгән еди. Камил мәктәптин кейин спорт колледжида оқуди. Һәрбий сәптә жүргинидиму спорт билән шуғулланди. Тинимсиз әмгиги, күч вә ғәйрити түпәйли егиз чоққиларни беқиндурди. Бүгүн Камил – Қазақстанниң хизмәт көрсәткән мәшиқләндүргүчиси. Һазир у Әмгәкчиқазақ наһийәсидә спорт саһасиниң тәрәққий етиши үчүн тәр төкүватиду. Ишиктә шәһиридики спорт вә сағламлаштуруш комплексида ишләйду. Йеңишәр, Космос вә Ават йезилириниң балилирини мәшиқләндүриду. Йеқинда Камил Ибрагимов Ават йезисиниң Мәдәнийәт өйидә спорт мәйданидики устази – Қуантай Жилқибаевниң хатирисигә беғишлап, 2007 —2010-жиллири туғулған яшлар арисида дзюдо бойичә вилайәтлик турнир уюштурди. Қуантай Жилқибаев 1960-жили Йеңишәрдә туғулуп-өсти. Һәрбий борчини өтәп кәлгәндин кейин мәшиқләндүргүчиси Леонид Орлов вә спортқа интайин йеқин жутдиши Алимҗан Семәтов билән бирликтә күрәш бойичә секция ачти. Шуниңдин бери йезидин Камил Ибрагимов, Гүлназ Нурдинова, Гөзәл Аюпов, Мухамедали Мавлюдов, Дамир Бекесов, Ануарбек Ахмет вә Расул Әршидинов қатарлиқ чемпионлар йетилип чиқти. 25 бала спорт маһирлиғиға намзат аталди. Мусабиқиниң тәнтәнилик қисмида Әмгәкчиқазақ наһийәлик Балилар вә өсмүрләр спорт мәктивиниң мудири Абай Сырғабаев Қуантай Жилқибаев һәққидә иллиқ әслимилири билән бөлүшти. Мәрһум мәшиқләндүргүчиниң хатирисигә беғишланған алийҗанап ишни қолға алған Камил Ибрагимовқа вә униңға йеқиндин ярдәм қилған момиси, Әмгәкчиқазақ наһийәлик Уйғур этномәдәнийәт мәркизи Йеңишәр йезилиқ шөбисиниң рәиси Сархан Имамзароваға вә ата-анисиға наһийә рәһбәрлиги намидин миннәтдарлиқ билдүрүп, униңға турнирни һәр жили уюштуруп турушни җекиди. Турнирда ғалип чиққан яш палванлар кубок, диплом вә пәхрий ярлиқлар билән тәғдирләнди. Шуниңдин кейин Камил Ибрагимовниң аилиси тәрипидин Қуантай Жилқибаевниң роһиға атап нәзир берилди. СҮРӘТТӘ: К.Ибрагимов (солда) шагиртлири билән. Әмгәкчиқазақ наһийәси.