• Саламәтлик пасибанлири
  • 11 Маусым, 2020

Кәсипкә садақәт

Кәсип таллашқа һәрким һәрхил яндишидекән. Бирлири ата-анисиниң изи билән маңса, бирлиригә устазлири, қериндашлар йол көрситип мәслиһәт бериду. Лекин саламәтлик сақчиси болуш үчүн жүрәк хаһиши болмиса, бу шәрәплик кәсипниң һөддисидин чиқиш натайин гәп. Турғанҗан Велиев әйнә шундақ дохтур болушни кичигидин арман қилип, мәхситигә йәткән вә бу саһаға һаятиниң 40 жилини беғишлиған адәм. У паалийитини Панфилов наһийәлик дохтурханида участкилиқ педиатр болуштин башлиған еди. Һазир жуқумлуқ ағриқлар бөлүминиң башлиғи. Турғанҗан ака хәлиқ саламәтлигини сақлаш йолида тинмай, иҗадий издинип, хизмитини шәрәп билән атқуруватқан салаһийәтлик мутәхәссис. Тәкитләш керәкки, алий дәриҗилик дохтур Турғанҗан Абдримоғлиниң изини бесип қизи Арзигүл — фельдшер, оғли Алимҗан врач-кинезитерапевт болуп ишләватиду. Гөһәрбүви ИСМАЙИЛҖАНОВА, «Уйғур авази» Турғанҗан Велиев, Яркәнт шәһиридики С.Киров (һазирқи Х.Һәмраев намидики уйғур оттура мәктивини алтун медальға тамамлап, Алмутидики С.Асфендияров намидики медицинилиқ институтниң педиатрия факультетида тәһсил көрди. Оқуп жүрүп, Алмута шәһиридики 1-жуқумлуқ ағриқлар клиникисида ишләп, нәзәрийәвий билим билән тәҗрибини биллә елип барди. Қолиға диплом елип, алий билимлик мутәхәссис сүпитидә әмгәк паалийитини ана жутида — Панфилов наһийәлик ағриқханиниң балилар консультациясидә участкилиқ дохтур болуштин башлиди. Институтта алған нәзәрийәвий билимини әмәлиятта пайдиланған һалда балиларда учришидиған һәрхил ағриқларни давалашта кәсипдашлири арисида алаһидә көзгә чүшти. Мәсъулийәтчанлиқ билән паалийәт елип бериватқан дохтурни наһийә рәһбәрлиги 1988-жили балилар консультациясиниң башлиғи қилип тайинлиди. — Жуқумлуқ ағриқлар көпинчә һава арқилиқ, қан арқилиқ, ғизалиниватқан тамақ арқилиқму жуқиду. Йошурушниң һаҗити йоқ, биз, бөлүм дохтурлириға, жуқумлуқ ағриқларниң һәммә түрини давалашқа тоғра кәлди вә келиватиду. Бәзидә йеңи туғулған бала қусуп, ичи өтүп қалсиму бизниң бөлүмгә тиркилиду. — Дунияни әндишигә селиватқан таҗсиман вирус билән ағриған жутдашлар тиркәлди. Бу һәқтә немә ейтқан болар едиңиз? — дәп соридим дохтурдин. — Әлвәттә бу вирус дунияниң барлиқ әллиригә тарап, униң ақивитидин көз жумуватқанлар саниниң азаймайватқанлиғи ечинишлиқ. Вирус бизниң наһийәдиму тиркәлди. Елимиздә таҗсиман вирустин сақлиниш үчүн пәвқуладдә әһвал елан қилинғини билән бу ағриқниң алдини елиш, сақлиқ чарилирини көрүш һәрикитини тез-арида қолға алдуқ. Чүнки чегариға орунлашқан наһийәгә келип-кетиватқан туристлар, хошна Хитай Җумһурийитигә сода-сетиқ билән өтүватқан тиҗарәтчиләр наһайити көп болғанлиқтин, биз мана шундақ жил бешидин, йәни 28-январьдин башлап сақлиқ чарилиригә кириштуқ. Наһийәлик ағриқханиниң баш дохтури Төлеу Сарпеков билән бирликтә