• Елини сөйгән Елбасы!
  • 02 Шілде, 2020

Милләт Бәрпакари

Қазақстан Җумһурийитиниң Тунҗа Президенти — Елбасы Нурсултан Әбишоғли Назарбаев тоғрилиқ йезиш һәм қийин, һәм йеник. Қийинлиғи — бу қисқа мақалида Елбасыниң көпқирлиқ паалийитини, җүмлидин жирақтин пәмләшни билидиған жирик сәясий Әрбап екәнлигини, тарих үчүн наһайити қисқа җәриянда яш мустәқил Қазақстанни дунияға тонутқан тәкрарланмас улуқ Шәхс екәнлигини, ихтисадий-сәясий ислаһатларни изчиллиқ билән әмәлгә ашурушта дана рәһбәр екәнлигини вә, пәқәт қазақстанлиқларла әмәс, бәлки пүткүл дуния хәлқи мәмнунийәт билән тилға алидиған улуғвар башланмилар билән тәшәббусларниң қайтмас ирадилик Бәрпакари екәнлигини толуқ вә әтраплиқ йорутуш мүмкин әмәс. Әгәр биз жуқурида қәйт қилинған вақиәләрниң хронологиясини варақлап чиқидиған болсақ, ишәнчим камилки, униңға бир адәмниң оттура яш һаяти йәтмәйду. Бу пикримниң дәл шундақ екәнлигини Нурсултан Әбишоғли тоғрилиқ йезилған том-том китаплар, онлиған һөҗҗәтлик фильмлар, миңлиған публицистикилиқ мақалилар испатлап турса керәк. Шуңлашқа, қайтилаймәнки, Елбасы тоғрилиқ йезиш наһайити қийин, у жуқури җавапкәрликни, чоңқур мәсъулийәтни тәләп қилиду. Йениклиги — Елбасыға болған һөрмәт, Милләт Лидериға нисбәтән сәмимийлик. Ейтмақчи болған сөзүң ясалма болмай, қәлбиң төридин чиқса, буниңдин артуқ сәмимийлик йоқ, чүнки жүрәктин чиққан сөз жүрәккә йетиду әмәсму! Шуңлашқа қолуңға қәләмни алаһидә иштияқ билән алисән. ...Буниңдин бирнәччә жил илгири, мән техи Парламент Мәҗлисигә депутат болуп сайланмай туруп, җумһурийәтлик Уйғур этномәдәнийәт мәркизиниң рәиси сүпитидә, Елбасы билән бир дәстихан әтрапида баш қошуп қалдуқ. Шу жили Қарағанда вилайитидә тәбиий апәт болуп, бирнәччә йезини су бесип кәткән еди. Биз, җумһурийәтлик этномәдәнийәт мәркизи, қарағандилиқ қериндашлиримизға ярдәм сүпитидә хелә көп миқдарда мәбләғ әвәттуқ, буниңдин, әлвәттә, Нурсултан Әбишоғлиниң хәвири бар еди. Сөз новити маңа кәлгәндә, мән әйнә шу хәйрихаһлиқ ярдәм тоғрилиқ гәп қилип, «бауырлас қазақ халқына шашы ағарған, тысы сарғайған ақсақалдар алғыс айтады» девидим, Нурсултан Әбишоғли «бауырлас» дегән сөзүмгә алаһидә изаһ берип, меһир-муһәббәт, қериндашлиқ, достлуқ мавзусида шундақ параңларни ейттики, биз, дәстихан әтрапидики төрт-бәшимиз, зор иштияқ билән тиңшидуқ. Шәхсән мән, Қазақстан хәлқи Ассамблеяси Кеңишиниң әзаси болғачқа, Тунҗа Президентимизниң ейтқанлирини маңа бериватқан йол-йоруқ, көрсәтмиси сүпитидә қобул қилдим. Буни ейтиватқинимниң сәвәви, Елбасы һәр күни маңа охшаш онлиған, һәтта йүзлигән адәмни қобул қилиду, учришиду, телефон арқилиқ сөзлишиду. Улар һәрхил кәсип егилири, көрнәклик дөләт вә җәмийәт әрбаплири, һәрхил дәриҗидики һакимлар, министрлар, депутатлар... Мана шуларниң һәммисигә, улар қайси саһаниң адәмлири болушидин қәтъий нәзәр, Елбасы худди шу саһаниң кәспий мутәхәссисидәк, әтраплиқ пикир-мәслиһитини ейтип, ениқ көрсәтмиләрни бериду. Бу, биринчи новәттә, Нурсултан Әбишоғлиниң чоңқур билимгә егә екәнлигини, әтраплиқ пикир-мулаһизә