• Йеңилиқлар
• 04 Маусым, 2020

Йеңи мәркәз ечилди

Дөләт рәһбириниң тапшурмиси бойичә Алмутида Җәмийәтлик қобулхана (Open Space) шәклидә Аntikorortalygy йеңи хизмәт мәркизи ечилди. Шөһрәт МӘСИМОВ, «Уйғур авази» Мәркәзниң ечилишиға Алмута шәһириниң һакими Бақытжан Сағынтаев, Қазақстан Җумһурийити Коррупциягә қарши туруш агентлиғиниң рәиси Алик Шпекбаев, Тунҗа Президент Фонди иҗраий мудириниң орунбасари Игорь Рогов, җәмийәтлик тәшкилатларниң, академия даирилириниң, һоқуқ қоғдаш органлириниң вәкиллири қатнашти. Мәзкүр мәркәз аһали билән өзара һәрикәт қилишниң йеңи нәтиҗидарлиқ шәкли болуп, гражданларниң ишәнчисини ашуруш вәзиписини атқуриду. – Мәмликәт Президенти тәрипидин елан қилинған «Хәлиқ авазиға қулақ салидиған дөләт» принципиға мувапиқ әкис алақини күчәйтиш вә шәһәр турғунлири алдида очуқлуқни тәминләш бойичә чоң ишлар жүргүзүлүватиду. Шуниң билән биллә онлайн түридә көрситиливатқан дөләт хизмәтлириниңму көләми өсүп, бу, өз новитидә, җәмийәт тәләплирини һәл қилишқа иҗабий тәсирини йәткүзмәктә, – дәп тәкитлиди мәркәзниң ечилиш мәрасимида сөзгә чиққан Бақытжан Сағынтаев. Қазақстан Җумһурийити Коррупциягә қарши туруш агентлиғиниң рәиси Алик Шпекбаев өз сөзидә дөләт органлири тәрипидин хизмәт қилиш яндишишлирини өзгәртишниң муқәррәр җәриян екәнлигини тәкитлиди. – Бүгүнки таңда биз әмәлдарларниң тәшкилий мәдәнийитиниң қандақ өзгириватқанлиғини көрүватимиз, йәни дөләт хизмәтчилири билән рәһбәрләр гражданларға йеқин болуватиду. Тәҗрибә-әмәлиятниң көрситишичә, мураҗиәтләр вә шикайәтләр билән ишләш, диққәтни ениқ проблемилиқ мәсилиләргә ағдуруш вә уларни һәл қилиш коррупцияниң алдини елишниң, демәк, гражданларниң ишәнчисини ашурушниң нәтиҗидарлиқ усули болмақта, – деди Алик Шпекбаев. Тунҗа Президент Фонди иҗраий мудириниң орунбасари Игорь Рогов өз новитидә гражданлар проблемилириға диққәт бөлүшниң Коррупциягә қарши туруш агентлиғи актив илгирилитиватқан адәмгәрчилик идеологиясиниң асасий тәркивий қисми болуп һесаплинидиғанлиғини тәкитләп өтти. Әнди йеңи хизмәт мәркизиниң қандақ ишларни әмәлгә ашуридиғанлиғиға кәлсәк, у коррупциягә қарши туруш мәсилилири бойичә әризиләрни қобул қилиду, мәслиһәт бериду, шундақла җамаәтчилик, һөкүмәтлик әмәс тәшкилатлар, яшлар тәшкилатлири, диний вә этномәдәний бирләшмиләрниң, дөләт вә һоқуқ қоғдаш органлириниң коррупциягә қарши туруш бойичә күч-қувитини бирләштүриду.