• Йеңилиқлар
• 18 Наурыз, 2020

Мукапат – бир бөлмилик өй вә... мәслиһәтчи

Алмута шәһәрлик билим башқармиси елан қилған “Жил муәллими” конкурси давамлишиватиду. Насирахун РОЗАХУНОВ, “Уйғур авази” — Мәзкүр конкурсниң паалийитини тохтатқанлиғиға хелә жиллар болди, – дәйду билим бериштә йеңи технологияләрни җарий қилиш бойичә шәһәрлик илмий-методикилиқ мәркизиниң мудири Андрей Дупик. – Бу жили шәһәр һакими Бақытжан Сағынтаевниң қоллап-қувәтлиши билән у қайта тикләнди. Риқабәткә қабил, тәҗрибилик вә маһир устаз статусини ашуруш, униң иҗадий қабилийитини ечиш үчүн тегишлик шараит яритиш, шундақла оқутулидиған материалниң сүпитини ашуруш — конкурсниң асасий мәхсити болуп һесаплиниду. Буниңдин ташқири биз инновациялик иш тәҗрибисигә егә устазларниму рәғбәтләндүрүшни нийәт қиливатимиз. Бу, өз новитидә, оқуғучиларда очуқ пикирликни вә риқабәтчиликни, шундақла функционаллиқ саватни шәкилләндүрүшкә ярдәм бериду. Конкурсқа үзүлүшсиз бәшжиллиқ әмгәк стажиға егә вә билим бериш мәһкимисидә кам дегәндә үч жилдин ошуқ вақит ишләватқан барлиқ пәнләрниң устазлири иштрак қилалайду. Конкурс үч басқучқа бөлүнгән – биринчиси мәктәпләрдә өтти, иккинчиси, наһийәлик (мартта өтүватиду) вә шәһәрлик (апрель вә май айлирида өтиду). Әпсус, күтүлмигән мәктәп тәтиллириниң башлиниши билән конкурсниң бир қисми сентябрь ейиға қалдурулуши мүмкин. Һазирқи күндә мусабиқиниң наһийәлик басқучиға 410 педагог чиқти, әнди бәш басқучтин өтидиған шәһәрлик конкурста пәқәт 40 устаз қалиду. Улар, җүмлидин очуқ дәрисләрни вә синип саатлирини өткүзиду. Шундақла “Алматы” телеканилида очуқ тонуштурушму көздә тутулған. Бу йәрдә тамашибинлар SMS арқилиқ конкурсниң ениқ бир қатнашқучиси үчүн аваз берәләйду. Әнди ғалиплар тәғдирлинидиған мукапатларға тохтилайли: Гран-при егисигә бир бөлмилик өй вә “Алмута шәһириниң жил муәллими” унвани берилиду. Биринчи орунни егилигән устазға автомобиль берилсә, иккинчи вә үчинчи орундикиләргә бир қетимлиқ ахча мукапити көздә тутулған (2,5 миллион вә 1 миллион тәңгә). Әң яхши устаз һакимниң билим бойичә мәслиһәтчиси сүпитидә тәвсийә қилиниду. Шундақла мукапатлиқ орунларни егилигән қалған устазлар, шәһәр рәһбириниң тәкливи бойичә, билим бериш тәшкилатлириниң рәһбәрлиги резервиға киргүзүлиду.