• COVID - 19
• 30 Шілде, 2020

Мәхсус сайт ечилди

Қазақстанда qurban2020.muftyat.kz. сайти ишқа қошулди. Порталниң ярдими билән онлайн-тәртиптә қурванлиқ қилиш рәсмини өтәшкә болиду. Қазақстанлиқлар 30-июльғичә буйрутма берәләйду. Қурван һейти 31-июль – 2-август күнлири нишанлиниду. Қазақстан Мусулманлири диний башқармисиниң наиб имами Ершат Оңғаров Мәркизий коммуникацияләр хизмитидә болуп өткән брифингта сайт тоғрилиқ мәлуматларни бәрди. Униңда үч ячейка бар. Биринчи ячейкиниң ярдими билән қурванлиқ қилиш үчүн мал буйрутушқа болиду. Буниң үчүн адәм өзи яшаватқан вилайәтни көрситиши керәк. Андин кейин анкетини толтуруп, қурванлиқ қилмақчи болған мални таллавелиш лазим. Бу қара мал, қой, төгә вә өшкә болуши мүмкин. Наиб имам қара мални вә төгини һәм бир адәм, һәм йәттә адәм бирлишип қурванлиққа кәлтүрүшкә болса, ушшақ мални пәқәт бир адәмла қурванлиққа кәлтүрәләйдиғанлиғини атап көрсәтти. Мал таллавелинғандин кейин сайтта униң баһаси чиқиду. Қәтъий келишилгән баһаниң йоқ екәнлиги вә регионларда баһаларниң һәрхил болидиғанлиғи тәкитлиниду. Мәсилән, қой баһаси 50 миң тәңгә вә униңдин жуқури болса, қара мал баһаси 300 – 350 миң тәңгә вә униңдин жуқури болуши мүмкин. Шундақла WhatsApp мессенждериға тиркәлгән янфон номерини вә өзиниң қурванлиқ кәлтүрүш бойичә видео яки фотоһесават елиш хаһишиниң бар яки йоқ екәнлигини көрситиши шәрт. Барлиқ җәриянлардин кейин электронлуқ буйрутма номери чиқиду. Андин кейин сайтта көрситилидиған реквизитлар бойичә зөрүр мәбләғни әвәтиш керәк. Ершат Оңғаров шундақла карантин чарилири сәвәвидин қурванлиқ қилиш әнъәнисиниң қайта қаралғанлиғини хәвәрлиди. Мәсилән, қурванлиқ қилинған мал гөшиниң үчтин бир қисми бу рәсимни өтигән адәмгә берилмәйду – у толуқ һаҗәтмәнләргә тарқитилиду. Бу гөшни елиш үчүн һаҗәтмәнләр иккинчи ячейкини ечип, анкетини толтуруши вә өзлириниң һал-оқитиниң начар екәнлигини тәстиқләйдиған һөҗҗәтләрниң мәлуматлирини көрситиши керәк. Қурванлиқ қилиш рәсмидин кейин пидаийлар гөшни һаҗәтмәнләр сайтта көрсәткән адреслар бойичә тарқитиду. Үчинчи ячейкини бесип, қурванлиқ қилинғанлиғи тоғрилиқ әхбарат елишқа болиду.