• Әхбаратлар еқими
• 20 Мамыр, 2020

Димашниң нахшиси рекорд орнатмақта

Исми аләмгә мәшһур қазақстанлиқ нахшичи Димаш Қудайбергенниң «We Are One» («Биз биллә») намлиқ нахшисини Интернетта 100 миллиондин ошуқ тамашибин көргән вә Хитайниң QQ Muzic музыкилиқ мәйданчисиниң алтун сертификатиға еришти. Димашниң бу нахшиси таҗсиман вируси пандемиясигә қарши күрәшкә беғишланған. Мәлумки, бийил 16-апрель күни Димаш таҗсиман вирусқа қарши күришиватқан медицина хадимлирини қоллап-қувәтләш мәхситидә йеңи композицияни язди. Нахшиниң видеоклипида пандемия билән күришиватқан барлиқ әлләрдин кадрлар, вирусқа қарши күрәшниң алдинқи сепидә ишләватқан дохтурларниң мәшәқәтлик әмгиги намайиш қилиниду. «Һазир пүткүл дуния вирусқа қарши күрәш жүргүзүватиду. Вирус һечбир дөләтни айлинип өтмиди. Медицина хадимлири дәсләпкиләрдин болуп униңға тақабил турмақта. Бизниң вәзипимиз – уларни мошу бир қийин пәйттә қоллап-қувәтләш. Музыкиниң ярдими билән биз медикларға, полиция хадимлириға вә һәрбийләргә апирин ейтимиз», дәп тәкитләнгән Димаш тарқатқан хәвәрләрдә. Бәш минутқа созулған клипта нахшичи һазир пидакаранә әмгәк қиливатқан пүткүл дунияниң медицина хадимлирини көрсәткән.