• Әхбаратлар еқими
  • 15 Шілде, 2020

Йоллар җөндиливатиду

Әмгәкчиқазақ наһийәлик иш билән тәминләш мәркизиниң әхбарати бойичә «Иш билән тәминләшниң йол хәритиси – 2020» программисиға Алмута вилайитидә йолларни җөндәш бойичә әмәлгә ашидиған 977 лайиһәгә һөкүмәттин 109,2 миллиард тәңгә бөлүнгән. Җүмлидин, 106 лайиһә Әмгәкчиқазақ наһийәсидә әмәлгә ешиватиду. Шуниңға бағлиқ наһийәдә 1500 иш орни ечилип, униңға қурулушчилар билән һәрхил йөнилишләрдики ишчилар тәләп қилинмақта. Ахирқиси өз алдиға бир мавзу. Йолларни җөндәш қандақ әмәлгә ешиватиду? Рашидәм РӘҺМАНОВА, «Уйғур авази» Шуниң билән жуқурида ейтилған мәбләғниң 11 миллиард 513 миллион тәңгиси Ишиктә шәһиридә 1500 орунлуқ мәктәп, Көктөбә йезисида йеңи амбулатория беналириниң қурулуши вә сәккиз иҗтимаий бенаниң җиддий җөндәштин өтүши үчүн сәрип қилиниду. Җүмлидин, наһийә мәркизидики Т.Молдағалиев намидики вә Көлди йезисиниң мәдәнийәт өйлири, Бижанов йезисидики спорт комплекси ремонтлинип, пайдилинишқа берилиду, дәп күтүлмәктә. 46 лайиһә йол җөндәш ишлири йөнилишидә әмәлгә ашиду. Наһийәдики барлиқ автомобильлиқ йоллар 2555 километрни тәшкил қилса, униң – 391 километри җумһурийәтлик, 627,3 километри – вилайәтлик, 1236,7 километри – наһийәлик (униң 1145 километри – йеңидин бәрпа болуватқан участокларға тәәллуқ) әһмийәткә егә вә 300 километр – егиликләр ичидики йоллар болуп һесаплиниду. Әмгәкчиқазақ наһийәсидики вилайәтлик әһмийәткә егә йоллар 627,3 км тәшкил қилса, уларниң 250 км 15-апрельғичә еқимдики ремонттин өтти. Шундақла вилайәтлик әһмийәткә егә Ишиктә–Қырбалтабай–Жетыген (14 км) вә Ишиктә шәһиридин Улуқ Ипәк йоли трассисиғичә болған йоллар (7 км) 153,4 миллион тәңгигә оттура җөндәштин өтти. Туризмни тәрәққий қилиш мәхситидә Ишиктә шәһиридин Йешил көлгә апиридиған (8,5-15 км) йол 195,5 миллион тәңгигә ремонтланди. Наһийәни кесип өтидиған җумһурийәтлик әһмийәткә егә участкиларму диққәттин сирт қалғини йоқ. Алмута–Көкпәк–Көктал–Қорғас трассисиниң 154­­­­­­­­­­­­­­­­–172 км йоли (умумән, 18 км), Көкпәк чатқилидин Уйғур наһийәсигичә болған арилиқни җөндәш үчүн 708 миллион тәңгә бөлүнди. Нәтиҗидә Көкпәк­­­­­­­­­­­­­­­­–Кегән­­­­­­­­­­­­­­­­–Төп йоли 433 миллион тәңгигә җөндәштин өтиду. Наһийә бойичә 22,2 км йол оттура җөндәштин өтсә, 21,6 км йолниң чети вә тротуар җөндилип, 27 йезиниң ичидики кочилар еқимдики җөндәштин өтиду. Шундақла бийил Ишиктә шәһиридин тартилған су системисиниң қурулуши вә җөндәш ишлири қолға елиниду. Бу ишларға бир миллиард икки миллион 32 миң тәңгә бөлүнди. Сатай, Қизилшәриқ, Лавар, Челәк, Ғулҗа йезилириниң мәркизий кочилири йоруқ билән тәминлинип, 26 миллион тәңгигә Ачисай паркидиму җөндәш, униң әтрапини йешилзарлиққа айландуруш ишлири әмәлгә ашмақчи. Рахат йеза округиниң Азат, Қырбалтабай йеза округиниң Екпенды вә Тәшкәнсаз йеза округиниң Ғулҗа, Түргән йеза округиниң Түргән, Қаратуруқ йеза округиниң Достлуқ, Саймасай йеза округиниң Саймасай вә Аси йеза округиниң Жаңашаруа, Қаракемер йеза округиниң Талдыбулақ, Балтабай йеза округиниң Ақбастау, Бирлик вә Өрнәк йезилириниң йоллирини җөндәш қолға елиниду. 919 миллион тәңгә Челәк йезисиниң 15 кочисини җиддий җөндәшкә бөлүнгән. Йеқинда биз, Ташкәнсаз йеза округида болуп, йоллардики ремонт ишлирини өз көзүмиз билән көрүп қайттуқ. – Округниң мәркизи – Тәшкәнсаз йезисида 2018-жили 2000 кв\метр, 2019-жили 5000 кв\м йол җиддий вә оттура җөндәштин өтти. Бийил Қазақстан Җумһурийитиниң Президенти Қасим-Жомарт Тоқаевниң тапшурмисиға бенаән наһийәниң барлиқ округлирида қурулуш ишлири әмәлгә ешиватиду. Тәшкәнсаз йеза округидики 6650 кв\м йолниң җөндилип, асфальтлиниши үчүнму дөләт һесавидин мәбләғ бөлүнди. Ақивәттә «Регионларни тәрәққий әткүзүш» программиси Ғулҗа йезисидики 2000 кв\м, йәни һеч қачан асфальт көрмигән алтә коча асфальтланди. «Бюджетниң йол картиси» программиси бойичә Тәшкәнсазда 3750 кв\м вә Баяндайда 2500 кв\м йол җиддий ремонтлинип, асфальтлиниш алдида туриду. Чоң кочилар йоруқ билән тәминлинип, Баяндай йезисидики икки мәктәп бенасиниң ичидә балилар үчүн һаҗәтханилар селиниду, – дәйду округ һакими Эльвира Мәсүтова округтики әһвал билән тонуштуруп. Эльвира Әхмәтқизиниң тәкитлишичә, йезидики тазилиқни тәминләш үчүн аһалидин әхләт жиғип, уни тегишлик йәргә төкүш ишлири йолға қоюлған. Ушбу хизмәтниң баһаси бари-йоқи 500 тәңгини тәшкил қилиду. Йеза турғунлири үчүн интайин қолайлиқ баһа. Чүнки, уларниң нурғуни йеза егилиги билән шуғуллиниду. Шуниң билән Тәшкәнсаздики 23 кочиниң 75 пайизиға асфальт йейилип, тәкшиләнди. Баяндайда башта иккила коча бар еди. Улар ремонтланди. Әнди кейинирәк яшларға йәр участкилири берилип, йезида йеңи Жаңатурмыс ихчам наһийәси моҗут болди. Шу йәрдә вә Тәшкәнсаздики йеңи өйләр чүшкән Жаңақурылыста йолларни җөндәш, инфрақурулумни бабиға йәткүзүш ишлири йәнә бар. Уларниң һөҗҗәтлири тәйярлиниватиду. Ғулҗа йезисида болса, бу ишларниң барлиғи тәл-төкүз әмәлгә ашти. Биз округ турғунлириниң пикирлирини билиш үчүн Ғулҗа йезисиниң турғуни, Турғанҗан Сраждиновни сөзгә тарттуқ. – Әлдә пәвқулладә әһвал елан қилинғанда кочилар билән иҗтимаий орунларда җөндәш ишлириниң елип берилди. Тәкитләш лазимки, бизниң Тәшкәнсаз йеза округидиму нурғун кочилар җөндилип, йоруқ билән тәминләнди, – дәйду Турғанҗан ака үстүн кәйпиятта. – Хошаллиғимизда чәк болмиди. Ечинишлиқ йери, бирмунчә адәмләр, болупму яшлар, буниң қәдрини билмәйду. Мәсилән, мән Ғулҗа йезисиниң Ташкәнсаз йезисиға бурулған чоң кочисиниң бойида туримән. Ишигимниң алдида автобус вә такси бекити бар. Күндүзи йолувчилар бекәттин у яқ-бу яққа маңиду. Әнди кечиси болса, бу йәр бекарчилар жиғилидиған җайға айлиниду. Гайида улар «адәмләр ухлаватидиғанду» дәпму ойлимамдекин, дәп қалимән. Мундақ қаттиқ вараң-чуруң көтирилгән күнлири талаға чиқип, уларни қоғлап дегидәк кәткүзүветимән. Гайида бекәтниң «кечики турғунлири» арисида тамамән гәп уқмайдиғанлириму учрап қалиду. Бекәт ремонтланғандин кейин таза турсун дәп, өйдин әхләт салидиған челәкму әчиқип қойдум. Әпсус әшула мәйнәтчилик. Һәркүни әтигәнлиги дегидәк чиқип, бекәтни сүпирип, тазилаймән. Ейтай дегиним, барниң қәдрини биләйли! Худаға шүкри, бизниң тәрәққий әткән әлдә яшишимиз үчүн барлиқ мүмкинчиликләр яритилған. Һә, уни сақлап, қәдирләш ­– һәр биримизниң қәрзи һәм пәрзи. Әмгәкчиқазақ наһийәси.

140 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

03 Наурыз, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы