• Йеңилиқлар
• 11 Маусым, 2020

КИТни кимләр алиду?

Дөләт һал-оқити төвән аилиләр балилири үчүн капаләтләндүрүлгән иҗтимаий түркүм тәркивини бәлгүлиди. Мәлумки, балилар үчүн капаләтләндүрүлгән иҗтимаий түркүм (КИТ) һал-оқити төвән гражданларни иҗтимаий һимайә қилиш саһасидики йеңилиқларниң бири болуп һесаплиниду. КИТ — бу Қазақстан Һөкүмити бәлгүләйдиған көләм вә түри бойичә бир яштин он сәккиз яшқичә болған балилири бар һал-оқити төвән аилиләргә берилидиған ярдәм. Ярдәм муқәррәр вә шәртләнгән ахчилиқ ярдәм еливатқан һал-оқити төвән аилиләргә берилиду. Әгәр мундақ аилиләрдики балилар бир яштин алтә яшқичә болса – КИТ адреслиқ иҗтимаий ярдәм вақтида бәлгүлиниду. Алтә яштин он сәккиз яшқичә балилири бар аилиләргә КИТ тегишлик оқуш жили вақтида берилиду. Бир яштин алтә яшқичә болған балиларға КИТ һәр айда озуқ-түлүк түркүми вә һәр кварталда мәиший химия товарлири түркүми түридә берилиду. Түркүм тәркиви Һөкүмәтниң 2019-жил 30-декабрьдики тохтами билән тәстиқләнгән вә мошу яштики балиларниң физиологиялик алаһидилиги билән озуқ-түлүк һәм энергетикилиқ қиммитиниң нисбитини һесапқа алған һалда қелиплашқан. Түркүмгә тәркивидә витамин бар, кальций вә башқа микроэлементлар, анемия, рахит, дисбактериоз ағриқлириниң алдини алидиған пробиотиклар билән бейитилған хилму-хил озуқ-түлүк (сүт, көктат, мевә) мәһсулатлири киргүзүлди. Шундақла 6 – 18 яш арилиғидики балилар үчүн молҗаланған КИТ мәктәп формиси яки спорт кийимини, мәктәп қураллирини (дәптәр, қәләм вә һаказа); оқуш жилида оқуватқан җайи бойичә саламәтликни сақлаш саһасидики вакаләтлик орган бәлгүлигән нормиларға мувапиқ бир вақитлиқ иссиқ тамақни; җәмийәтлик транспортта (таксидин башқа) билет баһасиниң 50 пайизи көләмидә имтиязлиқ меңишни өз ичигә алиду.