• Инкас
• 03 Қыркүйек, 2020

Тиҗарәт вә риқабәт

Президентимиз Қасым-Жомарт Тоқаевниң новәттики Мәктүби билән тонушуп чиқип, көңлүм су ичкәндәк болди. Немишкә десиңиз, Мәктүптә интайин муһим мәсилиләр бойичә сөз қозғилип, келәчәктә қолға елиниши һажәт болған асасий ишлар қәйт қилинған.
Мәлумки, бүгүнки вәзийәт елимиз ихтисадиға чоң зәрбә болуп тәгди. Лекин биз бу қийинчилиқларниң тәрәққиятимизға тосалғу болушиға әсла йол қоймаслиғимиз керәк. Җүмлидин Мәктүптә Президентимиз аталмиш бошлуқниң орнини толтуруш үчүн атқурулидиған ишларни тәкитләп, униң ичидә тиҗарәт саһасини риваҗландурушқа алаһидә көңүл бөлүшимиз лазимлиғини җекиди. Тиҗарәтчиләргә 6% мөлчәрлимиси билән несийә беришниң марттин башлап һесаплиғанда бир жилға созулидиғанлиғини, тиҗарәтчиләрни қоллап-қувәтләш ишлири давамлиқ әмәлгә ашидиғанлиғини ейтти.
Дөләт рәһбириниң тиҗарәт саһасиға бесимлиқ бериши бекар әмәс. Тиҗарәт – мол тапавәтниң ачқучи. Мана шу ачқуч – кичик вә оттура тиҗарәттә. Мәктүптә қәйт қилинғандәк, кичик вә оттура тиҗарәтни тәрәққий әткүзүш арқилиқ елимиз боһранниң алдини елип, қийин синақтин сүрүнмәй өтиду. Шундақла «Риқабәтчилик сәясити чоң әһмийәткә егә. Риқабәтчилик сәяситини түрләндүрүп, һәр тиҗарәтчигә тәң мүмкинчилик бериш һаҗәт», дейилиду Президент Мәктүбидә.
Хулләс, мән 2015-жилдин буян шәхсий тиҗарәт билән шуғуллинип келиватимән. Бу жиллар арилиғида дөлитимиз тәрипидин тиҗарәтчиләр үчүн нурғунлиған мүмкинчиликләрниң моҗутлуғини билдим. Шундақла дөләт тәрипидин яритилған имканийәтләрдин пайдилинип, өз кәспимни жүргүзүватимән. Әл ихтисади қил үстидә турған пәйттиму, Президентимиз тиҗарәтчиләрниң әһвалини нәзәрдин сирт қоймиди. Атап ейтсақ, йәттә йүз миңдин ошуқ тиҗарәтчигә селиқлиқ йеникчиликләр берилип, ишсизларға карантин мәзгилидә дөләт бюджетидин 42 500 тәңгә бөлүнди.
Хәйрият, әндики новәттә тиҗарәтчиләр үчүн дөләт ғәмхорлуғиға җавап қайтуридиған пәйт йетип кәлди дәп ойлаймән һәм Мәктүптики тапшурмиларға бенаән тәр төкүп, әл тәрәққиятиға тамчидәк болсиму өз һәссәмни қошушқа тиришимән.
Гүлназ ҺЕМИТОВА,
тиҗарәтчи.