• Елини сөйгән Елбасы!
• 02 Шілде, 2020

Сән мениң жүригимдә...

2014-жилниң май ейи еди. Узақ йол бойи Сени көз алдимға кәлтүрүп, Сән тоғрилиқ аңлиғанлиримни ой-хиялимдин өткүзүп, сүрәтлириңгә қарап зоқлинип, әҗайип бир тәвриниш, күтүш илкидә болдум. Бешимда миң соал: «Һәқиқәтән заманивийму? Һәқиқәтән гөзәлму? Әгәр яқмай қалсичу?»... Хиял... хиял. «Һечқиси йоқ, өз көзүм билән бир көргиним қалиду», дәп өзәмни җемиләп қойимән... Егиз, көк асманда күн нурини айимай чечип туриду. Немә дегән гөзәллик! Кәң, чирайлиқ кочилар, көпқәвәтлик заманивий өйләр. Вуҗудумни бир тәвриниш, көтирилиш, интилиш роһлири қаплавалди. Өзәмни худди чәт әлдә жүргәндәк һис қилдим. Бу Сән – Астана едиң! Иҗаригә алған пәтиргә жүкләрни ташлап, сениң билән бәтму-бәт учришип, тонушушни башлавәттим. Дәсләп барлиқ әхбарат васитилиридә, китапларда, журналларда биринчи болуп көзгә челиқидиған, «Бәйтереккә» көтирилдим. Униң үстидин күндин-күнгә гөзәллишиватқан шәһәр, худди алиқанда турғандәк, ениқ көрүниду. Сән һәқиқәтән чөчәкләрдикидәк гөзәл екәнсән! Андин Президент қараргаһи – «Ақорда», Астана опера вә балет театри, «Қазақ елі» монументи, «Ханшатыр» сода мәркизи вә башқиму җайларни зиярәт қилип һөзүрләндим. Үч күнүмниң қандақ өтүп кәткинини сәзмәйла қалдим. Жүригим Саңа мәңгү ашиқ болуп қалди. «Худайим буйриса, бир яхшилиқларда чоқум қайтип келимән» дәп өзәмгә өзәм вәдә бәрдим. Өткән жили июнь ейида иккимиз йәнә учраштуқ. «Назарбаев Университет» ичигә кирип, шәһәрниң ичидики шәһәргә киргәндәк болдум. Әҗайип заманивий билим дәргаһи. Мән қайил болдум. Андин өз вақтида келәлмигән болсамму көрәй дәп, «ЭКСПО-2017» Хәлиқара ихтисаслаштурулған көргәзмисигә қарап йол туттум. Мустәқил дөлитимизниң күчидин, қудритидин дерәк берип, технология, илим-пән шәһиригә айлинипсән. Сән техиму гөзәллишип, аватлишип кетипсән. Мисли көрүлмигән дәриҗидә сүръәтлик тәрәққий етип, ЮНЕСКОниң «Дуния шәһири» мукапитиға һәқиқәтәнму лайиқ баш шәһәр болуп қелиплишипсән! Жүригимдә Саңа дегән орун, муһәббитим бөләкчә! Сән магнит охшаш мени өзәңгә җәлип қилип, чоңқур тәсират қалдурған шәһәрсән. Нур-Султан – мән үчүн заманивий һаятниң қияпити, келәчәк нишани! Нур-Султан, мәйримиң билән тәбрикләймән! Тәрәққий әткин, өскин, гүлләнгин, яшниғин! Келәчәккә парлақ йолни дайим көрсәткин! Сән мениң жүригимдә – Нур-Султан! Бүвихеличәм ИМИНОВА, А.Розибақиев намидики 153-мәктәп-гимназияниң муәллими. Алмута шәһири.