қилидиғанлиғини, сәясий, ихтисадий, мәдәний, иҗтимаий вә башқиму елимиз җәмийәтлик һаятиниң барлиқ саһалиридин толуқ хәвәрдарла әмәс, бәлки уларниң локомотиви екәнлигини испатлайду. Мошу қурларни йезиветип, мону бир вақиә ядимға чүшүватиду. Буниңдин 3-4 жил илгири, бу қетим Парламент Мәҗлисиниң депутати сүпитидә, һәр жили Рамзан ейида берилидиған Президент иптариға қатнишип қалдим вә, Аллаһқа мин қатлиқ шүкри, йәнә Нурсултан Әбишоғли билән бир үстәлдә олтардим. Шу йәрдә бу дана шәхсниң пәқәт «Қуръан Кәримнила» әмәс, шундақла «Инҗилниму» яхши билидиғанлиғини көрүп, «һәқиқәтәнму Улуқ адәмләр һәммә тәрәптин улуқ болидекәндә» дәп ойлидим. Һә, Нурсултан Әбишоғли һәқиқәтән Улуқ шәхс. Әгәр бүгүн биз Қазақстанда сәясий турақлиқ, милләтләрара разимәнлик, ихтисадий өрләш, иҗтимаий-мәдәний тәрәққият қелиплашқанлиғи һәққидә гәп қилсақ, сөзсиз, көз алдимизға Елбасы келиду. Башқичә болушиму мүмкин әмәс. Чүнки бизниң йолумиз — дағдам, пәллә-нишанимиз – ениқ. Бу – Елбасыниң беваситә қатнишиши билән ишләнгән вә утуқлуқ әмәлгә ешиватқан нурғунлиған стратегиялик программиларниң мевиси. Буни биз һәр күни дегидәк һәрбир қәдимимиздә сезиватимиз. Бирла мисал. Дунияни тәшвишкә салған таҗсиман вирус пандемияси түпәйли елимиздә пәвқуладдә әһвал җарий қилинип, карантин режими күчигә киргәндә, нәқ Елбасиниң тәшәббуси билән «Біргеміз» фонди тәшкил қилинип, турмуш шараити начар йүз минлиған аилә мошу фондтин 50 миң тәңгидин ярдәм пулини алди. Һазир мундақ ярдәмни 3-қетим бериш тәрәддути көрүлүватиду. Мошу мисалниң өзила Елбасыниң пәқәт хәлиқ мәнпийитини көзләйдиған, униң хаһишини тиншайдиған, ярдәм қолини сунушқа дайим тәйяр туридиған Рәһбәр екәнлигиниң йәнә бир ярқин көрүнүши әмәсму! Бойиға әйнә шундақ алий хисләтләрни сиңдүргәчкә, Нурсултан Әбишоғли барлиқ қазақстанлиқларниң пәхригә айланди, «Елбасы!» дегән жуқури Пәхрий атаққа егә болди. Елбасыға болған мундақ чәксиз һөрмәтни һәрбир қазақстанлиқниң, җүмлидин һәрбир уйғурниң еғизидин аңлаймиз. Өзиңиз ойлап көрүң, пәқәт Қазақстанда «академиялик» дегән мәртивигә егә Уйғур театри бар, җумһурийәтлик җәмийәтлик-сәясий «Уйғур авази» гезити йоруқ корүватиду, хәлқимизниң қедим тарихи билән мәдәнийитини тәтқиқат қиливатқан Уйғуршунаслиқ мәркизи моҗут, балилиримизға ана тилида дәрис беридиған атмиштин ошуқ арилаш вә таза мәктәплар бар вә һаказилар. Мана мошуларниң һәммиси, очуқ ейтишимиз керәкки, Елбасыниң еқидиси! Мән хәлиқ арисида пат-пат болимән. Хәлиқ жиғилған баш қошушларда биз Елбасы селип бәргән дағдам йолда кетип барғанлиғимизни тилға елип, «Бұл Елбасы салған дара жол» дәп қошумчә қилимән. Һәқиқәтәнму шундақ. Чүнки бу йол дағдам, пәқәт мошу йол бизни көзлигән мәхситимизгә йәткүзиду! Шаһимәрдан НУРУМОВ, Қазақстан Җумһурийити Парламенти Мәҗлисиниң депутати, Қазақстан хәлқи Ассамблеяси Кеңишиниң әзаси, җумһурийәтлик Уйғур этномәдәнийәт мәркизиниң рәиси.

13 рет

көрсетілді

0

пікір
Алдыңғы мақала Ейтилған сөзләр әмәлгә ашти

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *