• Йеңилиқлар
• 30 Шілде, 2020

Регионларда назарәт күчийиватиду

COVID-19 бойичә оператив штаб регионларда назарәтни күчәйтиватиду. Бу тоғрилиқ Премьер-министрниң орунбасари Ералы Тоғжанов рәислигидә өткән мәҗлистә мәлум болди. Саламәтликни сақлаш министрлигиниң мәлуматлири бойичә, икки һәптиниң ичидә көрүлгән оператив чариләр түпәйли бирқатар иҗабий нәтиҗиләрни қолға кәлтүрүш мүмкин болди. Җүмлидин таҗсиман вирусниң бир тәвлүктә жуқуши 2,3 пайиз төвәнлиди, пандемиядин сақайғанларниң сани 60 пайиз көпәйди, тез ярдәм хизмитини чақиртиш 31 пайиз қисқарди, қайтидин җанландуруш бөлүмлиридә ятқанларниң сани 12 пайиз, стационарларда ятқанларниң сани 56 пайиз қисқарди. Мәҗлистә пандемиягә қарши күришишниң әң төвән көрсәткүчлири тиркәлгән Ғәрбий Қазақстан вә Қизилорда вилайәтлик һакимлиқларниң лазимлиқ дәриҗидә иш елип бармайватқанлиғи тәкитләнди. Шундақла Ички ишлар министрлиги карантин тәртивиниң бузулғанлиғиниң 4,3 миң факти тоғрилиқ доклад қилди. Буниңда Павлодар, Қизилорда, Қостанай, Ақтөбә вә Ғәрбий Қазақстан вилайәтлиридә бу ишниң начар жүргүзүлүватқанлиғи атап көрситилди. Гражданларниң санитарлиқ вә ниқап тақаш тәртивигә риайә қилишиға алаһидә диққәт ағдурулди. – Биз һаятниң қиммәт екәнлигигә диққәт ағдуруп, адәмләрниң аң-сезимини түп-асасидин өзгәртишимиз керәк. Биздә мошу кәмгичә «ниқап бәрибир ярдәм қилмайду – тақидиңму, тақимидиңму – охшашла», дәп пәрәз қилишиду. Адәмләр мошу кәмгичә фактларға әмәс, бәлки өзлириниң натоғра чүшәнчисигә әмәл қилмақта. Вирусқа қарши күришиш – барлиқ қазақстанлиқларни умумий мәхсәткә бирләштүрүши, җәмийәт болса, карантин тәртивиниң бузулушини әйиплиши керәк. Дөләт органлири вәзипилириниң бири әйнә шуниңдин ибарәт, – дәп тәкитлиди Ералы Тоғжанов. Премьер-министрниң орунбасари мәҗлис йәкүнини чиқирип, Гражданларниң пандемия вақтида өзини тутуш тәртивини ишләп чиқишни, регионларда һәр күни карантин тәртивиниң сақлинишини тәкшүрүш үчүн рейдларни жүргүзүп, улар тоғрилиқ аммивий әхбарат васитилиридә кәң йорутушни, башқиму бирқатар оператив тапшурмиларни бәрди.