• Йеңилиқлар
• 18 Наурыз, 2020

Бехәтәрлик чарилири күчәйтилди

Қазақстан Президенти өткән пәйшәнбә күни бирқатар дөләт органлириниң рәһбәрлири билән кеңәшмә өткүзди. Президент Қасым-Жомарт Тоқаев кеңәшмә давамида саламәтликни сақлаш министри Елжан Биртановниң Дуниявий саламәтликни сақлаш тәшкилатиниң таҗсиман вирусни пандемия дәп елан қилишиға бағлиқ дуниядики вәзийәт тоғрилиқ докладини тиңшиди. Министр Дуниявий саламәтликни сақлаш тәшкилатиниң инфекциягә қарши күришиш бойичә тәвсийәлириниң мәзмуни, шундақла Қазақстан гражданлириниң бехәтәрлигини тәминләшкә мунасивәтлик көрүлүватқан чариләр тоғрилиқ әхбарат бәрди. Дөләт рәһбири Һөкүмәткә һәм башқа дөләт органлириға вирусниң киришигә вә тарқилишиға йол қоймаслиққа қаритилған чариләрни күчәйтиш бойичә ениқ тапшурмиларни бәрди. Җүмлидин аммивий мәдәний вә спорт чарә-тәдбирлирини, конференцияләрни вә көргәзмиләрни өткүзүш вақитлиқ мәнъий қилинди. Сода мәркәзлирини, базарларни, озуқ-түлүк санаити объектлирини, вокзалларни вә аэропортларни қошуп һесаплиғанда, адәмләр нурғун топлинидиған барлиқ җайларда санитарлиқ тәртип күчәйтилиду. Мәктәпләрдә әтиязлиқ тәтилниң башлиниши 2020-жилниң 16-март күнигә алмаштурулди, алий оқуш орунлири жирақтин оқутушқа көчиду. Хәлиқара авиация жүк тошушқиму қошумчә чәкләш чарилири җарий қилиниду. Президент гражданларни озуқ-түлүк мәһсулати вә биринчи новәттә лазим болидиған товарлар билән тохталсиз тәминләшниң зөрүр екәнлигини алаһидә атап көрсәтти. Қасым-Жомарт Тоқаев шундақла чәкләш чарилириниң кичик вә оттура тиҗарәткә зиян йәткүзмәслиги керәклигини тәкитлиди.