• Йеңилиқлар
• 04 Маусым, 2020

Йәнә БМТ һәққидә

Қазақстан Җумһурийитиниң Билим вә пән министрлиги елимиздә Биртуташ миллий тестниң қачан өткүзүлидиғанлиғини бәлгүлиди. Биртуташ миллий тест 20-июнь – 5-июль арилиғида өткүзүлиду, буниңда санитариялик-эпидемилогиялик қаидиләргә қәтъий әмәл қилиниду. Тест 1200дин ошуқ аудиториядә өткүзүлүп, улар тавакәлчиликни кемитиш үчүн 50 пайиз толтурулди. Бу тоғрилиқ сешәнбә күни өткән Һөкүмәт мәҗлисидә билим вә пән министри Асхат Аймағамбетов ейтип өтти. – Таҗсиман вирус инфекциясиниң тарқилиш тавакәлчилигини кемитиш үчүн бәш дезинфекция чариси қоллинилиду, йәни тәләпкарлар дезинфекция тоннели арқилиқ өтиду, мәхсус дезинфекция көрпичисини дәссәп өтиду, қоллар санитайзерда жуйилиду, тән һарарити тәкшүрүлүп, бирқетимлиқ ниқап берилиду. Биз БМТ өткүзүлидиған һәммә йәрдә санитария тәләплирини сақлаймиз, – деди министр. 2020-жили тест өткүзүш тәртиви өзгәрмиди. Учумкарлар бәш пәндин тест тапшуруп, уларниң үчи мәҗбурий вә иккиси саһалиқ пән. Барлиғи болуп 120 тест тапшуруғи болуп, улардин 140 балл елишқа болиду. Биртуташ миллий тест тапшурушқа барлиғи болуп 131 755 әризә берилди. Учумкарларниң ата-анисиға тест тапшуруш пунктлири йенида балилирини қоллап-қувәтләш вә күтүш мәнъий қилинди. – Ата-анилар вә тәләпкарларни қоллап-қувәтләватқан башқа адәмләргә БМТ тапшуруш территориясидә болуш мәнъий қилинди. Тестниң өткүзүлүшини байқаш имканийитини беридиған онлайн-трансляция жүргүзүлиду, дәп тәкитлиди Асхат Аймағамбетов. БМТ өткүзүлидиған пунктлар мәхсус баррикада лентилири билән қоршилиду. Тест тапшуруш вақтида учумкарлар оттурисида икки метрлиқ арилиқ тәминлиниду. Министр шундақла қандақ әһвалда БМТ нәтиҗилириниң һесапқа елинмайдиғанлиғини ейтип өтти. – Әгәр БМТ тапшуруш вақтида үмүткарлардин мәнъий қилинған нәрсиләр тепилса, яки бу факт видеобайқашни тәкшүрүш вақтида ениқланса, БМТ нәтиҗилири вә билим гранти рәт қилиниду. БМТ қатнашқучилириға калькулятор берилиду, шундақла тест тапшуруш вақтиму төрт саатқичә узартилди, – деди Билим вә пән министри. Идарә рәһбири шундақла тәләпкарларниң БМТқа тәйярлиқ көрүши үчүн министрлик сайтида тестларниң 70 вариантиниң берилгәнлигини қошумчә қилди. – Шундақла бийил учумкарлар мәктәпләрдики хуласә емтиһанлиридин бошитилди. Сөзсизки, буму улар үчүн чоң ярдәм болуп һесаплиниду, – дәп хуласилиди Асхат Аймағамбетов.