• "Birgemiz"
  • 07 Мамыр, 2020

“Билалға миң рәхмәт!”

Иврайим БАРАТОВ, “Уйғур авази” Дунияни зил-зилигә салған таҗсиман вирусниң аләм ихтисадиға йәткүзгән зийини, мутәхәссисләрниң пикричә, бирнәччә триллион АҚШ доллирини тәшкил қилидекән. Бу 2008 – 2009-жиллири йүз бәргән ихтисадий боһран кәлтүргән чиқимдин хелила нурғун болуп, ихтисатниң турақлиниши үчүн кам дегәндә 3-4 жил һаҗәтмиш. Әгәр әһвал һәқиқәтәнму мошундақ болса, буниңдин, әлвәттә, Қазақстанму истисна әмәс. Мана мошуни нәзәрдә тутқан елимиз Президенти Қасым-Жомарт Тоқаев һәрқандақ дөләт ихтисадиниң локомотиви болған кичик вә оттура тиҗарәт субъектлирини қоллап-қувәтләш үчүн қошумчә миллиардлиған тәңгә бөлди, һәрхил селиқ төләмлиридин жил ахириғичә азат қилди, пәвқуладдә әһвал җәриянида илаҗисиз өз паалийитини тохтатқан ишләпчиқириш орунлири тартқан зиянниң орнини толтуруш чарилири көрүлмәктә. Бу ихтисатқа мунасивәтлик мәсилиләр. Әнди пәвқуладдә әһвал вә карантин түпәйли тапавитидин айрилған шәхсләргә көрситиливатқан маддий ярдәм ихтисатни қоллап-қувәтләш үчүн бөлүнүватқан мәбләғдин һәргиз кам әмәс. Пәвқуладдә әһвал җарий қилинғандин буян елимиздә төрт миллиондин ошуқ адәм әң төвәнки мааш (42 500 тәңгә) миқдарида иҗтимаий ярдәм алғанлиғи, уларға шунчилик миқдарда йәнә бир қетим иҗтимаий ярдәм берилидиғанлиғи, тәминати начар аилиләр үчүн 15 000 тәңгә коммуналлиқ төләм қараштурулғанлиғи, “Біз біргеміз” җәмийәтлик фондиниң миңлиған аилигә маддий ярдәм көрсәткәнлиги вә һаказилар елимизниң өз гражданлириға болған һәқиқий ғәмхорлуғиниң ярқин испатидур. Һә, мана мошундақ әл бешиға чүшкән еғир күнләрдә жүригидә оти бар, елим, хәлқим дәп көйүнидиған адәмләрниң йенимиздин тепилидиғанлиғи һәркимни хошал қилса керәк. Болупму тапқинини турмуш шараити начар аилиләр билән тәң бөлүшүп үгинип қалған сахавәтлик инсанлар бу қетимму чәттә қалғини йоқ. Шуларниң бири – Алмутидики “Техноград” сода мәркизиниң баш мудири Билал Һошуров. Билал Тәлъәтоғли өзиниң кәң хәйрихаһлиқ паалийити билән тонулған көрнәклик бизнесмен, елимиздә дәсләпкиләрдин болуп тиҗарәтниң Интернет-дукан шәклини қолға алған вә уни бүгүнкидәк тәрәққият дәриҗисигә йәткүзгән ишбиләрмән шәхс. У өткән һәптидә өзи туғулуп өскән Әмгәкчиқазақ наһийәсиниң Челәк регионидики тәминати начар көпбалилиқ аилиләргә, накалар билән житим-йесирларға, баққучисидин айрилған қериларға, җәми бәш йүз аилигә, озуқ-түлүк севитини ианә қилди. Севәт тәркивидә бир мишкап ун, қәнт, макарон мәһсулатлири, бәш литр май, гөш вә башқиму күндиликтә көпләп истимал қилинидиған озуқ-түлүк мәһсулатлири бар. Бу хәйрихаһлиқ озуқ-түлүк севәтлирини пидаийлар Челәк регионидики барлиқ жутларниң жигитбашлири, җәмийәтлик ишларниң активистлири ениқлиған тизим бойичә өйлиригә йәткүзүп бәрди. Мошу ишларниң қайнимида жүргән Челәк йезисидики 1-оттура мәктәпниң мудири Ардақ Мухаметжанова бизгә