• Әхбаратлар еқими
  • 30 Шілде, 2020

Қаидиләрни бузушқа йол қоймайли

Язниң ети язғу! Адәмләрниң иссиққа чидимай, су бойини чөгиләйдиғанлиғи һәқ. Лекин бийилқи пәвқуладдә әһвалға бола, бу адитимизни бираз чәкләп турсақ, яхши болатти. Амма шуниңға қаримай, суға чөмүлүш рухсәт қилинмиған җайлардин пат-пат шум хәвәрләр келиватиду. Елимиздә карантин елан қилинғандин буян, тушма-туштин, йәни барлиқ саһаларниң ишлири тохтап, у йәрдә ишләватқанларниң тапавитиму азайди. Шәһәрликләр жирақ йезилар билән тағ-деңизларни яқилашқа башлиди. Карантин созулуп, униң ахири язниң қайниған күнлиригә тоғра кәлгәчкә, көпчилик суға чөмүлүшкә болидиған көлгиму, сазлиққиму өзлирини атмақта. Бизниң департамент хадимлири тамамән адәмләрниң чөмүлүшигә рухсәт қилинмиған җайларни арилап, у йәрләргә агаһландуруш тахтилирини есип, аһали арисида көплигән тәшвиқат ишлирини жүргүзүватсиму, аддий хәлиқ йәнила байиқи өзиниң «сәнимигә» чүшүвалған һалда, қайғулуқ әһвалларниң йүз беришигә түрткә болмақта. Шуниң нәтиҗисидә бийилқи суға чөмүлүш вақти башлина-башланмай 13 суға чөкүп кетиш факти ениқланди. Уларниң йәттиси камаләт йешиға толмиған балилар екәнлигини инавәткә алсақ, бу ата-аниларниң өзлириниң беваситә мәсъулийитигә чоңқур әһмийәт бәрмәйватқанлиғини көрситиду. Әлвәттә, өзлири яшаватқан аһалилиқ пункт әтрапидики көлләрдә чөмүлүшни халиған адәмләрни чүшинишкә болиду. Язниң томузида судин башқа раһәт болсунму? Буниңдин ташқири, улар мәхсус чөмүлүш орунлириға барай десә, барлиқ җайлар йепиқ. Униң үстигә көңүлдикидәк дәм елиш үчүн янчуғуңму дөң болуши керәк. Әтияздин тартип, бир тийин тапмай, «бәрсәң йәймән, урсаң өлимән» дәп жиққан-тәргинини хәшләватқан уларда унчилик пул нәдин? Бирақ. Шу “бирақ” һәммигә гунакар. Су бойиға барғанлар суға чөмүлүшни ядидин чиқирип, йүз грамм «аччиқ судин» ичидудә, өзлирини “шир֨” һис қилиду. Үзүшни биләмду, билмәмду, әйтәвир өзлирини немигә қадир екәнлигини намайиш қилиш мәхситидә, суға бешичә кирип кетиду. 40 градусниң тәсиридин соғ суға чүшкәндә, қизиған бәдәндә мәлум дәриҗидә өзгириш реакция йүз беришкә башлап, адәм иш-һәрикитидин қалиду. Демәк, адәм чөкүшкә тайин тапти. Дост-ярәнлири вақтида байқап, ярдәмгә кәлсә – тәлийи. Амма улар үлгирәлмисә, униң өпкисигә чапсанла су тошуп, нәпәс елиши тохтайду. Мана қарап олтирип, мутәхәссисләр тәвсийә қилған аддий қаидиләргә риайә қилмаслиқниң ақивитидә бир өйниң әзиз пәрзәнди, бир аилиниң түврүги яки бирәвниң вападар яри асанла бақиға атланди, дегән сөз. Буниңға кимни әйиплишимиз мүмкин? Биз, Пәвқуладдә әһваллар департаменти хадимлириниң жүргүзгән статистикиси бойичә, мундақ ишлар асасән, жуқурида биз тәкитлигинимиздәк, суға чөмүлүш пәйтидә спиртлиқ ичимликләрни истимал қилиштин йүз бәрсә, қалғанлири суда үзүштин унчивала хәвири йоқлуғи билән қизиқчилиқта суға егиз көрүкләрдин сәкрәш нәтиҗисидә орун алидекән. Буниңға қошумчә, белиқ тутушқа һәвәслинип, қирғақтин жирақ кәткәнлигини байқимаслиғи түпәйли күтүлмигән әһвалларға дуч келиватқанларму йетәрлик. Бизниң тилда ейтқанда, «явайи» көлләрдә чөмүлүш қәтъий мәнъий қилинған болсиму, у йәрләрдә дәм алғучиларниң сани азияр әмәс. Әлвәттә, ундақ көлләр бу тәвәдә йетип ашиду. Уларниң һәммисидә бехәтәрлик қаидилириниң сақлинишини күзитишкә имканийәт яр бәрмәйду. Бу йәрдә пәқәт адәмләрниң өзлири бүгүнки еғир әһвалға аңлиқ түрдә қарап, униңсизму күндин-күнгә күчлинип, һәммимизни беарам қиливатқан таҗсиман вирус вә пневмониягә қарши күрәш елип беришимиз тәләп қилиниду, халас. Йәнә бехәтәрлик тоғрилиқ гәп қилсақ, тоғра, һәммимизгә дәм елиш керәк. Бирақ... Бу жил бизгә алаһидә жил болуп, барчимизни синаққа еливатиду. Көрмигәнни көрүп, аңлимиғанни аңлаватимиз. Той-төкүн, мәшривимизниң ишиги тақилип, мусибәт егилиригә көңүл ейтиш билән күнимиз өтүватиду. Әлвәттә, айниң он бәши қараңғу болса, он бәши йоруқтур. Шуңлашқа бираз сәвирлик сақлап, әтимизгә үмүт ичрә қариғач, мәйли рухсәт қилинмиған җайларға барсақму, барлиқ қаидиләрни ядимиздин чиқармиғинимиз әвзәл. Болупму су бойида кичик балилардин диққәт- нәзәримизни үзмәй, уларниң һәрбир қәдимини назарәт қилайли. Су билән отниң бизниң «әркилигимизни» һәргизму көтәрмәйдиғанлиғини кәспий мутәхәссис сүпитидә йәнә бир қетим агаһландуруп, дана хәлқимиздә «Сақланғанни сақлаймән» дегән нәқилниң интайин орунлуқ ейтилғанлиғини ядиңларға салмақчимән. Һаятимизни бир секунд ичидила матәм қайғусиға патуридиған «суға чөкүп кетипту яки от кетипту» охшаш шум хәвәрләрдин жирақ болайли десәк, бехәтәрлик қаидилиригә җиддий риайә қилайли, қериндашлар! Бәхтияр ИСРАЙИЛОВ, Орал шәһәрлик Пәвқуладдә әһваллар башқармиси башлиғиниң вәзиписини вақитлиқ атқурғучи, подполковник. Ғәрбий Қазақстан вилайити.

562 рет

көрсетілді

73

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы