• COVID - 19
• 12 Шілде, 2020

Дора-дәрмәккә бағлиқ чүшәндүрүш

Дора-дәрмәкләрни бир адәмгә көп қисимда сетиш әһваллириға бағлиқ тегишлик қәтъий чариләр көрүлидиған болиду. Һазирниң өзидә җумһурийитимизниң бәзибир шәһәрлиридә әйнә шундақ әһваллар тиркәлди. Таҗсиман вирусқа бағлиқ һазирқи мурәккәп дәвирдә дора-дәрмәкни көп қисимда сетивелип, қиммитигә сетишта қолға чүшкән шәхсләр қанунға мувапиқ җазасини алиду, дәп билдүрди йеқинда җумһурийәт вице-премьери Ералы Тоғжанов. У шундақла мәмликәт дориханилиридики дора-дәрмәк тапчиллиғиға бағлиқ мәсилигә тохталди. Бүгүнки күндә һәқиқәтәнму дориларниң бәзи түрлириниң тапчиллиғи байқалмақта. Бу бирқанчә сәвәпләргә бағлиқ. Биринчидин, аһалиниң дора-дәрмәккә дегән еһтияҗи өсти. Адәмләр дора-дәрмәкләрни аммивий сетивелишқа башлиди. Мәсилән, май ейида алмутилиқлар бир ай ичидә 50 000 қап парацетамол сетивалған болса, һазир бир күндә 100 000 қап сетип еливатиду. Шундақла әгәр илгири бир жил ичидә 100 000 градусник сетилған болса, һазир бу көләм бир һәптә ичидә сетиливатиду. Иккинчидин, қанунға қарши риқабәтчилик һәрикәтләр. Йәни, дора-дәрмәкләр елипсатарларниң қолиға кетиватиду. Мошуниңға бағлиқ салаһийәтлик һоқуқ қоғдаш органлириға дора-дәрмәк препаратлири баһалириниң асассиз өсүшигә йол қоймаслиқ бойичә тегишлик тапшуруқлар берилди. Ениқланған һәрбир факт бойичә қанунға мувапиқ җавапкәрликкә җәлип қилиш чарилири көрүлиду. Үчинчидин, вәтән дора-дәрмәк ишләпчиқарғучилири униңға болған еһтияҗниң пәқәт 13 пайизинила қанаәтләндүрәләйду, қалған 87 пайизи чәттин кәлтүрүлиду. Бу униң тәминатиға сөзсиз тәсирини йәткүзиду. Вице-премьерниң сөзичә, аһалини дора-дәрмәк билән тәминләш бойичә төвәндики ишлар қилинди. Вирусқа қарши ингавирин дориси 70 000 болақ көләмидә дориханиларға йәткүзүлди. Әнди һарарәтни төвәнлитидиған парацетамол дориси һазирниң өзидә дориханларға 800 000дин ошуқ болақ әвәтилди, пат-йеқинда йәнә 900 000 болақ йәткүзүлиду. Антибиотиклар бойичә – өткән һәптиниң ахирида вәтән дора-дәрмәк ишләпчиқарғучилири 150 000 болақ азитромицин йәткүзди. Пат-йеқинқи күнләрдә һарарәтни төвәнлитидиған вә вирусларға қарши препаратларниң тапчиллиғи толуқ һәл қилиниду, деди вице-премьер. Шундақла у гражданларни нами башқа, лекин охшаш тәсир қилиш хисләтләргә егә дориларни сетивелиш имканийитиниң барлиғиға диққәт ағдурушқа чақирди.