мундақ деди: – Мән әң алди билән Билал инимға барлиқ наһийә хәлқи намидин алаһидә миннәтдарлиқ изһар қилғум келиду. Мундақ хәйрихаһлиқ иш пәқәт Билал Тәлъәтоғли охшаш сехи қәлб инсанларғила тәәллуқ болса керәк. Ейтмақчи, мән Билалниң дадиси Тәлъәт ака билән аниси Айшәм һәдини яхши биләттим. Челәктики абройлуқ инсанлардин еди. Мошундақ аилидә тәрбийә көргән Билал мениң илтимасимни рәт қилмайдиғанлиғини сәзгән едим. “Илтимасим” дәватқинимниң сәвәви, мошу еғир күнләрдә турмуш шараити начар аилиләргә ярдәм бериш илтимаси билән Билалға мураҗиәт қилдим. У дәрһал өзиму шундақ нийәттә жүргәнлигини, бу ярдәмни Рамзан ейиниң биринчи күни әмәлгә ашурушни көңлигә пүкүп қойғанлиғини ейтти. Иним сөзидә турди. Әтә Роза башлиниду дегән күни озуқ-түлүк бесилған жүк машинилири Челәккә йетип кәлди. Биз уларни жут-жутларға тәхсим қилип, Билалниң аманитини алдин-ала ениқланған адәмләргә йәткүзүп бәрдуқ. Озуқ-түлүк севитини алған адәмләрниң разилиғини аддий тил билән йәткүзүш тәс, һәтта хошаллиғидин көз-яш қилғанларму бар. Тохсән яшлиқ бир ақсақал Билалға бәргән дуасида “Йүз яша, оғлум! Хәлиқ ғемини ойлиған жүригиңдики отуң, билигиңдики күчүң саңа дайим мәдәт бәргәй!” дәп ейтқанда, йәнә бир көпбалилиқ ана “Янчуғидики пулини натонуш бирлиридин әмәс, бәлки өзиниң қериндишидин аяйдиғанларни көргәнмән, бирақ маңлай тәри билән тапқан пулини һечкимдин айимайдиған инсанни – ениқ ейтсам, Билал баламни — биринчи қетим көрүватимән” дәп көзигә яш алғанда, бизниң Билал Тәлъәтоғлиға болған миннәтдарлиғимиз Алитағдин алқип кәткәндәк билинди... — Мундақ миннәтдарлиқни биз Байсейит йезисидики алтә балиниң атиси Үсән Илиевтинму аңлидуқ, – дәйду мәзкүр йезидики И.Тайиров намидики оттура мәктәпниң мудири Илияр Нурхалиқов. – Билал бу қетим таҗсиман вирус пандемиясигә бағлиқ елан қилинған карантин вә улуқ Рамзан ейиниң башлиниши мунасивити билән йезимиздики тәминати начар 44 аилигә озуқ-түлүк севитини әвәтипту. Бәк рази болдуқ. Уларни жутумизниң жигитбеши Ғилаждин Һосмановниң рәһбәрлигидики активистлар егилири йәткүзүп бәрди. Мән, пурсәттин пайдилинип, Билал Тәлъәтоғлиниң мошу қетим йезимиздики тәминати начар он бир аилигә балилириниң өйдә олтирип бемалал оқуши үчүн Интернет-модем елип бәргәнлигини, мәктивимизниң спорт залини мурәккәп җөндәштин өткүзүш үчүн һаҗәтлик миқдарда мәбләғ бәргәнлигини вә һәр жили оқуғучилиримизға йеңижиллиқ соғиларни әвәтиватқанлиғини пәхирлиниш илкидә тәкитлигүм келиду. Сахавәтлик Билал Тәлъәтоғлиға жутдашлиримизниң ейтар алқиши чәксиз. Ахирида әл бешиға чүшкән еғирчилиқни өз зиммисидә көтириш истиги түпәйли мошундақ яхши башланмиларниң тәшәббускари һәм дәвәтчиси болуватқан Билал Тәлъәтоғли Һошуровниң ишиға утуқ тиләп, жүрәктин чиққан ианиниң жүрәкләргә йетидиғанлиғини алаһидә тәкитлигүмиз келиду, халас.

219 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы