• Йеңилиқлар
• 24 Маусым, 2020

Алмутида миллион көчәт олтарғузулиду

Өткән жили Алмута шәһириниң һакими Бақытжан Сағынтаевниң тәшәббуси билән «Jasyl Almaty» акцияси башланған еди. Униң асасий мәхсити Алмутиниң бағ шәһәр статусини қайта тикләш болди. Шәһәрниң қайси районлирида миллион көчәт олтарғузулидиғанлиғини Алмута шәһәрлик йешил ихтисат башқармисиниң рәһбири Наталья Ливинская онлайн-брифингта тәпсилий ейтип бәрди. Өткән жили шәһәрниң һәрхил кочилирида 135 миң, бийил 8 миң көчәт тикилди. Жил ахириғичә бу көрсәткүчни 257 миңға йәткүзүш мәхсәт қилинмақта. Бу ишлар асасән Алатав, Наурызбай, Жетысу наһийәлиридә әмәлгә ашурулиду. Умумән, үч жил давамида 1 миллион көчәт тикилиду. Нәтиҗидә йешилзарлиқлар билән паркларниң мәйдани көпийиду. Н.Ливинскаяниң ейтишичә, тикилидиған көчәтләргә алаһидә тәләпләр қойилиду. «Көчәтниң егизлиги 3 метр, 5 йешил йопурмиғи, диаметри 3 сантиметр, 2 жилдин ошуқ күтүмдә болуши шәрт. Дәрәқниң түри климатқа, топиға қарап бәлгүлиниду», деди Н.Ливинская. — Һазир мегаполиста 2020 — 2030-жилларға беғишланған аватлаштуруш стратегияси тәйярлиниватиду. Биз йеңи йешил зониларниң орунлирини, қери дәрәқләрни кесиш, йеңи көчәтләрни тикиш районлирини ениқлаймиз. Шәһәрниң йешил зонилириниң схемиси болиду, — деди у. Тәкитләш лазимки, һазир Алмутида 2,352 миллион дәрәқ бар.