дәсләп чегариниң у йеқиға өтүватқан вә у әлдин бизниң наһийәгә, биз арқилиқ үчинчи бир дөләткә өтүш үчүн кәлгән шоферлар, туристлар он төрт күн карантиға ятқузулуп, анализ елинип, тәкүшүрүлгәндин кейинла мәнзилигә әвәтилди. Тәкитләш керәкки, биз бөлүмни әсвап-үскиниләр билән тәминләп, провизорлуқ, обсервациялиқ бөлүм вә изоляторға айландурдуқ. Шундақ қаттиқ, җиддий назарәт қилған тәғдирдиму икки әһвал тиркәлди. Улар даваланди. Биз һәқиқәтәнму «Силәр өйдә болуңлар, биз силәр үчүн ишта!» дегән шиарға әмәл қилдуқ. Карантин чарилири аяқлашқини билән вирустин сақлиниш чарилири техи тохтимиди. Чүнки «Сақланғанни сақлайду» демәкчи, һәрқайсимиз сақлиқ чарилиригә риайә қилған һалда, адәмләр көп жиғилидиған җайларда еһтият болуп, дукан, базар, иш орунлиримизда ниқап тақап, дайим пакиз жүрүп, әтрапимизни таза тутушни илтимас қилған болар едим, — деди Турғанҗан ака. Мана шундақ кечә-күндүз хәлиқ саламәтлиги йолида тинмай, издинип ишләватқан Турғанҗан Велиевниң кәсипдашлири арисида аброй-инавити жуқури. Тәҗрибилик дохтурниң көпжиллиқ әмгиги мунасип баһалинип, елимизниң тунҗа Президенти Нурсултан Назарбаевниң Тәшәккүрнамиси, Алмута вилайәтлик саламәтлик сақлаш башқармисиниң пәхрий ярлиқлири, «Қазақстан Республикасына — 25 жыл» тәвәллудлуқ медаль билән мукапатланди. Шундақла 2018-жили Турғанҗан Велиевниң исми «Избранные люди года» чоң энциклопедиясигә киргүзүлди. Йәни Россия, Әрмәнстан, Белоруссия вә Қазақстанниң тәҗрибилик дохтурлириниң қатаридин орун алди. Бу китапқа Қазақстандин бари-йоқи 14 саламәтлик сақчиси кирди. Турғанҗан акиниң аилиси һәққидә гәп қилимизкән, рәпиқиси Селимағча һәдимиз бухгалтер болуп ишләп, һөрмәтлик дәм елишқа чиқти. Икки яхши бир болуп, үч пәрзәнт тепип қатарға қошти. Биз жуқурида тәкитлигинимиздәк, аилидә икки пәрзәнт ата изи билән маңса, чоң оғли Қурванҗан — алий билимлик алақә хадими. Кәнҗә оғли Алимҗан наһийәдә әң аз учрайдиған дохтур- кинезитерапевт кәспини егилигән һазирчә ялғуз врач. Алимҗанму атиси охшаш Х.Һәмраев намидики мәктәпни «Алтын белгігә», С.Асфендияров намидики медицинилиқ университетни әла баһаға тамамлиған мутәхәссис. Университетни, интернатурини тамамлап, Москвада икки жил атақлиқ профессор Сергей Бубновскийниң давалаш мәркизидә тәҗрибидин өтти. Һазир «Яркәнт-аришаң» санаториясидә врач-реабилитолог, кинезитерапевт болуп ишләватиду. Яш болғиниға қаримай, Алимҗанниң қолидин шипа тепиватқанларму аз әмәс. Дохтурниң тәклип вә шикайәт журналидики иҗабий инкасларни оқуғандин кейин әйнә шундақ хуласигә кәлдуқ. Ата-бала дохтурларни вә барлиқ ақхалатлиқ меһриванларни алдимизда келиватқан кәспий мәйрими билән тәбрикләп, иш-паалийитигә утуқ, аилисигә хатирҗәмлик тиләймиз. Панфилов наһийәси. Зуһридин МӘҢСҮРОВ чүшәргән сүрәт.

352 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы