• Йеңилиқлар
• 17 Маусым, 2020

Йеңи лаборатория ечилиду

Әмгәкчиқазақ наһийәсиниң Ишиктә шәһиридики ағриқханида җуқумлуқ ағриқларни ениқлайдиған мәхсус мәркәз, йәни ПЦР лабораторияси (ПЦР  – Polymerase chain reaction, PCR diagnostics, полимеразная цепная реакция) ечилди. Рашидәм РӘҺМАНОВА, «Уйғур авази» ПЦР лабораторияси – адәмдә таҗсиман вирус инфекцияси бәлгүлириниң бар яки йоқ екәнлигини илдам һәм ениқ көрситидиған техникилиқ васитә болуп һесаплиниду. Йәни, ушбу лабораторияниң паалийити молекулярлиқ биологиялик үлгә бойичә жүргүзүлүп, ферментларниң ярдими билән жуқумлуқ ағриқниң бәлгүлирини әтигәнирәк тепип, уни башланғуч қәрәлидила давалашқа мүмкинчилик бериду. Лаборатория Алмута вилайәтлик саламәтликни сақлаш башқармисиниң қоллап-қувәтлиши билән ечилди. Униң дәл Әмгәкчиқазақ наһийәсидә орунлишишиниң сәвәви, Ишиктидики көпсаһалиқ ағриқхана – вилайәттики әң чоң медицинилиқ мәһкимиләрниң бири болуп һесаплиниду вә лабораторияни орунлаштуруш үчүн мәһкимә рәһбәрлиги тәрипидин алдин-ала әтраплиқ тәйярлиқ чарилири уюштурулди. Җүмлидин Әмгәкчиқазақ наһийәлик көпсаһалиқ ағриқханисида таҗсиман вирус билән күрәш башланған заман, йәни 13-марттин тартип карантинлиқ стационарлиқ мәркәз қурулуп, икки һәптидин кейинла бу кесәлни жуқтурған бемарлар ятқузулушқа башлиған. Йәни, бүгүнгичә 140 бемар қобул қилинған. Уларниң ичидә 100 бемар толуқ сақийип чиққан. Бу йәрдики провизорлиқ стационарму пәвқуладдә әһвал елан қилинған күндин башлап ишләватиду. Барлиғи болуп, 86 бемар провизорлиқ назарәткә елинип, униң ичидә 80 адәм ағриқтин бирәтола сақайди. Стационарда бүгүнки күнгичә йетип, даваланған бемарларниң сани – 84. Һазир бу йәрдә 36 адәм давалиниватиду. Демәк, бу йәрдики хадимлар медицинилиқ хизмәтниң жуқумлуқ ағриқлар билән ишләшниң ушбу түри бойичә билимини ашуруп, қошумчә тәҗрибә топлиди. ПЦР лабораторияси ағриқхана бенасиниң айрим блогиға орунлаштурулди. Бу бемарларниң келип-кетиши вә тәкшүрүштин өтүп, давалиниши үчүн интайин қолайлиқ. Қошумчә қилиш лазимки, ПЦР лабораториясиниң ечилишиға «Birgemiz Jetisy» җәмийәтлик фонди һамийлиқ қилди. Әмгәкчиқазақ наһийәси.