• Әхбаратлар еқими
  • 05 Тамыз, 2020

Бирнәччә тиҗарәтчи җавапқа тартилди

Рашидәм РӘҺМАНОВА, «Уйғур авази» Ахирқи вақитларда пневмония ағриғиға муптила болуватқанларниң сани көпәйди. Әлниң издигән дора-дәрмәклири тапчил һәм қиммәт болуп, дориханилардики новәтләр көпәйди. Пурсәттин пайдилинип, дора-дәрмәкләрни әрзәнгә сетивелип, қиммәткә сетип, пайда көрүватқанларму болди. Мошу камчилиқларниң алдини елиш үчүн Қазақстан Җумһурийитиниң Президенти Қасым-Жомарт Тоқаев һоқуқ қоғдаш орунлириниң хадимлириға ениқ тапшурмиларни бәрди. Йеқинда Nur Otan партиясиниң Әмгәкчиқазақ наһийәлик шөбиси наһийә мәркизи – Ишиктә шәһиригә рейд уюштурди. Шөбә рәисиниң биринчи орунбасари Қуат Байғожаев, партиялиқ назарәт комиссиясиниң әзаси Асыл Байтулақов, партия кативи Бағдат Рахимов һәм Әмгәкчиқазақ наһийәлик товар сүпитини вә униң бехәтәрлигини назарәт қилиш башқармисиниң баш мутәхәссиси Дана Бейсембай рәһбәрлигидики топ Ишиктә шәһиридики бирмунчә дориханиларни арилап, дора-дәрмәкләрниң бар яки йоқлуғини, уларниң баһалирини тәкшүрди. Наһийә мәркизидики дориханиларда дора-дәрмәк баһасини асассиз көтирилмигәнлиги ениқланди. Бирақ уларниң барлиғида дегидәк медицинилиқ препаратларниң тапчиллиғи байқалди. Фармацевтларниң тәкитлишичә, бүгүнки күндә кәң тарқалған пневмонияни давалаш үчүн һаҗәт дориларниң 40 — 50 пайизи йоқ яки болмиса кәлгән заманла сетилип кетиватиду. Мәзкүр рейдни уюштурғучиларниң ейтишиға қариғанда, тәкшүрүш җәриянида Әмгәкчиқазақ наһийәсидә 45 сода-сетиқ орунлирида карантин тәләплиригә риайә қилмаслиқ байқалған. Мәсилән, көплигән дукан вә базарларда ишчилар билән херидарларниң ниқапсиз жүрүши, сетиқчиларниң мәхсус пәләйсиз хизмәт қилиши ениқланди. Тәртипни бузғучиларға нисбәтән җинаий ишлар қозғилип, сотқа әвәтилди. Ениғирағи, сот қарариға бенаән 38 иш қозғилип, шәхсийләргә 10 айлиқ көрсәткүч һесап миқдарида җәриман селинди. Икки сода-сетиқ орниниң егилири бир тәвлүктин бәш тәвлүккичә қамалди. Шуни қошумчә қилиш керәкки, бүгүнки күнгә қәдәр Әмгәкчиқазақ наһийәси бойичә 418 адәм COVID-19 инфекциясини жуқтурған. Уларниң 77си Ишиктә шәһири вә Челәк йезисидики ағриқханиларда давалиниватиду. Дохтурлар «әһвали ховуп туғдурмайду» дегән 250 адәм өйлиридә йетип давалиниватиду. Бәхиткә яриша, сақийиватқанлар көп. Саламәтликни сақлаш саһасиниң хадимлири бурунқидәкла қолумизни пат-пат 20 секунд давамида совундап яки антисептик билән жуюшни, йөтилип, чүшкүргәндә еғизимиз билән бурнимизни қолумиз яки қол яғлиғимиз билән йепишни, пайдиланған салфетка яки қол яғлиғимизни әхләтханиға ташлишимизни, йөтилип-чүшкүргәндин кейин қолумизни совупдап жуюшимизни җекиватиду. Әмгәкчиқазақ наһийәси.

16 рет

көрсетілді

0

пікір
Алдыңғы мақала Яркәнт төмүрбетон заводи
Келесі мақала Кәң болсаң — кам болмайсән

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *